Tabernakle mu bungu dia nsambululu

Mose bu kabâ ku mongo wa Sinayi, Yehova wamulomba mu yirika tivula ti baketi mu sambirila. Lenda diabâ nawu dia nata tio kûma ni kûma ku baketi kwenda. Tivula tiango batâ tio nkumbu tabernakle.

Yehova watâ kwe Mose: ‘Lomba kwe bala ba Israele mu hana bio biabiansoni bi balenda mu bungu dia ntungulu ya tabernakle.’ Bala ba Israele bahana ore, arza, kwivre, matari ma ntalu, milunga miawu na binzembele. Bawu bahana mpe milele mia lene na mia line, mikanda mia bibulu na bima biakaka biabingi. Bawu bima bingi kwa bahana, Mose ni kabatêla: ‘Bima bingi luheni! Ka luvutuandi hana; bifweni.’

Bantu babîngi babâ na lenda, bahana lubakusu mu tisalu tia ntungulu ya tabernakle. Yehova wavutu tomo ba hana lenda mu tisalu. Bawu bafweti sala misinga na milele, mpe bafweti tunga milele miango. Bawu bafweti sala mpe matari, ore, mpe bafweti hala miti.

Bala ba Israele batunga tabernakle buna bwa ba têla Yehova. Bawu bayizi yirika rido ya toma yeri kabaka mbuka za zole za mu kati dia tabernakle: mbuka ya santu na mbuka yiyôkele ya santu. Mu mbuka yiyôkele ya santu nkela yabâ mô ya mu miti mia acacia na ore, mpe nkela ya luwawanu beri ya tâka. Mu mbuka ya santu titûlulu tia minda tia ore tiabâ mô, meza na ziku mu bungu dia encens. Ku lupangu, ndonga yabâ kô ya kwivre na ziku dia dinene. Nkela ya luwawanu bala ba Israele yeri bambulaka ti kani basa kwe Yehova dia mu tumamana. Ngano zebi luwawanu ni nti? Kani diena dia nzitukulu.

Yehova wasola Arone na bala bandi mu bâ nganga-nzambi ku tabernakle. Bawu bafweti kipa tabernakle mpe bafweti hanaka mikayulu mu bungu dia Yehova. Arone kwa, mfumu-nganga-nzambi, wabâ na nswa wa kota mu mbuka yiyôkele ya santu. Mbala yimosi kwa keri mwa kotaka mu muvu, mu hana mukayulu mu bungu dia masumu: masumu ma kanda diandi na masumu dia kanda diadiansoni dia Israele.

Bala ba Israele bamanisa tabernakle mvula yimosi ha manima ma ndukulu’awu ku Ezipte. Dieka bo, bawu bayizi bâ na mbuka ya sambila Yehova.

Yehova wasongela ti nsayi yabâ nandi mu bungu dia tabernakle mpe wadûkisa tuti ha zulu. Tuti bu dieri tensamaka ha zulu tabernakle, bala ba Israele ka beri’â sobaka mbuka ko, ni hô kwa beri bâka. Kâ tuti bu dieri nangukaka, bawu beri bakulaka ti bafweti kwenda. Buna tabernakle beri vulaka mpe tuti dio beri landaka.