Yehova wahana ngolo kwe Samsone

Bala ba Israele babingi bakârila mu sambila biteki. Buna Yehova wabîka Bisi-Filisti bayâla nsi’awu. Kâ, bala ba Israele babâ kô beri zoloko Yehova. Manoa ni wumosi mu bawu. Yandi na mukento’andi, ka babâ na bala ko. Tilumbu timosi, Yehova watambika mbazi yimosi kwe mukento wa Manoa. Mbazi yamutêla: ‘Mbo buta mwana wa bakala. Yandi mbo kakûla Israele mu Bisi-Filisti. Nazire kabâ.’ Ngano Banazire banani babâ? Bisari bia nzitukulu bia Yehova biabâ. Banazire ka bafweti’â zenga nsuki zawu ko.

Ha manima, mwana wa Manoa wabutuka, mpe bamuhana nkumbu ya Samsone. Samsone bu kayizi kula, Yehova wamuhana ngolo zazingi. Lenda dia bâ nandi dia honda ngo-mbulu mu moko. Tilumbu timosi, Samsone wahonda Bisi-Filisti 30 yandi kaka. Bisi-Filisti yandi beri yinaka, mpe bweso beri dingaka bwa mu honda. Mpimpa yimosi, Samsone bu kabâ ku tolo, ku Gaza, Bisi-Filisti bayenda ha mwelo wa hata, mpe bamukêla ngatu bamuhonda mu pari. Kâ mu kati-kati dia mpimpa, Samsone wavumbuka, wayenda ha mwelo wa hata, mpe wakatula wo mu tibaka. Yandi wanata mwelo ha mahembo tii ku zulu mongo wumosi, penepene na Hebrone!

Ha manima, Bisi-Filisti bayiza kwe makangu ma Samsone, Dalila, mpe batâ: ‘Mbo tukufuta mafunda ma mipata mia arza tala ti dingiri mu zaba mu bungu dia nti Samsone ke na ngolo zazingi. Tuzololo tamubwila mpe tamutûla ku boloko.’ Mu bungu ti Dalila mbongo za bâ nandi nsatu, watambula. Ku mbatukulu, Samsone wakala mu mu têla mu bungu dia nti kabêla na ngolo zazingi. Kâ Dalila wamusa tiya tii bu kamutêla mu bungu dia nti kabêla na ngolo zazingi. Samsone wamutêla: ‘Nsuki zani ka beka’eti za zenga ko mu bungu ti Nazire ndiena. Tala ti bakunzengele nsuki, ka nivutu’â bâ na ngolo ko.’ Samsone musamu wa mbi kayirika bu katâ musamu wo kwe Dalila.

Mbala mosi, Dalila watâ kwe Bisi-Filisti: ‘Nsweki’andi ya nzebi!’ Dalila wasekesa Samsone ha makoto mandi, mpe wamuzenga nsuki. Dalila watâ mu ngolo: ‘Samsone, Bisi-Filisti ni kû bena!’ Samsone wavumbuka, mpe ka vutu’â sala na ngolo ko. Bisi-Filisti bamubwila, mpe bamutûla ku boloko.

Tilumbu timosi, mafunda ma Bisi-Filisti bakutakana mu tempelo ya nzambi’awu Dagone, bu beri tâka mu ngolo: ‘Nzambi’eto tu heni Samsone! Dûkiseno Samsone! Tasakaneno fioti na yandi.’ Bawu bamutûla ha kati dia makundi mole, mpe bamusehesela. Samsone watâ mu ngolo: ‘Ô Yehova, mulemvo’aku, vutu kungana ngolo.’ Nsuki za Samsone zavutu kula fioti. Samsone wapusa makundi ma tempelo na ngolo zandi zazansoni. Nzo yayansoni yabwa, mpe bantu babansoni babâ mu kati dia tempelo bafwa, Samsone mpe wafwa.