Elizabete butiri mwana

Mvula yôka 400, bu bamana tunga bibaka bia Yerusaleme, nganga-nzambi yimosi yi beri tâka nkumbu Zakari na mukento’andi Elizabete, beri bâka penepene na hata dio. Bawu bakwelana tûka mvula zazingi, kâ ka babâ na mwana ko. Tilumbu timosi, Zakari bu keri yokaka encens mu mbuka ya santu ya Tempelo, Gabriele, mbazi ya Nzambi, wamumonekena. Zakari wayizi bâ na bunkuta. Kâ Gabriele wamutêla: ‘Kubândi na bunkuta. Nsangu za mbote zitûkiri kwe Yehova nikunatinini. Mukento’aku Elizabete, mbo kabuta mwana mpe fweti mu tâ nkumbu Za. Yehova ni yandi kasolele mu bungu dia tisalu timosi tia nzitukulu.’ Zakari wayula: ‘Bwe ndendi ku kwikila? Mukento’ani na meno, bununu bwingi bwe neto mu buta mwana.’ Gabriele watâ: ‘Nzambi kuntambikiri mu ku hana nsangu zo. Kâ mu bungu ti ku ta kwikila ko, kuvutu’â zonza ko tii bu butuka mwana wo.’

Zakari wavutu bâ mu mbuka ya santu ntangu ya mwa yayingi. Ha manima bu kadûka, bantu ni yandi beri kêlaka ku mbazi mu zaba ntia musamu wayôka. Zakari keri’â lendaka ko mu zonza. Moko kwa keri ningasaka. Buna, bantu babakula ti Zakari nsangu za Nzambi kabaka.

Ha manima, Elizabete wabaka zimi mpe wabuta mwana wa bakala, ntiana bwa tâ mbazi. Ndiku zandi na kanda diandi bayiza mu tala mwana. Nsayi yayingi yabâ nawu mu bungu dia yandi. Elizabete watâ: ‘Nkumbu’andi Za.’ Bawu batâ: ‘Ka kwena muntu ko wu batâka nkumbu Za mu kanda dieno. Mu tâ nkumbu Zakari, ntiana tata’andi.’ Kâ Zakari watsoneka: ‘Nkumbu’andi Za.’ Hô nkatika bendo, Zakari walenda mu vutu zonza! Nsangu za mwana wo zayangana mu tizunga tiatiansoni tia Yude, mpe bantu batiyula: ‘Ngano mwana wo bwe wubâ?’

Buna Zakari wafuluka mu mpeve santu. Yandi wabatika mu bikula: ‘Bîka Yehova kakemboso. Yandi wakanisina kwe Abrahame ti mbo kaketi tambika m’vûkisi, Masiya, mu tu vûkisa. Za mbo kabâ mbikuri, mpe mbo kakubika nzila mu bungu dia Masiya.’

Musamu wa nzitukulu mpe watûrila Maria, weri mu kanda dia Elizabete. Mbo tumona musamu wo mu timoko tita landa.