Ntsia mpila ntumunu za Nzàmbi zitusarishilaka e?

1. Mubwenabwe beto bantu twe na nsatu lutwalusu e?

M’vangi’eto wutuyokele mu ndwenga. Mbo kena tata dia luzolo, beto kabanzilaka. Mpe, katuwayil’ako ti twatidiatisa beto kaka yandi kwapele. (Yeremi 10:23) Ntsiana kwa mwana fieti mbo kena na nsatu lutwalusu lwa bibuti biandi, beto bansoni lutwalusu lwa Nzàmbi lwe neto nsatu. (Izaya 48:17, 18) Ntumunu za Bibila lutwalusu zituhanaka. diena kabu dia Nzàmbi.​—Tanga 2 Timote 3:16.

Mishiku na ntumunu za Yehova longisa zitatulongisa kabwe tulenda diatishila luzingu lweto bubote mu ntangu yi mpe songila zitatusongila kabwe tulenda bakila m’sendo wa luzingu lwa mvu na mvu mu bilumbu bikwiza. Mbo we ti Nzàmbi watusala, budelakane katutwarisa mpe tufweti mu tonda mu bungu dia lutwalusu lwandi mpe yangalala mishiku na ntumunu zandi.​—Tanga Mikunga 19:7, 11; Nzabukusu 4:11.

2. Ntumunu za Bibila ni ntsi e?

Ntumunu za Bibila zena matsieleka ma nguri. Kâ peleko mishiku mpila ya sà mu diambu dimoshi dizabakane misongilaka. (Lubambu 22:8) Tufweni sarila mayela ma yindula mu zaba kantsia mpila tulenda sarila ntumunu za Bibila mu diambu dimoshi. (Bingana 2:10-12) Mu tifwani, Bibila ebu dilongaka ti luzingu kabu dia Nzàmbi diena. Ntumunu yango ya nguri yilenda tutwarisa ku salu, ku nzo, na mbo tukwezebeke. Tsilenda tusarisa mu bonga nkubukulu ngati twalombo sa luzingu lweto peleko lwa bakaka mu mpashi.​—Tanga Bisalu 17:28.

3. Ntsia ntumunu zole ziyokele mfunu e?

Yezu wazonzila ntumunu zole ziyokele mfunu. Yantete nsasa ya luzingu lwa muntu yitasongila​—ni mu zaba Nzàmbi, mu muzolo mpe mu musarila na kwikama kwansoni. Tufweni tarilaka ntumunu yô mu nzengolo zeto zazansoni. (Bingana 3:6) Bô badiatishilaka luzingu lwawu mu ntumunu yô, mbo baba ndiku za Nzàmbi, mbo babaka kiese kia nkatika tsiawu, mpe luzingu lwa mankululu.​—Tanga Matie 22:36-38.

Ntumunu yam’zole sarisa yitusarisaka mu ba na tsiwisa tsiatibote na bampwaneto. (1 Bisi-Korente 13:4-7) Mu sarila ntumunu yô tufweni kopa mpila Nzàmbi yikabelaka na bantu.​—Tanga Matie 7:12; 22:39, 40.

4. Ntsia mpila ntumunu za Bibila zitusarishilaka e?

Ntumunu za Bibila makanda zilongaka kabwe luzolo lulenda sa ti baba na tsiwisa. (Bisi-Kolose 3:12-14) Ntumunu yakaka ya nguri Zu dia Nzàmbi dilongaka yitaninaka mpe makanda​—ti makwela mafweni bà ma mankululu.​—Tanga Mbatukulu 2:24.

Twamana landa misamu milongaka Bibila mbo mitusarisa mu mio mitatarila lubaku lwa bima bia tsinsuni, mpe mbo mitukeba mu lombo lungusu mu mabanza. Bushiri mfumu za bisalu ebu bamonaka ti bubote bwingi babongele mu salu bisari bio bilandaka ntumunu za Bibila mu luzingu lwawu, tsiana mu mio mitatarila buderede na ngolo mu tsisalu. (Bingana 10:4, 26; Bahebre 13:18) Bibila longisa mpe ditatulongisa mu yangalala mu kantso bio bitubakiri bifwanakane mu luzingu lweto mpe mu mona ti tsindiku tsieto na Nzàmbi tsiyokele bima bia nza.​—Tanga Matie 6:24, 25, 33; 1 Timote 6:8-10.

Twamana landa ntumunu za Nzàmbi, zilenda tanina tsikolela tsieto. (Bingana 14:30; 22:24, 25) Mu tsifwani, Mushiku wa Bibila wuyiminaka mu kolo malavu tamana watumamana mbo wututanina mu bimbevo binataka ku lufwa na mu mpashi za tâpulukusu. (Bingana 23:20) Yehova wutuheni luve lwa nwa malavu kâ katuyokisa’andi ndilu. (Mikunga 104:15; 1 Bisi-Korente 6:10) Ntumunu za Nzàmbi mambote zitunatinaka mu bungu longa zitulongaka mu tsikeba ka mu ndiatulu zeto’ako kwa kâ mpe na mu mbanzulu zeto. (Mikunga 119:97-100) Kâ ni wubela bo, bakristo batsieleka mbo bajitisaka mishiku mia Nzàmbi ka mu bungu dia mambote ma bawu beni’ako kwa. Tala mia bajitisaka ni mu hana Yehova lukumu.​—Tanga Matie 5:14-16.