Ka kwa bâ tima ko tiaketi ba kabakasa

Bakala dimosi diabâ na malu ma fwa mpe diazakala ha mwelo wa Tempelo dieri lombaka bima bilumbu biabiansoni. Tilumbu timosi ha manima ma midi, yandi wamona Piere na Za beri kotaka ku Tempelo. Yandi wabatêla: ‘Mulemvo’eno kunganeno tima.’ Piere wamutêla: ‘Tima tie nani ti ndendi ku hana tiyôkele mbongo. Mu nkumbu ya Yezu, telama mpe yenda!’ Buna Piere wamubakisa mu telama, mpe muntu wo wabatika mu kwe yende! Bantu bayangalala mu bungu dia timangu tio mpe babingi bayizi kwikila mu nsangu za mbote.

Kâ nganga-nzambi na Saduseye zatomo baka nkesi. Bawu babwila ntumwa za Yezu, babanata ku tribinale, mpe babayula: ‘Nani luheni lenda dia wasisa muntu wo?’ Piere watâ: ‘Yezu Kristo wu lwahondele, ni yandi watuheni lenda.’ Mfumu za mabundu zatâ mu ngolo: ‘Bîkeno mu zonzela Yezu!’ Kâ ntumwa zatâ: ‘Tufweti zonzela Yezu; mpe ka tubîka ko.’

Buna kwa bu bayambula Piere na Za, baye monekena milongoki miakaka mpe babatêla misamu miayôka. Bawu basambila, mpe balomba kwe Yehova: ‘Tu bakisa mu bâ na butindi ngatu tatatamana mu tisalu tiaku.’ Yehova wabahana mpeve santu, mpe batatamana mu samuna na mu wasisa bimbevo. Bantu ba nkatika babingi beri kwikilaka mu nsangu za mbote. Basaduseye bayizi bâ na timbanda mu ntumwa za Yezu, bakanga zo mpe batûla zo ku boloko. Kâ mu mpimpa, Yehova watambika mbazi yazibula mielo mia boloko, mpe yatâ kwe ntumwa za Yezu: ‘Kâleno ku Tempelo, mpe longeseno bantu.’

Mu pari tialanda, Sanedre, tribinale ya mfumu za mabundu, yabaka nsangu: ‘Boloko dia kangama diena, kâ bantu ba lwakengi badûkiri! Mu kati dia Tempelo bêna, mpe bantu bata longesa’. Buna, bawu bavutu kanga ntumwa za Yezu, mpe banata zo ku Sanedre. Mfumu-nganga-nzambi watâ: ‘Beno talombele mu lembo zonzela Yezu!’ Kâ Piere watâ: “Tufweti tumamana Nzambi bu ke Mfumu, kani tatumamana bantu.”

Mfumu za mabundu zatomo baka nkesi, ni zadinga mu honda ntumwa za Yezu. Kâ, Farize yimosi yi beri tâka nkumbu Gamaliele watelama mpe watâ: ‘Seno keba! Nzambi lendi bâ na bantu bo. Ngano luzololo lwanwana na Nzambi?’ Bawu balanda malongi ma Gamaliele. Bu bamana winda bisikoti kwe ntumwa za Yezu, bawu bavutu ba lomba mu bîka mu samuna, mpe bababîka benda. Kâ musamu wo ka wakabakasa ntumwa za Yezu ko. Bawu batatamana mu samuna nsangu za mbote na butindi ku Tempelo na mu nzo na nzo.