Matie

9 Buna Yezu wakota mu bato, wasabuka mpe wayenda ku mumvuka’andi. 2 Mpe bamunatina muntu weri na binama bia fwa walambalala ha zulu mfulu.* Bu kamona timinu tiawu, Yezu watâ kwe wô wafwa binama: “Bâ na butindi mwana’ani! Masumu maku balemvokele mo.” 3 Bitsoniki biakaka biatâ bawu na bawu: “Muntu wu Nzambi kata finga.” 4 Yezu bu kazaba mbanzulu zawu, watâ: “Mu bungu dia nti luta banzila misamu mia mbi mu mitima mieno? 5 Mu tifwani, nti bilembolo nguria mpasi, ngano ni mu tâ, ‘Masumu maku ma balemvokele,’ peleko ni mu tâ, ‘Telama mpe yenda yende’? 6 Kâ, ngatu lwazaba ti Mwana muntu lutumu lwe nandi ha mutoto lwa lemvokela masumu​—⁠” watâ kwe muntu wafwa binama: “Telama, bonga mfulu’aku mpe yenda ku nzo’aku.” 7 Buna watelama, mpe wayenda ku nzo’andi. 8 Pôka dia bantu bu diamona bo, bunkuta bwatomo ba baka, mpe bakembela Nzambi wahana lutumu lwa mpila yo kwe bantu.

9 Ha manima bu kakatuka kûna, Yezu wamona bakala dimosi di beri tâka nkumbu Matie wazakala ha biro di bafutilaka mpaku, mpe wamutêla: “Kundanda.” Buna watelama mpe wamulanda. 10 Ha manima Yezu bu keri diaka* mu nzo, bantu batotaka mpaku na bisumuki biabingi biayiza, mpe babatika mu dia ha timosi na Yezu na milongoki miandi. 11 Kâ Bafarize bu bamona bo, batâ kwe milongoki miandi: “Mu bungu dia nti mulongi’eno kata dîla na bantu batotaka mpaku mpe na bisumuki?” 12 Bu kawâ misamu miawu, yandi watâ: “Ka bantu ba wasa ko bê na nsatu doktere, kâ bô bê na bimbevo. 13 Buna, yendeno lwalongoka bwe musamu ewu wuta zolo tâ: ‘Tiari tia mutima nzololo, ka mukayulu’â ko.’ Mu bungu ti bisumuki ndizi tâ mbila, ka bantu ba sungama ko.”

14 Ha manima milongoki mia Za miayizi mu monekena, mpe miamuyula: “Mu bungu dia nti milongoki miaku milembo silaka diêna ntiana bu tusilaka beto na Bafarize?” 15 Yezu wabavuturila: “Ndiku za bakala dita kwela ka zena na nsatu ko ya bâ mu tiari bu katiri na bawu, ka buna ko? Kâ, tilumbu tie kô mbo bakatula bakala dita kwela ha kati diawu, mpe buna mbo basa diêna. 16 Ka kwena muntu ko wutungaka titenda tia môna ha tinkuti tia ntama, mu bungu ti titenda tia môna mbo tibendoka mu tinkuti, mpe tinkuti mbo titomo tendoka. 17 Mpe ka batûlaka vinu dia môna ko mu nkutu* za vinu za ntama. Bamana sila bo, nkutu mbo zipasuka, vinu mbo ditsamuka mpe nkutu zo mbo zihombela. Kâ vinu dia môna mu nkutu za môna batûlaka dio, mpe mu mpila yo, bia biole ka bihombela ko.”

18 Bu keri ba têlaka misamu mio, mfumu yimosi yapusana, yafukama* ha matu mandi mpe yatâ: “Kampe bu bu tusiri mwana’ani wa wukento wufwiri, kâ yiza wamutensekela koko kwaku mpe mbo kavumbuka.”

19 Buna Yezu na milongoki miandi batelama mpe bamulanda. 20 Mpe tala! mukento wumosi weri dukaka menga tûka mvula 12 wapusana ha manima mandi, mpe wasimba nsongi ya tinkuti tiandi tia zulu, 21 mu bungu ti ku nsi’a mutima keri tâka: “Tala ti nsimbiri tinkuti tiandi tia zulu, mbo niwasa.” 22 Yezu wabaluka, wamumona mpe wamutêla: “Bâ na butindi mwana’ani! Timinu tiaku tikuwasisi.” Mpe hô nkatika bendo mukento wo wawasa.

23 Bu katula mu nzo ya mfumu yo, wamona bantu beri sikaka flûte na pôka dia bantu beri dilaka mu ngolo. 24 Yezu watâ: “Dukeno, mu bungu ti mwana ka wufwiri’â ko, tolo kata bwa.” Buna babatika mu mu sehesela. 25 Pôka dia bantu bu diaduka, yandi wakota, wabonga koko kwa mwana mukento, mpe mwana watelama. 26 Diangana, nsangu za musamu wo zayangana mu tizunga tiatiansoni.

27 Yezu bu kakatuka kûna, babakala bole bafwa meso beri mu landaka, mpe beri kawulaka mu ngolo: “Tu fwila tiari Mwana Davide.” 28 Ha manima Yezu bu kakota mu nzo, babakala bo bafwa meso bapusana he yandi, mpe wabayula: “Ngano lubendi ti ndendi bwa sa?” Bawu bamuvuturila: “Yee, Mfumu.” 29 Buna wasimba meso mawu mpe watâ: “Bîka wa bêla buna bu ta têla timinu tieno.” 30 Mpe meso mawu mazibuka. Yezu watomo ba kebesa ebu: “Seno keba mu lembo wa tâ kwe muntu.” 31 Kâ bu bamana duka, bamwangasa nsangu zandi ku tizunga tio tiatiansoni.

32 Bu beri kwendaka, bamunatina bakala dimosi dia baba dieri na demo; 33 mpe bu bamana dukisa demo, baba dio diazonza. Pôka dia bantu diayituku mpe diatâ: “Kani kabwe ka tweka’eti mona musamu wa mpila yi ko ku Israele.” 34 Kâ, Bafarize ni beri tâka: “Mu nzila ya mfumu ya bademo kata kumina bademo.”

35 Mpe Yezu mimvuka na mahata mamansoni keri kwe zungane, mu keri kwe longese mu sinagoge, mu keri samunaka nsangu za mbote za Timfumu, na mu keri kwe wasisi bimbevo na bifuma bia mpila na mpila. 36 Bu kamona pôka dia bantu, tiari tiamubaka mu bungu ti mpasi beri monaka mpe babayambirika* ntiana bimeme bilembolo na muvungi. 37 Ha manima watâ kwe milongoki miandi: “Diangana, tisalu tia tia mbutu tia tinene tiena, kâ bisari ka biena biabingi ko. 38 Buna, sambileno Mfumu ya tisalu tia tia mbutu katambika bisari mu bungu dia tisalu tia tia mbutu.”