Paulo na Timote

Timote ntwenia ya bakala yabâ mu timvuka tia Listre. Tata’andi Greke yabâ mpe nguri’andi Muyuda wabâ. Nguri’andi, Enise, na nkaka’andi Loyise balongesa Timote misamu mitariri Yehova tûka bumwana bwandi.

Paulo bu kayenda ku Listre mu nzietolo’andi ya nzole ya tisalu tia samuna, wamona ti Timote watomo zolo mpangi zandi, mpe nsatu yayingi yabâ nandi mu ba bakisa. Paulo walomba kwe Timote mu kwenda na yandi mu nzietolo’andi. Ha manima Paulo wakubika Timote mu bâ tisamuni tia mbote na mulongi wa nsangu za mbote.

Mpeve santu Paulo na Timote yeri twarisaka kwakwansoni ku beri kwe yende. Mpimpa yimosi, mu timona-meso, muntu wumosi watâ kwe Paulo mu kwiza ku Masedwane na mu ba bakisa. Buna Paulo, Timote, Silase na Like bayenda mu samuna na mu yirika bimvuka.

Ku hata dia Masedwane dia tizunga tia Tesalonike, bakento na babakala babingi bayizi bâ Bakristo. Kâ Bayuda bakaka timbanda tiabâ nawu mu Paulo na ndiku zandi. Bawu bakutakasa bantu babingi mpe banata bampangi kwe mfumu za hata dio, bu beri tâka mu ngolo: ‘Bantu ba mbeni zena za guvernema ya ku Rome!’ Luzingu lwa Paulo na Timote mu mpasi lwabâ; buna badioka mu kwenda ku Bere mu mpimpa.

Bantu ba ku Bere, nsatu yayingi yabâ nawu ya wâ nsangu za mbote, mpe Bayuda na Greke za mbuka yo bayizi kwikila mu nsangu za mbote. Kâ Bayuda batûka ku Tesalonike bu bakotesa vwandi, Paulo wayenda ku Atene. Timote na Silase basâla ku Bere mu tindisa bampangi. Ha manima, Paulo wavutu tambika Timote ku Tesalonike mu bakisa bampangi mu telamana nkwamusu zabâ kûna. Mboko hana manima Paulo watambika Timote mu kwe tala bimvuka biabingi biakaka na mu tindisa bio.

Paulo watâ kwe Timote: ‘Bô bazololo mu sarila Yehova mbo babakwamisa.’ Timote bamukwamisa, mpe bamutûla ku boloko mu bungu dia timinu tiandi. Nsayi yabâ nandi ya bâ na bweso bwa songela nkwikamanu’andi kwe Yehova.

Paulo watâ kwe Bisi-Filipe: ‘Timote nita lu tambikila. Yandi mbo kalulongesa bwe badiatilaka mu matieleka, mpe mbo kalukubika mu tisalu tia samuna.’ Paulo wazaba ti lenda dia bâ nandi dia sikirila Timote. Bawu ndiku zabâ zeri salaka ha timosi, mpe bayizi bâ ndiku za tisalu mvula za nkatika zazingi.