Like

23 Buna babansoni batelama, mpe bamunata kwe Pilate. 2 Mpe babatika mu mu funda bu beri tâka: “Bakala di tamweni bu kabele wubakasaka kanda dieto, bu kabele ba yiminaka mu futa mpaku kwe Sezare na bu kabele tâka ti yandi ni Kristo, mutinu.” 3 Buna Pilate wamuyula tiyuvu: “Ngano nge ni Mutinu wa Bayuda?” Yandi wamuvuturila: “Nge beni ta wa tâ.” 4 Buna Pilate watâ kwe mfumu za banganga-nzambi na kwe pôka dia bantu: “Ka mbakiri’â musamu wa mbi ko kwe bakala di.” 5 Kâ batatamana mu tâ: “Bantu katumaka mu kolama bu kalongesaka ku Yude yayansoni; wabatikila ku Galile tii kwawu ku.” 6 Bu kawâ bo, Pilate wayula tala ti Yezu Musi-Galile weri. 7 Bu kayizi zaba ti ku tizunga tieri tuminaka Erode katûka, wamutambika kwe Erode weri ku Yerusaleme mu bilumbu bîna.

8 Erode bu kamona Yezu, watomo yangalala mu bungu ti nsangu za Yezu kawâ mpe tûka ntama keri dingaka mu mu mona. Weri nandi kamumona bu kasa timangu. 9 Buna wabatika mu mu yula biyuvu biabingi, kâ Yezu ka mu hana na kani mvutu ko. 10 Kâ mfumu za banganga-nzambi na bitsoniki telama beri vulu telamaka mpe mu nkesi beri mu fundaka. 11 Buna Erode na binwani biandi bamuvweza mpe bamusehesela, bu bamulwika tinkuti tia toma, ha manima bamukarisa kwe Pilate. 12 Mpe tûka tilumbu tio Erode na Pilate bayizi bâ ndiku, mu bungu ti ka beri’â toko wisanaka ko.

13 Buna Pilate watikisa mfumu za banganga-nzambi, bamfumu na bantu ba nsi 14 mpe wabatêla: “Lutêle mu bakala edi di lukunatinini ti bantu katumaka mu kolama, kâ taleno! Nimuyuriri biyuvu ha matu meno mpe ka mbakiri’â musamu wu nimuzengela mambu ko mu misamu mi luta mu fundila. 15 Diangana Erode mpe ka mu bakiriri’â musamu ko, mu bungu ti mu karisi kwe beto. Buna ka yirikiri’â musamu ko wu kafweti fwila. 16 Dieka bo mbo nimubwisa bisikoti mpe mbo nimuyambula.” 17* —— 18 Kâ bantu babansoni bakawula: “Mu honda, mpe tu yamburila Barabase!” 19 (Bakala dio bamutûla ku boloko mu bungu dia vwandi diasalama ku mumvuka mpe mu bungu ti muntu kahonda.) 20 Pilate wavutu ba tikisa, mu bungu ti weri nandi kayambula Yezu. 21 Buna babatika mu kwaya: “Mu tûla ha poto! Mu tûla ha poto!”* 22 Mbala ya ntatu, Pilate wabatêla: “Mu bungu dia nti? Ntia musamu wa mbi kayirikiri? Ka mbakiri’â musamu wu kafweti fwila ko; dieka bo mbo nimubwisa bisikoti mpe mbo nimuyambula.” 23 Kâ batatamana mu sa fuki bu beri lombaka mu mazu ma ngolo ti bahonda Yezu,* mpe mazu mawu mayôka mu ngolo. 24 Buna Pilate wabonga nzengolo ya yirika musamu wu beri lombaka. 25 Wayambula muntu wu beri lombaka, muntu wu batûla ku boloko mu bungu dia vwandi mpe mu bungu ti muntu kahonda, kâ wababîkila Yezu ngatu bamuyirika mio mi bawaya.

26 Bu beri mu nataka, binwani biabwila bakala dimosi di beri tâka nkumbu Simo Musi-Sirene, diatûka ku misitu, mpe bamutwika poto dia matimuna* ngatu kanata dio ku manima ma Yezu. 27 Yungi dia bantu dieri mu landaka, mu kati na bakento beri bulaka ntulu mu tiari na beri dilaka mu bungu dia yandi. 28 Yezu wabaluka kwe bakento bo mpe watâ: “Bala ba bakento ba Yerusaleme, bîkeno mu dila mu bungu dia meno. Kâ dileno mu bungu dia beno beni na mu bungu dia bala beno; 29 mu bungu ti bilumbu bita kwiza bantu bi batâ, ‘Nsayi kwe bakento bê bisita, bawu balembo buta mpe balembo yemeka!’ 30 Ha manima mbo babatika mu tâ kwe miongo, ‘Tu bwileno!’ mpe kwe miongo mia fioti, ‘Tu yabameno!’ 31 Tala ti basiri misamu mio muti bu wê wa nkunzu, ngano nti bitula bu wuyuma?”

