Gideone nungini Bisi-Madiane

Kanda dia Israele diavutu bîka Yehova mu sambila nzambi za bungungu. Mvula 7 za mukaka, Bisi-Madiane balaba bibulu bia bala ba Israele, mpe bamwangasa bima bi bakuna. Mu dioka Bisi-Madiane, bala ba Israele baye swama mu mabulu ma matari na ku miongo. Bawu balomba kwe Yehova kabavûkisa. Buna Yehova watambika mbazi kwe ntwenia yi beri tâka nkumbu Gideone. Mbazi yamutêla: ‘Yehova nge kasolele mu bâ tinwani tia ngolo.’ Gideone wayula: ‘Bwe ndendi vûkisila Israele, meno muntu wa mpamba?’

Bwe Gideone kaketi zabila ti Yehova wamusola? Yandi watûla titenda tia lene ha mutoto mpe watâ kwe Yehova: ‘Mu pari, tala ti titenda tia lene tibolele mu tinoko, kâ mutoto wubêle wa yuma, mbo nizaba ti Nge zololo navûkisa Israele.’ Mu pari tialanda, titenda tia lene tiabola mu tinoko, kâ mutoto wa yuma wabâ! Gideone walomba ti mu pari tiakaka tiaketi landa, titenda tia lene tiabâ tia yuma, mpe mutoto wabâ wa bola mu tinoko. Musamu wo bu wayilama, Gideone wabakula ti Yehova wamusola. Yandi wakutakasa bantu mu nwanisa Bisi-Madiane.

Yehova watâ kwe Gideone: ‘Mbo ninungisa bala ba Israele. Kâ, mu bungu ti binwani biabingi bie neno, lulendi banza ti mu ngolo za beno beni lunungini. Buna, tâ kwe bô bê na bunkuta bakâla ku nzo.’ Binwani 22000 biakâla ku nzo, mpe 10000 basâla. Yehova watâ: ‘Binwani biabingi biatiri. Ba nata ha ndeko mamba, mpe ba têla banwa mamba. Lunda kwa bô banwa mamba bu bakwe tari ku kwizila mbeni zawu.’ Bantu 300 kwa basâla, babâ na meso ma tia bu beri nwaka mamba. Yehova wakanisina ti bantu bô mbo baketi nunga binwani 135000 bia Bisi-Madiane.

Mu mpimpa yîna, Yehova watâ kwe Gideone: ‘Bwawu bu ni ntangu yi lufweti nwanisa Bisi-Madiane!’ Gideone wahana mampoka kwe bantu bandi, binzu bia binene na bisisi bia tiya mu kati. Yandi wabatêla: ‘Kuntaleno, mpe seno ntiana meno.’ Gideone wasika mpungi, wabula tinzu tiandi, waningasa tisisi tiandi tia tiya mpe wakawula: ‘Mbele ya Yehova na ya Gideone!’ Bantu 300 babansoni mpe ni bo basa. Bisi-Madiane babaka bunkuta, mpe babatika mu dioka mu nzila zazansoni. Mu vwandi dio, babatika mu hondasana bawu na bawu. Yehova wavutu bakisa bala ba Israele mu nunga mbeni zawu.