Yezu dieti ha zulu mamba

Yezu lenda dia bâ nandi dia wasisa mbevo na dia vumbula bantu kwe ba fwa; kâ lenda dia bâ nandi mpe dia zabirila titembo na mvula. Bu kamana sambila ku mongo, Yezu watala ku mubu wa Galile, mpe wamona titembo tia ngolo. Ntumwa zandi mu kati dia bato zabâ, mpe ni zeri nwanaka na titembo. Yezu wakoka, mpe wabatika mu diata ha zulu mamba mu kwenda mu bato. Ntumwa bu zamona muntu weri kwizaka ha zulu mamba, bunkuta bwababaka. Kâ Yezu wabâ têla: ‘Meno ndiena. Ka lubândi na bunkuta.’

Piere watâ: ‘Mfumu, tala ti ni nge wena, kuntêla ndiza kwe nge.’ Yezu watâ kwe Piere: ‘Yiza kwe meno.’ Buna, ha kati dia titembo, Piere wadûka mu bato, mpe wabatika mu diata ha zulu mamba mu kwenda kwe Yezu. Kâ, Piere bu keri pusanaka kwe Yezu, watala titembo mpe bunkuta bwamubaka. Yandi wabatika mu diama. Piere wakawula: ‘Mfumu, kumvûkisa!’ Yezu wamusimba mu koko, mpe wamutêla: ‘Mu bungu dia nti batikiri mu bâ na ntembe? Timinu tiaku kwe tiena?’

Yezu na Piere banaka mu bato, mpe mbala mosi, titembo tiakangama. Ngano lendi banza misamu mia mona ntumwa za Yezu ku mutima? Bawu batâ: “Diangana, nge ni Mwana wa Nzambi.”

Ka mbala yo ya yimosi’â ko kwa Yezu kazabirila titembo. Tilumbu tiakaka, Yezu na ntumwa zandi bu babâ mu bato, ku simu diakaka dia mubu, wasêka ku manima ma bato. Bu kabâ ku tolo, titembo tia ngolo tiatulumuka. Matuma mabatika mu bwa mu bato, mpe bato yafuluka mu mamba. Ntumwa zavumbula Yezu bu zatâ mu ngolo: ‘Mulongi, mbo tufwa! Tu bakisa!’ Yezu wavumbuka mpe watâ kwe mubu: “Kuta!” Mbala mosi, titembo na mubu bialembama. Yezu wayula kwe ntumwa zandi: ‘Timinu tieno kwe tiena?’ Bawu babatika mu zonza bawu na bawu: “Titembo na mubu mpe yandi bita tumamana.” Ntumwa zalongoka ti tala ti lukwikulu lwa lunga lwa bâ nawu mu Yezu, ka bafweti’â bâ na bunkuta ko, kani fioti.