Piere têle ti ka zebi’â Yezu ko

Yezu bu kabâ na ntumwa zandi mu nzo yabâ mu zulu, yandi wabatêla: ‘Beno bansoni mbo lukundiambirika nkokela yi.’ Piere watâ: ‘Meno kâni! Ni bu sa ti babansoni bakubîkiri, kani kabwe, meno a nikubîka ko.’ Kâ Yezu watâ kwe Piere: ‘Ntete nsusu yakuba, mbala zitatu mbo tâ ti kunzebi’â ko.’

Binwani bu bianata Yezu ku nzo ya Kayife, ntumwa zazîngi zadioka. Kâ bole ha kati diawu balanda bantu bakanga Yezu. Piere ni wumosi mu bawu. Yandi wakota ku lupangu lwa Kayife, mpe ni keri yetelaka ha ndeko tiya. Mu mutsamina wa tiya, tisari timosi tia tikento tiabambukila tidiri tia Piere, mpe tiatâ: ‘Nge nzebi! Na Yezu wabêle!’

Piere watâ: ‘Kâni. Ka nabêle’â na yandi ko! Ka nzebi’â musamu wuta zonzela ko!’ Piere wayenda penepene na mwelo. Kâ, tisari tiakaka tia tikento tiamumona, mpe tiatâ kwe bantu: ‘Muntu wu na Yezu kabêle!’ Piere watâ: ‘Ka nzebi’â Yezu ko, kani fioti!’ Bakala dimosi diatâ: ‘Nge mpe na bawu wabêle! Mpila yi ta zonzela yisongele ti nge Musi-Galile wena, ntiana Yezu.’ Kâ, Piere wadia ndefi: ‘Ka nimuzebi’â ko!’

Buna, nsusu yakuba. Piere wamona Yezu wabaluka mu mu tala. Yandi wabambuka misamu mia mu têla Yezu, mpe wadûka mu bidilu bia ngolo.

Sanedre yakutakana mu fundisa Yezu ku kati dia nzo ya Kayife. Bawu babonga nzengolo ya honda Yezu, kâ musamu beri mu dingilaka mu singasa nzengolo’awu. Kâ, bawu ka babaka musamu ko kwe Yezu. Ha manima, Kayife wayula Yezu: ‘Ngano nge ni Mwana wa Nzambi?’ Yezu watâ: ‘Ni meno.’ Kayife watâ: ‘Ka twena na nsatu bidimbu biakaka ko. Mvwezolo yena!’ Tribinale yatâ: ‘Muntu wu wufweti fwa.’ Bawu bawinda mbata kwe Yezu, bamulobolela mante, mpe bamuwinda tima, bu batâ: ‘Tala ti nge mbikuri yena, tu têla nani ku windiri tima!’

Bwisi bu bwatia, bawu banata Yezu mu nzo ya Sanedre, bavutu mu yula: ‘Ngano nge ni Mwana wa Nzambi?’ Yezu wavutula: ‘Beno beni lutêle wo ti ni meno.’ Ha manima, bawu bamuzengela mambu ti Nzambi kavweza, mpe bamunata ku nzo ya timfumu ya Ponse Pilate, guvernere ya sola Bisi-Rome. Nti biayôka ha manima? Tadzukuleno wo.