Yakobe na Ezawu bawisane

Yehova wakanisina Yakobe ti mbo kaketi mu kengerela, ntiana bu kakengerela Abrahame na Izake. Yakobe waye bâ ku Harane, ku kakwelela mukento. Yandi wayizi bâ na kanda dia dinene, mpe wayizi bâ mvwama.

Ha manima, Yehova watâ kwe Yakobe: ‘Kâla ku nsi’aku.’ Buna Yakobe na kanda diandi babatika mu sa nzietolo ya yila mu kâla. Mu nzila, bisari biandi biakaka biamutêla: ‘Mpangi’aku Ezawu kwe nge kata kwiza na bantu 400!’ Yakobe bunkuta bwabâ nandi ti Ezawu kamuyirika musamu wa mbi, yandi na kanda diandi. Yakobe wasambila Yehova: ‘Mulemvo’aku, kumvukisa mu mpangi’ani.’ Tilumbu tialanda, Yakobe watambika makabu kwe Ezawu; wamuhana bindongo, nkombo za nkento, ngombe za nkento, shamo na mabuluku.

Mpimpa yîna, Yakobe bu kabâ yandi kaka, wamona mbazi yimosi! Mbazi yango yanwana na yandi, mpe banwana tii mu pari. Yakobe walwala, kâ ka bika ko. Ha manima, mbazi yamutêla: ‘Kumbika ndienda.’ Kâ Yakobe watâ: ‘Kâni, toko kunsakumuna.’

Mbazi yasakumuna Yakobe. Buna yandi wabakula ti Yehova ka bika ko ti Ezawu kamusa bubi.

Mu pari tio, Yakobe wamona mpangi’andi yeri kwizaka mala na bantu 400. Yakobe wayôka ku matu ma kanda diandi diadiansoni, mpe bu kapusana ha matu ma mpangi’andi, wakondama mbala 7. Ezawu wadioka kwe Yakobe mpe wamubumba. Mpangi za zole zabatika mu dila, mpe bawisana. Bwe ta banza? Bwe Yehova kamona ku mutima mu mpila Yakobe yi kayirikila musamu wo?

Ha manima, Ezawu wayenda ku nzo’andi mpe Yakobe watatamana mu nzila’andi. Yakobe bala 12 ba babakala babâ nandi: Ribene, Simeone, Levi, Yuda, Dane, Neftali, Gade, Asere, Izakare, Zebulone, Yozefe na Benyamine. Mosi mu bawu—Yozefe—Yehova wamusarila mu vukisa kanda diandi. Ngano zebi bwe? Mbo tumona wo mu binsamu bita landa.