Ntwenia ziyà za bakala zatumamana Yehova

Nebukadenezare bu kanata mfumu za Yuda ku Babilone, wabatûla mu lutumu lwa Ashpenaze, tisari timosi tia luyâlu. Nebukadenezare watâ kwe Ashpenaze mu baka ha kati diawu ntwenia zayôka bubote mpe zayôka mu mayela. Ntwenia zo mvula zitatu baketi ba kubika. Ndongosolo yo mbo yaketi ba kubika mu bâ bisari bia mfunu bia luyâlu lwa Babilone. Ntwenia zafweti longoka mu tanga, mu tsoneka na mu zonza zu dia Akkadien dia ku Babilone. Bawu mpe bafweti dia bidia beri diaka mutinu na bisari bia luyâlu. Ntwenia zo za ziyà ni Daniele, Hanania, Mishaele na Azaria. Ashpenaze wabahana nkumbu za môna za ku Babilone: Belsazare, Shadrake, Meshake na Abede-nego. Ngano ndongosolo yo mbo yaketi ba tuma mu bîka mu sarila Yehova?

Ntwenia zo za ziyà za kubama zabâ mu tatamana mu sarila Yehova. Bawu bazaba ti ka bafweti’â dia bidia bia mutinu ko mu bungu ti Musiku wa Yehova watâ ti bima biakaka ka biabâ bia verela ko. Buna batâ kwe Ashpenaze: ‘Mulemvo’aku, kutuhanandi bidia bia mutinu.’ Ashpenaze wabatêla: ‘Tala ti ka ludiri’â ko mpe mutinu lu mweni ba lembama, mbo kakungonda!’

Daniele watâ mabanza mandi. Yandi watâ kwe muntu weri ba kêlaka: ‘Tu haneno kwa ndunda na mamba bilumbu 10. Buna mbo lwatufwanakasa na ntwenia zakaka zidia bidia bia mutinu.’ Muntu wo watambula.

Ha manima ma bilumbu 10, Daniele na ndiku zandi za zitatu, tikolela tibote tiabâ nawu yôka ntwenia zakaka. Yehova wayangalala mu bungu ti bawu batumama. Yehova wahana mpe kwe Daniele ndwenga za bakula bimona-meso na ndozi.

Ndongosolo bu yawa, Ashpenaze wanata ntwenia zo kwe Nebukadenezare. Mutinu wazonza na bawu mpe wamona ti Daniele, Hanania, Mishaele na Azaria mayela mingi mabâ nawu mpe bunsungu bwingi bwabâ nawu yôka ntwenia zazansoni zakaka. Mutinu wasola ntwenia zo za ziyà mu bâ bisari bia luyâlu lwa Babilone. Malongi keri vulu ba lombaka mu misamu mia mfunu. Yehova wabahana ndwenga zazingi yôka bantu ba ndwenga na nganga za mutinu.

Ni bu sa ti mu nsi ya nzenza babâ, Daniele, Hanania, Mishaele na Azaria ka bazimbakana ko ti mu kanda dia Yehova babâ. Ngano mbo bambukila Yehova ntangu zazansoni ni bu sa ti bibuti biaku ka biena na nge ko?