Timangu ku Mubu wa Mbwaki

Buna kwa Farao bu kawâ ti bala ba Israele bakatuka ku Ezipte, wasoba mabanza. Yandi walomba kwe binwani biandi: ‘Kubikeno bipusu biani biabiansoni, mpe tabalandeno! Ka wafwanane’â ko tababika benda.’ Yandi na bantu bandi babatika mu lenda bala ba Israele.

Yehova watwarisa kanda diandi bu kasarila tuti mu mwini na tiya mu mpimpa. Yandi wabanata ku Mubu wa Mbwaki, mpe wabalomba mu bâ kûna.

Bala ba Israele bamona Farao na binwani biandi beri ba landaka. Bawu babandakana ha kati dia binwani bia Ezipte na Mubu wa Mbwaki. Buna bawu bakawula kwe Mose: ‘Mbo tufwa! Wafwanane watubika kweto ku Ezipte.’ Kâ Mose watâ: ‘Ka lubândi na bunkuta. Kêleno, mpe moneno bwe Yehova kaluvukisila.’ Diangana, Mose nkatika lukwikulu lwabâ nandi mu Yehova.

Yehova walomba kwe bala ba Israele mu kwenda. Mpimpa yîna, Yehova wanata tuti, mpe watûla dio ha kati dia Bisi-Ezipte na bala ba Israele. Ku lweka lwa Bisi-Ezipte, buyongongo bwabâ kô. Kâ ku lweka lwa bala ba Israele, mutsamina wabâ kô.

Yehova walomba kwe Mose mu lambula koko kwandi ha mubu. Mpe Yehova wanata titembo mpimpa yayansoni. Mubu wakabana, mpe nzila yayilama ha kati. Bala ba Israele ba nkatika babingi badiata ha zulu mutoto wa yuma, ha kati dia bibaka biole bia mamba, mu kwenda ku simu diakaka dia mubu.

Binwani bia Farao bialanda bala ba Israele ha kati dia mubu. Ha manima Yehova wakotesa vwandi kwe binwani bia Bisi-Ezipte. Mifumba mia bipusu biawu miabatika mu bwa. Binwani biabatika mu kawula: ‘Tadukeno! Yehova bawu kata nwanina.’

Yehova watâ kwe Mose: ‘Lambula koko kwaku ha zulu mubu.’ Mbala mosi, bibaka bia mamba biabwa ha zulu Bisi-Ezipte. Farao na bantu bandi babansoni bafwa. Kani wumosi wavuka.

Ku simu diakaka dia mubu, bantu babîngi babâ kûna Nzambi beri kembelaka mu mukunga: “Tangeno mukunga mu bungu dia Yehova, mu bungu ti yandi tomono zanguka. Balu na tinati tiandi, babalosele mu mubu.” Bantu bu beri tangaka mikunga, bakento tina beri tinaka, mpe ngoma za fioti beri sikaka. Bantu babansoni nsayi yabâ nawu ya bâ ba kûluka.