Tatamana mu kula mu luzolo lwaku

1. Ntia matieleka wayizi baka bu wabatika mu longoka Bibila?

NGANO ta bambuka bu wabatika mu longoka Bibila? Kampe wayituku bu wayizi longoka ti Nzambi nkumbu ye nandi. Kampe mutima’aku wayizi lembama bu walongoka ti Nzambi ka mwisaka bantu mpasi ko ku benga dia tiya. Kampe wayangalala mpe bu wayizi longoka ti lendi vutu mona bantu ba wazolo bafwa, mpe lendi vutu bâ nawu tintwari ku paradi ha zulu mutoto.

2. Bu katula ndongokolo ya matieleka ma Bibila, ntia nsobolo zakaka wayizi sa? (Bisi-Efeze 5:1, 2)

² Bu watatamana mu longoka Zu dia Nzambi, luzolo lwaku mu Yehova lwayizi kula. Luzolo lo lwakutuma mu sarila misamu mi walongoka. Wayizi bonga nzengolo za nguria za mbote zasikamana mu mitieno mia Bibila. Wayizi tomesa bifu biaku na ndiatulu’aku mu bungu ti weri naku watâ Yehova nsayi. Ntiana kwa bu landaka mwana bifu bia tata’andi dia luzolo, wayizi landa bifu bia Tata’aku dia ku mazulu.—Tanga Bisi-Efeze 5:1, 2.

3. Ngano ntia biyuvu tulendi tiyula?

³ Tulendi tiyula: ‘Ngano luzolo lwani mu Yehova luyôkele ngolo na lweri nani bu nayizi bâ Mukristo? Tûka bateme’ani, ngano mpila’ani ya banzila na ya sarila mbo yitomo delakanaka na za Yehova—nsungula bu nisongelaka luzolo kwe mpangi zani?’ Tala ti luzolo lweri naku ku mbatukulu lwayizi wola fioti, kunôkandi. Musamu wa mpila yo waturila Bakristo ba mu mbandu ya ntete. Yezu ka ba kala ko, mpe ka tu kala ko. (Nza. 2:4, 7) Zebi ti tulendi vutu vumbula luzolo lweri neto bu tabatika mu longoka matieleka.

4. Nti tuzonzela mu timoko ti?

⁴ Timoko ti mbo tizonzela ka bwe tulendi tatamana mu kurisa luzolo lweto mu Yehova na mu bampwana’eto. Ha manima, mbo tuzonzela tusakumunu tu tulendi baka, mpe tu lendi baka bampwana’eto bu tuyikaka luzolo lweto ngolo.

KULA MU LUZOLO LWAKU MU YEHOVA

5-6. Ntia misamu ntumwa Paulo kabwabana na mio bu keri salaka tisalu tia Nzambi, kâ nti biamutuma mu tatamana mu sarila Yehova?

⁵ Ntumwa Paulo luzingu lwa nsayi lweri nandi mu tisalu tia Yehova, kâ wafweti telamana misamu miamingi mia mpasi. Paulo mbo keri vulu saka nzietolo za zila, mpe mu ntangu yîna ka weri’â musamu wa fioti ko. Mu nzietolo zandi, ntangu zakaka mbo keri bâka mu mpasi ha kati dia mamba, mpe mu bungu dia mivi. Ntangu zakaka, mbeni zandi zamutwa. (2 Kor. 11:23-27) Mpe mpangi za Paulo zeri Bakristo ntangu zazansoni ka beri’â songelaka ko ti mbo beri tondaka mu ngolo zi keri sarilaka mu ba bakisa.—2 Kor. 10:10; Flp. 4:15.

⁶ Nti biabakisa Paulo mu tatamana mu sarila Yehova? Paulo watomo longoka timuntu tia Yehova mu nzila ya Matsonoko na mu misamu mi kabwabana na mio. Paulo wayizi batika mu kwikila ti Nzambi’eto Yehova yandi kazolo. (Rom. 8:38, 39; Efz. 2:4, 5) Mpe wayizi tomo zolo Yehova. Paulo wasongela luzolo lwandi mu Yehova bu ‘kasarila, na bu katatamana mu sarila basantu.’—Ebr. 6:10.

