Butindi bwa Yehoyada

Yezabele mwana wa mukento wabâ nandi wu beri tâka nkumbu Atali; wa mbi wabâ ntiana kwa nguri’andi. Atali mukento wa mutinu wa Yuda wabâ. Ha manima ma lufwa lwa bakala diandi, mwana’andi wabatika mu yâla. Kâ ha manima wa lufwa lwa mwana’andi, Atali yandi beni wabatika mu yâla ku Yuda. Yandi wadinga mu honda kanda diadiansoni dia mutinu; wahonda bantu babansoni baketi bâ mutinu ha tibuka tia yandi, na batekolo bandi mpe. Bantu babansoni yandi beri tînaka.

Mfumu-nganga-nzambi Yehoyada na mukento’andi Yehoseba bazaba ti misamu mieri yirikaka Atali mia nkatika mia mbi miabâ. Bawu batambula mu hombesa luzingu lwawu mu sweka mutekolo wumosi wa Atali, mwana wu beri tâka nkumbu Yehoase. Bawu bamusansa ku Tempelo.

Yehoase bu kayizi bâ na mvula 7, Yehoyada wakutakasa mfumu zazansoni na Balevite mpe wabatêla: ‘Kengereleno mielo mia Tempelo, mpe ka lubîkandi muntu wakota.’ Buna Yehoyada watumba Yehoase mu bâ mutinu wa Yuda mpe watûla mpu ya timfumu ha mutu’andi. Bantu ba ku Yuda ni batâ mu ngolo: ‘Bîka mutinu kabâ na luzingu lwa lula!’

Mutinu Atali wawâ lwaza lwa bantu, mpe wayenda ku Tempelo mu ntinu. Bu kamona mutinu wa môna, yandi watâ: “Bakuntekele! Bakuntekele!” Mfumu zabwila mutinu wô wa mukento wa mbi, bamunata, mpe bamuhonda. Kâ, ngano nti tulendi tâ mu lutumu lwa mbi lu kabâ na lo kwe bantu?

Yehoyada wabakisa kanda dia Israele mu sa luwawanu na Yehova bu basa kani dia sambila kwa Yandi. Yehoyada wamwangasa tempelo za Bale na biteki. Yehoyada wasola banganga-nzambi na Balevite mu salaka ku Tempelo ngatu bavutu sambilaka Yehova kûna. Yandi wasola minkengi mu kêlaka Tempelo ngatu na kani muntu wulembolo wa verela ka wukotandi. Buna, Yehoyada na bamfumu banata Yehoase ku nzo ya timfumu mpe bamuzakasa ha muyâlu. Kanda dia Yuda diatomo yangalala. Lenda diabâ nawu dia sarila Yehova, mu bungu ti bakûluka mu lutumu lwa Atali na lwa nsambululu ya Bale. Ngano mweni bwe butindi bwa Yehoyada bwabakisila bantu babingi?