Bukristo buyalangane mu makanda mamingi

Ntumwa zatumamana ntumunu ya Yezu ya yangasa nsangu za mbote mu mutoto wawansoni. Mu muvu wa 47 M.B., mpangi za ku Antiose zatambika Paulo na Barnabase mu nzietolo ya tisalu tia samuna. Bisamuni bio bia biole biabâ na luhemo biasa nzietolo mu tizunga tiatiansoni tia Azi, mu mahata ntiana Derbe, Listre na Ikoniome.

Paulo na Barnabase basamuna kwe bantu babansoni, bamputu na bamvwama, ntwenia na bibunda. Bantu babingi balongoka matieleka mitariri Kristo. Paulo na Barnabase bu basamuna kwe Sergiuse Poluse, guvernere ya Sipre, nganga yimosi yayêla mu ba kabakasa. Paulo watâ kwe nganga yo: ‘Yehova nge kata telamana.’ Hô nkatika bendo, nganga yo ya fwa meso. Sergiuse Poluse, guvernere, bu kamona misamu mio, wakwikila mu nsangu za mbote.

Paulo na Barnabase basamuna mu mbuka zazansoni, mu nzo na nzo, ku mazandu, mu nzila na mu sinagoge. Bu bawasisa muntu wumosi wa fwa malu ku Listre, bô babansoni bamona timangu tio babanza ti bawu nzambi zabâ, mpe bayêla mu ba sambila. Kâ, Paulo na Barnabase babayimina bu batâ: ‘Sambileno Nzambi! Beto bantu kwa twena.’ Buna Bayuda bayiza, ni batuma bantu bo mu telamana Paulo. Bantu bo bawinda Paulo matari, bamudûkisa ku hata dio bu beri banzaka ti wa fwa. Kâ Paulo wa moyo kwa wabâ! Bampangi bayizi mu bakisa mu ntinu mpe bamunata mu mumvuka. Ha manima, Paulo wakâla ku Antiose.

Mu muvu wa 49 M.B., Paulo wavutu sa nzietolo yakaka. Bu kakâla mu kwe tala bampangi ku tizunga tia Azi, yandi wanata nsangu za mbote mala ku Europe. Yandi wayenda ku Atene, ku Efeze, ku Filipe, ku Tesalonike na mu mbuka zakaka. Silase, Like na ntwenia yimosi yi beri tâka nkumbu Timote bayenda na Paulo mu nzietolo. Bawu basala ha timosi mu yirika bimvuka na mu bakisa bio mu bâ ngolo. Paulo wasâla ku Korente mvula yimosi na ndambu mu tindisa mpangi zabâ kûna. Yandi wasamuna, walongesa mpe watsoneka mikanda kwe bimvuka biabingi. Paulo tisari tia bivula mpe tiabâ. Ha manima, Paulo wakâla ku Antiose.

Mu 52 M.B., Paulo wasa nzietolo ya ntatu yabatikila ku tizunga tia Azi. Yandi wayenda mala ku nore, yôka Filipe, mpe wakoka ku Korente. Paulo wayôkesa mvula zazingi ku Efeze mu longesa, mu wasisa mbevo na mu bakisa timvuka. Yandi wasa mpe binzonzi ha meso ma bantu babansoni, bilumbu biabiansoni, mu nzo ya lukutakanu ya lukolo lumosi. Bantu babingi beri wâka, mpe basoba ndiatulu. Bu kamana samuna nsangu za mbote mu nsi zazingi, Paulo wayenda ku Yerusaleme.