7. Mu ntia mpila tulendi kurila mu luzolo lweto mu Yehova?

⁷ Tulendi kula mu luzolo lweto mu Nzambi, bu tulongoka Zu diandi na bunsungu bwabwansoni. Bu longokaka Bibila, dingaka mu bakula ka nti muna verse yisongelaka mu Yehova. Tiyula: ‘Bwe tinsamu ti tita songela ti Yehova meno kazololo? Ntia misamu mie mu mita sa ti nazolo Yehova?’

8. Bwe lusambulu lutubakisilaka mu kula mu luzolo lwa Nzambi?

⁸ Mpila yakaka yi tulendi kurila mu luzolo lweto mu Yehova ni mu vulu mu ziburilaka mutima’eto mu lusambulu. (Mik. 25:4, 5) Ha manima, Yehova mbo kahanina tusambulu tweto mvutu. (1 Za 3:21, 22) Khanh, we mpangi ya yikento ku Asie, têle ti: “Ku mbatukulu, luzolo lwani mu Yehova mbo lweri sikamanaka mu luzabu, kâ luzolo lo lwayizi yikama ngolo bu nayizi mona ka bwe Yehova kahanina mvutu mu tusambulu twani. Wakuntuma mu yirika misamu mimutâka nsayi.”b

KULA MU LUZOLO LWAKU LWA BAMPWANA’AKU

9. Bwe Timote kasongela ti luzolo lwandi mu bampangi keri yikaka ngolo?

⁹ Mwa mivu ha manima, bu kayizi bâ Mukristo, Paulo wayizi zabasana na ntwenia yimosi yeri na nkumbu Timote. Timote wazolo Yehova na bantu. Paulo watâ kwe Bisi-Filipe ti: ‘Ka ndiena na muntu wakaka ko [ntiana Timote] lendi bâ na lwaka mu misamu mieno na nguria butieleka.’ (Flp. 2:20) Mu verse yi, Paulo ka zonzela lenda dieri na Timote ko mu kubika misamu peleko dia tâ binzonzi, kâ Paulo mbo keri tomo monaka ti Timote bampangi ba katomo zolo. Ntembe kâni, bimvuka bieri kipaka Timote mbo bieri mu kêlaka na timina diadiansoni.—1 Kor. 4:17.

10. Bwe Anna na bakala diandi bayizi songela luzolo lwe nawu mu mpangi zawu?

¹⁰ Beto mpe mbo tudingaka mpila zi tulendi bakisila mpangi zeto za Bakristo. (Ebr. 13:16) Tazonzeleno Anna wu tatokolo zonzela mu timoko tiayôkele. Titembo tia ngolo bu tiamana yôka, yandi na bakala diandi bayenda kwe kanda dimosi dia Mbangi za Yehova, mpe bayizi mona ti muluri wa nzo ya kanda dio wa wubuka weri. Buna, kanda dio, ka dieri’â na binkuti bia tsema ko. Anna têle: “Tabonga binkuti biawu, tasukula bio, mpe tabakarisila bio bu tamana bia pasa mpe bu tafutika bio. Kwe beto, ka tayirika musamu wa ngolo ko, kâ musamu wo wayizi sa ti tabâ na tindiku tia ngolo tii lumbu ti.” Luzolo lwa Anna na lwa bakala diandi lwabatuma mu hana lubakusu lwa delakana.—1 Za 3:17, 18.

11. a) Bwe ngolo zi tusarilaka mu songela luzolo zilendi simbila mitima mia bampwana’eto? b) Tintwari na Bingana 19:17, bwe Yehova kamonaka bu tusongelaka luzolo?

