Bisalu bia Bantumwa
17 Bawu bayôkela ku Amfipolise na ku Apolonia mpe batula ku Tesalonike, kwabâ sinagoge ya Bayuda. 2 Ntiana bu keri toko saka, Paulo wakota mu sinagoge, mpe sabala zitatu wayindula na bawu mu nzila ya Matsonoko, 3 yandi wabangula, mpe wasongela mu nzila ya Matsonoko ti Kristo wafweti mona mpasi mpe wafweti vumbuka kwe ba fwa, bu katâ: “Yezu wu nita lu samunina, ni yandi Kristo.” 4 Buna, bantu bakaka ha kati diawu bayizi kwikila mpe bayizi bâ tintwari na Paulo na Silase, mpe Bagreke babingi beri sambilaka Nzambi na bakento babingi ba nsangu ni bo mpe basila.
5 Kâ Bayuda bayizi bâ na timbanda, bakutakasa mwa babakala ba mbi beri kwe yimi ha zandu, bayirika tikunku timosi tia bantu mpe babatika mu kotesa vwandi mu mumvuka. Bakota mu ngolo mu nzo ya Yazone mpe babatika mu dinga Paulo na Silase mu ba nata ha matu ma tikunku tia bantu bango. 6 Bu balembo ba mona, bakoka Yazone na mpangi zakaka kwe mfumu za mumvuka, bu beri kawulaka: “Babakala eba batulumuni vwandi kwakwansoni, bwawu bu ni kû mpe bena, 7 mpe Yazone ba bweni ku nzo’andi. Babakala bo babansoni misiku mia Sezare bata telamana bu bata tâ ti mutinu wakaka wê kô, wê na nkumbu Yezu.” 8 Bu bawâ misamu mio, pôka dia bantu na mfumu za mumvuka bunkuta bwababaka; 9 mpe bu bamana futisa Yazone na mpangi zakaka mbongo za fwanana, bababîka benda.
10 Mu mpimpa, bampangi basarila manzangu mu tambika Paulo na Silase ku Bere. Bu batula kûna, bakota mu sinagoge ya Bayuda. 11 Bayuda ba ku Bere mabanza ma mbote meri nawu yôka Bisi-Tesalonike, mu bungu ti batambula zu na timina diadiansoni. Matsonoko beri tomo taluzulaka bilumbu biabiansoni mu mona tala ti misamu mi beri ba têlaka mia matieleka mieri. 12 Buna, babingi ha kati diawu bayizi kwikila, mpe bakento babingi ba bazitisaka beri Bagreke na babakala bakaka ni bo mpe basa. 13 Bayuda ba ku Tesalonike bu bawâ ti Paulo wasamuna mpe zu dia Nzambi ku Bere, bayiza kûna mpe batuma pôka dia bantu mu sa vwandi. 14 Hô nkatika bendo, bampangi batambika Paulo mu nzila ya mubu, kâ Silase na Timote basâla kûna. 15 Kâ bô beri turisaka Paulo bamunata tii ku Atene, mpe bakâla bu bamana baka ntumunu ya tâ kwe Silase na Timote mu kulu landa Paulo.
16 Paulo bu keri ba kêlaka ku Atene, wabaka nkesi bu kamona ti mumvuka wa fuluka weri mu biteki. 17 Buna mu sinagoge wabatika mu yindula na Bayuda na bantu bakaka basambilaka Nzambi, mpe bilumbu biabiansoni ku zandu ni bo mpe keri silaka na bantu ba keri bwanaka kûna. 18 Kâ filozofe zakaka za Epikire na za Stoyike zabatika mu disikita na yandi, mpe bakaka batâ: “Muntu wo wuta wolomoka bwe kata zolo tâ?” Bakaka ti: “Kampe tisamuni tiena tia nzambi za nzenza.” Ni bo beri tâka mu bungu ti nsangu za mbote zitariri Yezu na mvumbukulu ya ba fwa keri samunaka. 19 Buna bamubwila mpe bamunata ku Areopaze, batâ: “Ngano tulendi zaba ntia ndongosolo ya môna ta longesa? 20 Mu bungu ti misamu mi ta tâ ka tweka’eti mia wâ ko, mpe tuzololo tazaba bwe mita zolo tâ.” 21 Diangana, Bisi-Atene babansoni na nzenza zeri bêlaka kûna, ntangu’awu beri yôkesaka mu zonzela peleko mu wirikila misamu mia môna. 22 Paulo watelama ha kati-kati dia Areopaze mpe watâ:
“Babakala ba Atene mweni ti mu misamu miamiansoni banzambi lutomo tînaka* yôka bantu bakaka. 23 Mu tifwani, bu nabele yôkaka mpe bu nabele tomo taluzulaka bima bieno bia nsambululu, namweni mpe ziku* dimosi di batsoneka: ‘Kwe Nzambi yilembolo ya zabakana.’ Ntiangu, Nzambi yo yi lusambilaka na kondo kwa zaba ni yo nita lu samunina. 24 Nzambi yasala nza na bima biabiansoni bie mô, Yandi wê Mfumu ya zulu na ya mutoto, ka bêlaka mu tempelo ko zi basala mu moko; 25 kena na nsatu ko moko ma bantu mamusarila ntiana’eti nsatu tima tie nandi, mu bungu ti ni yandi hanaka luzingu kwe bantu babansoni, mwela na bima biabiansoni. 26 Mu nzila ya muntu wumosi wadukisa makanda mamansoni ma bantu ngatu mabêla ha mutoto, wasôla ntangu mpe watûla ndilu mu mbuka za keti bêla bantu, 27 ngatu badinga Nzambi, ni bu sa ti bafweti sarila ngolo mu mu dinga, mbo bamubaka, mu bungu ti kena mala ko na muna muntu mu beto. 28 Mu bungu ti ni mu nzila ya Yandi twe na luzingu, tuninganaka mpe twe ba moyo, ntiana bwa tsoneka wo bitsoniki* bieno biakaka: ‘Mu bungu ti bala* bandi mpe twena.’
29 “Dieka bo, mu bungu ti bala* ba Nzambi twena, ka tufweti’â tabanza ko ti Nzambi ntiana ore kena, arza peleko tari, ntiana tima ti basala mu mayela na mu mabanza ma bantu. 30 Wa matieleka, mu ntama, Nzambi wakanga meso mu kondo kwa luzabu lo; kâ bwawu bu kwe bantu babansoni kata tâ ti bafweti soba mabanza. 31 Mu bungu ti wasôla tilumbu ti kafundisa mutoto wa mukaka mu buderede mu nzila ya muntu wu kasôla, mpe wahana tidimbu kwe bantu babansoni bu kamuvumbula kwe ba fwa.”
32 Bu bawâ musamu wa mvumbukulu ya ba fwa, bantu bakaka babatika mu mu sehesela, bakaka batâ: “Tilumbu tiakaka mbo tukuwirikila mu musamu wo.” 33 Buna Paulo wabasisa, 34 kâ bantu bakaka bavukana na yandi mpe bayizi kwikila. Ha kati diawu mweri na Dionizuse, weri mfundisi ku tribinale ya Areopaze, mukento wumosi wu beri tâka Damarise, na bantu bakaka mpe.