Yezu longese mpila ya sambirila kwe milongoki miandi

Misamu miamiansoni mieri yirikaka Bafarize ni mu susumuna bantu. Misamu mia mbote beri yirikaka ngatu bantu bakaka bamona mio. Mu mbuka za bantu babansoni beri sambirilaka ngatu bantu babamona. Bafarize tusambulu twa tula beri lundaka mu mutu, mpe mu sinagoge zawu beri twa kârilaka na mu ndeko nzila, mu baketi ba wîla kwe bantu bakaka. Buna bantu bayituku Yezu bu kabatêla: ‘Ka lusambilakandi ntiana Bafarize. Bawu babanzaka ti mbo batâ Nzambi nsayi mu bungu ti misamu miamingi batâka, kâ Nzambi ka yangalalaka ko. Lusambulu musamu wena wa nge na Yehova. Ku kârilakandi misamu mimosi mu tusambulu twaku. Yehova zololo ti wamutêlaka misamu mi monaka mu nsi’a mutima.

‘Taleno mpila yi lufweti sambirila: “Tata’eto die ku mazulu, bîka nkumbu’aku yabâ ya santu. Bîka Timfumu tiaku tiza, bîka luzolo lwaku lungana ku zulu na ha mutoto.”’ Yezu wabatêla mpe ti bafweti sambila mu bungu dia bidia biawu bia tilumbu, mu bungu dia mulemvo wa masumu mawu na mu bungu dia misamu miawu miakaka.

Yezu watâ: ‘Ka lubîkandi mu sambila. Tatamaneno mu lomba bima bia mbote kwe Tata’eno Yehova. Tibuti tizololo mu hanaka bima bia mbote kwe mwana’andi. Tala ti mwana’aku wukulombele dimpa, ngano mbo mu hana tari? Tala ti wukulombele mbizi, ngano mbo mu hana nioka?’

Ha manima Yezu wahana malongi: ‘Tala ti luzebi hana bima bia mbote kwe bala beno, diangana Tata’eno, Yehova, mbo kaluhana mpeve santu. Buna tima ti lufweti sa ni mu lomba.’ Ngano mbo landa malongi ma Yezu’? Ntia misamu sambirilaka?