¹¹ Bu tusongelaka nsayi na luzolo kwe mpangi zeto, vula-vula mbo bamonaka ti ngolo tuta sarila mu landa tifwani tia Yehova. Kampe mbo batomo tonda mu nsayi’eto mu mpila yi tulembo bakula. Khanh, wu tutokolo zonzela, mbo kabambukilaka bantu bamubakisa na luzolo lwalwansoni. Têle: “Mbo nitomo tondaka mpangi za zikento zakumbakisa. Bayizi kumbonga, bakuntikisa mu bâ nawu tintwari na mu kabana tima tia dia, mpe bakunturisa ku nzo ngatu nakota bubote. Bwawu bu mbo nitomo bakulaka ti ngolo zazingi basarila. Mpe mu luzolo basila bo.” Kâ, ka bantu babansoni’â ko batutonda mu mio mi tuyirikaka mu bawu. Mu bungu dia bantu bamubakisa, Khanh têle ti: “Wubâka nani nabakarisila mbote yi bakundiyirika, kâ ka nzebi’â ko ka kwe babâka babansoni. Kâ, Yehova kwa kazebi, mpe mbo nisambilaka ngatu kabakarisila yo.” Khanh mpemba ye nandi. Yehova mbo kamonaka mbote yi tuyirikaka kwe bampwana’eto, ni bu sa ti ya fioti kwa yena. Mbo kabongelaka yo ntiana mikayulu mia ntalu, mpe ntiana mfuka yi kafweti futa.—Tanga Bingana 19:17.

12. Bwe bampangi balendi songela luzolo lwawu mu timvuka? (Tala mpe bifwani.)

¹² Tala ti nge mpangi ya yibakala yena, ngano bwe lendi songela luzolo kwe bampwana’aku, mpe lendi lambula koko mu ba bakisa? Mpangi ya yibakala ya ntwenia, ye na nkumbu Jordan, wayula mukuluntu wumosi ka bwe kaketi sa mu tomo bakisa timvuka. Mukuluntu wamusîka mu nsobolo zi katisila, mpe wamuhana malongi matariri mpila yi kaketi sila miakaka. Mu tifwani, watêla Jordan mu kwizaka mu ntangu ya fwanana ku Nzo ya Nsambululu mpe kahanaka bampwana’andi mbote, kahanaka mvutu ku tukutakanu, kavulu samunaka na tikunku tiandi tia bisamuni, mpe kadinga mpila za delakana mu bakisa bantu. Jordan bu kalanda malongi mo, ka yizi’â bâ kwa na lenda dia môna ko, kâ luzolo lwandi mu mpangi zandi lwayizi kula. Jordan walongoka ti, mu ntangu mpangi yikwizi bâka tibakisi mu tisalu, ka batikaka mu bakisa bampwana’andi ko; kâ mbo katatamanaka mu ba bakisa.—1 Tim. 3:8-10, 13.

13. Bwe luzolo lwatumina mpangi yimosi ye na nkumbu Christian mu kwizi vutu bâ mukuluntu?

¹³ Ngano bwe lendi sa tala ti watoko bâ tibakisi mu tisalu peleko mukuluntu? Yehova mbo kabambukilaka tisalu ti wasala mu ntama na luzolo lweri ku tumaka mu sala tio. (1 Kor. 15:58) Mbo katalaka mpe luzolo lu ta tatamana mu songela. Mpangi ye na nkumbu Christian wanionga bu bamukatula dema dia mukuluntu. Kâ, têle ti: “Nabonga nzengolo ya sa miamiansoni mi naketi lenda mu sarila Yehova na luzolo lwalwansoni, ni bu sa ti madema me nani peleko kâni.” Ha manima, bayizi vutu mu noma mukuluntu. Christian têle ti: “Mwa lwaka lweri nani mu vutu nata dema dio. Kâ nayizi tâ ti tala ti Yehova, mu tiari tiandi, kumbikiri navutu bâ mukuluntu, mfweti nata dema dio mu bungu dia luzolo lwe nani mu Yandi na mu mpangi zani.”

14. Ntia malongi ta baka mu misamu mia tâ mpangi ya ku Géorgie?

¹⁴ Bisari bia Yehova mbo bisongelaka mpe luzolo kwe bantu bakaka. (Mat. 22:37-39) Mu tifwani, Elena, mpangi ya yikento ya ku Géorgie, têle: “Ku mbatukulu, tima timosi tieri kuntumaka mu samuna, ni luzolo lwani mu Yehova. Kâ, luzolo mu Tata’ani dia ku mazulu bu lwakula, luzolo lwani mu bantu mpe lwayizi kula. Mbo ndieri dingaka mu zaba ka ntia misamu beri bwabanaka na mio, mpe ntia mutu-diambu waketi simba mitima miawu. Bu ndieri kwe ba banziri mu mpila yo, nsatu’ani ya ba bakisa yayizi tomo kula.”—Rom. 10:13-15.