32 Banata mpe babakala bole beri bimpumbulu ngatu babahonda ha timosi na yandi. 33 Bu batula ha Mbuka yi batâka tihisi tia Mutu, bamukoma ha timosi na bimpumbulu, wumosi ku lubakala lwandi mboko wakaka ku lukento lwandi. 34 Kâ Yezu ebu keri tâka: “Tata, ba lemvokela, mu bungu ti ka bazebi’â misamu mi bata yirika ko.” Musamu wakaka, madzeke beri bulaka mu kabana binkuti biandi. 35 Bantu batelama mu tala. kâ bamfumu seha beri sehaka mpe ebu beri tâka: “Wavûkisa bakaka; mu bîkeno kativûkisa yandi beni tala ti yandi ni Kristo ya Nzambi, wô wu basôla.” 36 Binwani mpe sehesela bieri mu seheselaka, biapusana mpe biamuhana vinu dia nsa, 37 mpe biatâ: “Tala ti nge ni Mutinu wa Bayuda, tivûkisa.” 38 Mpe batsoneka musamu ha zulu mutu‘andi: “Wu ni Mutinu wa Bayuda.”

39 Ha manima, wumosi wa bimpumbulu bi bakoma ha lweka lwandi wabatika mu mu finga bu keri tâka: “Kambo nge ni Kristo, buna tivûkisa mpe tu vûkisa!” 40 Kâ wakaka wamubamina bu katâ: “Kuta tîna Nzambi na kani fioti ko bu bakiri nsembolo yimosi na yandi? 41 Kwe beto ya delakana yena, mu bungu ti misamu mi tayirikiri ni mio tuta futa; kâ bakala di ka yirikiri’â na kani musamu wa mbi ko.” 42 Ha manima watâ: “Yezu, kumbambukila moyo bu kwiza mu Timfumu tiaku.” 43 Mpe Yezu wamutêla: “Wa matieleka nita ku têla lumbu ti, mbo bâ na meno ku Paradi.”

44 Kampe midi yeri, kâ nsi yayansoni mu mpimpa yabâ tii ku ba 15 heure, 45 mu bungu ti mutsamina wa ntangu wazimbakana, mpe rido ya ku mbuka ya santu yatendoka ha kati-kati. 46 Buna Yezu wakawula mu ngolo, mpe watâ: “Tata, ha moko maku nita karisa mpeve’ani.” Bu kamana tâ bo, wafwa.* 47 Bu kamona misamu miatula, mfumu ya binwani yabatika mu kembela Nzambi bu katâ: “Diangana, bakala di wa sungama bêle.” 48 Mpe bantu bakutakana hâna bu bamona misamu miatula, bakâla ku nzo zawu bu beri kwe buri ntulu mu tiari. 49 Mpe bantu babansoni bamuzaba batelama ha titini tia mwa tia tila. Bakento batûka na yandi ku Galile hâna mpe babâ, mpe bamona misamu mio.

50 Mpe tala! kweri na bakala di beri tâka nkumbu Yozefe, mu tribinale ya yinene ya Bayuda kabâ, muntu wa mbote wabâ mpe wa sungama. 51 (Bakala dio ka vota ko mu singasa kani diawu na nsalulu zawu.) Musi-Arimate weri, mumvuka wumosi wa Yude, mpe Timfumu tia Nzambi keri kêlaka. 52 Wayenda ha matu ma Pilate mu lomba mvumbi ya Yezu. 53 Wakôkesa yo, wazinga yo mu mulele wa line wa toma mpe watûla yo mu mpiema yi batima mu tari, mu balembo toko tûla muntu. 54 Tilumbu tia Nkubukulu tiabâ, mpe Sabala ka yabâ mala ko mu batika. 55 Kâ bakento batûka na Yezu ku Galile bamulanda, batala mu mpiema mpe bamona mpila yi batûrila mvumbi’andi. 56 Ha manima bakâla mu kubika mananazi na mafuta ma nsunga ya toma. Kâ diangana bahuma mu tilumbu tia Sabala tintwari na ntumunu.