Mubungu diantsi batutaka nkumbu Mbangi za Yehova e?

Nzanda bantu babanzaka ti Mbangi za Yehova yena nkumbu ya dibundu dimoshi dia mona. Kâ mvula 2 700 ziyokele, Nzàmbi ya tsieleka wahana bisari biandi nkumbu “mbangi.” (Izaya 43:10-12) Tii mu mvula ya 1931, nkumbu Banlongoki ba Bibila beri tutaka. Mubungu diantsi twabongela nkumbu ya Mbangi za Yehova e?

Nkumbu yo yisongele nani we Nzàmbi’eto. Mu tala mikanda mia ntama, nkumbu ya Nzàmbi, Yehova, yatsonamane ntsa mafunda mu Bibila. Mu poka dia Mabibila, nkumbu yo yâ bayingasa mu nkumbu za buzitu, ntsiana Mfumu peleko Nzàmbi. Kâ, Nzàmbi ya tsieleka watsizabikisa kwe Moyize mu nkatika nkumbu’andi, Yehova, ti: “Yi ni nkumbu’ani ya ntangu zazansoni.” (Ndukulu 3:15) Ni ho katiswasikisa na nzàmbi za bungungu. Ntsiangu twe na nsayi yi yokele mu lwata nkumbu yi ya nlongo ya Nzàmbi.

Nkumbu yo salu tieto yisongelaka. Tuka mu mbandu ya ntama, m’longa wa mula wa bantu bakwikama ntsiana Abele, batà kimbangi tsia tsiminu tsiawu mu Yehova. Ha manima, Nowa, Abrahame, Sara, Moyize, Davidi, mpe bakaka bayiziyikama mu m’longa wa ‘tuti diango dia dinene dia Mbangi’ za Yehova. (Bahebre 11:4–12:1) Bubwanaka muntu ta tà kimbangi tsia muntu wu lombolo zaba diambu ku tribinale, beto mpe tabi tazabikisa matsieleka matariri Nzàmbi’eto.

Tsifwani tsia Yezu tulandaka. Bibila mu tele nkumbu “mbangi ya kwikama na ya tsieleka.” (Nzabukusu 3:14) Yezu yandi beni tele ti ‘nkumbu Nzàmbi yâ kazabikisa’ mpe ‘watatamana mu ta kimbangi mu matsieleka’ mu bungu dia Nzàmbi. (Za 17:26; 18:37) Ntsiangu milongoki mia tsieleka mia Kristo bafweti lwata nkumbu ya Yehova mpe bafweti ya zabikisa. Ntsiangu Mbangi za Yehova zisarilaka ngolo mu diambu dio.

• Mubungu ndiantsi milongoki mia Bibila babonga nkumbu ya Mbangi za Yehova e?

• Ngâna tuka ntangu kwa Yehova ke na Mbangi ha m’toto ntsi e?

• Ntsia Mbangi ya Yehova yiyokele Mbangi zazansoni za Yehova e?