TUSAKUMUNU TU TUBAKAKA BU TUSONGELAKA LUZOLO KWE BAMPWANA’ETO

15-16. Ntiana bu wuta monekena mu bifwani, ntia tusakumunu tumonekaka bu tusongelaka luzolo?

¹⁵ Bu tusongelaka luzolo kwe mpangi zeto, ka bawu kaka ko babakaka ndandu. COVID-19 bu yamana batika, mpangi mosi ya bakala ye na nkumbu Paolo na mukento’andi babakisa mpangi zazingi za nuna mu zaba ka bwe baketi sarila appareil électronique zawu ngatu basamunaka. Mpangi mosi ya yikento weri toko monaka mpasi mu sarila appareil’andi, wayizi lenda ha manima. Wayizi lenda mu sarila yo mu tikisa bantu ba kanda diandi ku Mbambukulu. Bantu ba 60 ba kanda diandi bayizi ya landa mu vidéoconférence! Mpangi yo ya yikento na kanda diandi babaka ndandu mu ngolo za sarila Paolo na mukento’andi. Ha manima, mpangi yo watsonekena Paolo: “Matondo bu ta kwe tu longese beto bibunda. Kani kabwe ka nizimbakana mpila Yehova yi katukipilaka ko na ngolo zi sarilaka mu tu bakisa.”

¹⁶ Binsamu bia mpila yi biahana Paolo malongi ma mfunu. Wayizi bambuka ti luzolo luyôkele mfunu luzabu na lenda dilendi bâ neto. Têle ti: “Munkengi wa tizunga ndieri. Lumbu ti, mbo nibakulaka ti ni bu sa ti bisamuni biazimbakana binzonzi bi natâ, mbo babambukilaka lubakusu lwa delakana lu nabahana.”

17. Banani bakaka babakaka ndandu bu tusongelaka luzolo?

¹⁷ Bu tusongelaka luzolo kwe bampwana’eto, beto beni mpe mbo tubakaka ndandu mu mpila zi tulembo kekoloko. Jonathan bâka ku Nouvelle-Zélande, wa kasingase. Wamona mupasuri-nzila wumosi weri samunaka mu nzila yandi kaka mu tilumbu timosi tia samedi ha manima ma midi, bu kweri yaninga diadingi. Jonathan wabonga nzengolo ya samunaka na mupasuri-nzila wo bilumbu bia samedi ha manima ma midi. Mu ntangu yîna keri’â bakulaka ko ka bwe keri bakilaka ndandu mu nzengolo yo ya mbote yi kabonga. Jonathan têle ti: “Mu ntangu yîna, ka ndieri’â zoloko tisalu tia samuna ko. Kâ, bu ndieri landaka mpila yeri longeselaka mupasuri-nzila wo, mpe bu namona ka bwe tisalu tiandi tieri butilaka mbutu, nayizi batika mu zolo tisalu tio. Nayizi baka mpe ndiku yayizi kumbakisa mu kula mu timpeve, mu zolo tisalu tia samuna na mu pusana kwe Yehova.”

18. Ngano Yehova nti kazololo tasa?

¹⁸ Yehova zololo ti beto bansoni takula mu luzolo lweto mu Yandi na mu bampwana’eto. Ntiana bu tulongokele wo, tulendi kurisa luzolo lweto bu tutanga Zu diandi mpe bu tudimbitila dio, mpe bu tuvulu zonza nandi mu nzila ya lusambulu. Tulendi kula mu luzolo lweto mu mpangi zeto bu tubabakisa mu mpila ya delakana. Luzolo lweto bu lukwe kuri, mbo tukwizi tomo pusana kwe Yehova na kwe kanda dieto dia timpeve. Mpe mbo tukwizi bâ mu nsayi na ndiku zo ntangu zazansoni!