Bisalu bia Bantumwa
16 Buna watula ku Derbe na ku Listre. Mulongoki wumosi weri kûna wu beri tâka nkumbu Timote. Nguri’andi Muyuda wabâ, weri kwikilaka, kâ tata’andi Greke yeri, 2 mpe mpangi za ku Listre na za ku Ikoniume mu mpila ya mbote zeri mu zonzelaka. 3 Paulo wazolo ti Timote kamuturisa. Wamubonga mpe wamuzengesa sutu mu bungu dia Bayuda ba tizunga tio, mu bungu ti babansoni bazaba ti tata’andi Greke yeri. 4 Mu mimvuka mi beri kwe yôkele, nzengolo za bonga bantumwa na bakuluntu ba ku Yerusaleme beri kwe hani kwe bampangi ngatu batumamana zo. 5 Diangana, bimvuka biatatamana mu bâ ngolo mu timinu na mu kula lumbu basiri lumbu.
6 Basabuka mpe Frizi na nsi ya Galate, mu bungu ti mpeve santu ka yabahana nzila ko ya zonzela zu ku tizunga tia Azi. 7 Mpe bu batula ku Misi, badinga mu kwenda ku Bitini, kâ mpeve ya Yezu ka yabahana nzila ko. 8 Buna bayôka pene-pene na Misi mpe bakôka ku Troase. 9 Mu mpimpa Paulo wabaka timona-meso: bakala dimosi dia ku Masedwane diatelama hâna, dieri mu lemberelaka mpe diatâ: “Yôka ku Masedwane mpe tu bakisa.” 10 Buna kwa bu kabaka timona-meso tio, tadinga mu kwenda ku Masedwane, mu bungu ti tabakula ti ni Nzambi watutâ mbila mu ba samunina nsangu za mbote.
11 Buna tûka Troase tasabuka mubu mpe mbala mosi tatula ku Samotrase, kâ tilumbu tialanda tayenda ku Neapolise; 12 takatuka kûna mpe tayenda ku Filipe, mumvuka wumosi wa Rome, wê mumvuka wuyôkele mfunu mu tizunga tia Masedwane. Mwa bilumbu tayôkesa kûna. 13 Mu tilumbu tia Sabala taduka ha mwelo wa mumvuka pene-pene na nto, ku tweri banzaka ti mbuka ya lusambulu yabâ kûna. Tazakala mpe tabatika mu zonza na bakento bakutakana kûna. 14 Mukento wumosi wu beri tâka nkumbu Lidi, wa mumvuka wa Tiatire, weri tekaka binkuti bia mbwaki ya ngolo, mpe weri tisari tia Nzambi, wirikila keri wirikilaka. Mpe Yehova* wazibula mutima’andi ngatu kateka kutu mu misamu mieri tâka Paulo. 15 Yandi na bantu ba mu nzo’andi bu babatusu, watulemberela: “Tala ti lumweni ti wa kwikama ndiena kwe Yehova,* yizeno lwabêla ku nzo’ani.” Mpe watusa tiya mu tambula.
16 Tilumbu timosi bu tweri kwendaka ku mbuka ya lusambulu, tabwabana na tisari timosi tia tikento tieri na mpeve ya mbi, demo yibikulaka misamu mikwiza. Mbongo zazingi keri natinaka mfumu zandi bu keri salaka tisalu tiandi tia bikula misamu mikwiza. 17 Mwana mukento wango watatamana mu tu landa na Paulo bu keri kawulaka: “Babakala eba ngamba zena za Nzambi Yatomo Zangama mpe nzila ya mvukulu bata lu samunina.” 18 Watatamana mu sila bo bilumbu biabingi. Ku nsuka Paulo wafwatika, wabaluka mpe watâ kwe mpeve yango: “Nikutumini mu nkumbu ya Yezu Kristo mu duka mu yandi.” Mpe mu ntangu yo kwa mpeve yango yaduka.
19 Mfumu zandi bu zamona ti tivuvu tiawu tia baka mbongo tiawa, babwila Paulo na Silase mpe babanata ha zandu tii kwe bamfumu. 20 Babanata kwe ntwarisi za mumvuka, mpe batâ: “Babakala eba vwandi diadingi bata tulumuna mu mumvuka’eto. Bayuda bena, 21 mpe bikulu bata samuna bi tulembolo na nswa mu tambula peleko mu sarila, mu bungu ti Bisi-Rome twena.” 22 Pôka dia bantu diabadasukila, mpe ntwarisi za mumvuka bu zamana ba tenda binkuti, zahana ntumunu ti babatwila mu miti. 23 Bu bamana ba hana nkuba, babatûla ku boloko mpe balomba kwe munkengi wa boloko mu tomo ba kengerela. 24 Mu bungu ti ntumunu ni yo kabaka, wabatûla ku mbuka ya hengama ya boloko, mpe wabakanga malu mu mabaya.
25 Kâ mu kati-kati dia mpimpa, Paulo na Silase sambila beri sambilaka mpe Nzambi beri kembelaka mu mikunga. Bantu beri mu boloko bawu beri wâka. 26 Mu ta-pulukusu mutoto wayizi ningana mu ngolo, buna mabandu ma boloko mateketa. Mbala mosi mielo miamiansoni mia boloko miazibuka, mpe misinga mia bantu babansoni miasutuka. 27 Munkengi wa boloko bu wavumbuka mpe bu wamona ti mielo mia boloko miazibuka mieri, wabenda mbele’andi ngatu katihonda, mu bungu ti wabanza ti bantu ba mu boloko badioka. 28 Kâ Paulo wakawula mu ngolo: “Kutisandi bubi mu bungu ti beto bansoni mû twena!” 29 Buna munkengi wa boloko walomba mwinda mpe wakota mu ntinu mu kati, mu bungu ti teketa keri teketa mu bunkuta, wabwa ha matu ma Paulo na Silase. 30 Wabanata ku mbazi mpe watâ: “Batata, nti mfweti sa mu vûka?” 31 Bamutêla: “Kwikila mu Mfumu Yezu, mpe mbo vûka, nge na bantu ba nzo’aku.” 32 Buna bamuzonzela zu dia Yehova* tintwari na bantu babansoni ba mu nzo’andi. 33 Mpimpa yîna kwa wabanata mpe wasukula mputa zawu. Ha manima, yandi na bantu babansoni ba mu nzo’andi babatusu na manzangu mamansoni. 34 Wabanata ku nzo’andi, wabayirikila meza, mpe watomo yangalala na bantu babansoni ba mu nzo’andi mu bungu ti wabatika mu kwikila mu Nzambi.
35 Bwisi bu bwatia ntwarisi za mumvuka zatambika bapolisie mu tâ: “Yambuleno babakala bo.” 36 Munkengi wa boloko waturisa misamu mi batâ kwe Paulo: “Ntwarisi za mumvuka zitambikiri bantu mu lu yambula beno bole. Buna dukeno mpe yendeno mu tidzunu.” 37 Kâ Paulo wabatêla: “Batuheni nkuba ha meso ma bantu babansoni, beto kabafundisi, beto twe Bisi-Rome, mpe batutûriri ku boloko. Mpe bwawu bu wê nawu batudukisa mu mansweki? Kâni, tukariri! Bizi batudukisa bawu beni.” 38 Bapolisie baturisa nsangu zo kwe ntwarisi za mumvuka. Ntwarisi zo zayizi bâ na bunkuta bu bawâ ti babakala bo Bisi-Rome beri. 39 Buna bayiza mpe babalomba mulemvo, mpe bu bamana ba dukisa, babalomba mu katuka mumvuka wango. 40 Kâ bu baduka ku boloko bayenda ku nzo ya Lidi; mpe bu bamona bampangi, babatindisa mpe bayenda.