Bâ wa kubama mu bakisa bantu batambulaka matieleka

1. Bwe bantu balendi bongela misamu mi tubasamuninaka? (Bisalu 13:​47, 48; 16:​14, 15)

BANTU babîngi mu mbandu ya ntete, bayizi tambula matieleka buna kwa bu bawâ nsangu zitariri Yezu. (Tanga Bisalu 13:​47, 48; 16:​14, 15.) Mpila mosi mpe lumbu ti, bantu babîngi nsayi yibâka nawu bu bawâka nsangu za mbote mu mbala ya ntete. Mpe bantu beri kalaka matieleka ku mbatukulu, balendi kwizi tambula matieleka ha manima. Nti tulendi sa bu tubwabanaka na bantu bata dinga mu zaba misamu miamingi mitariri Nzambi na Bibila?

2. Bwe tisalu tieto tia samuna tifwanakane na tisalu tia muntu wusalaka nsaba?

² Tabongeno tifwani. Tisalu tieto tia samuna balendi tia fwanakasa na tisalu tia muntu wusalaka nsaba. Tala ti mbutu ye kô yiyelele, muntu wusalaka nsaba lendi ya tia ni bu sa ti buba kata buba peleko bima kata kuna. Mpila mosi mpe, bu tubwabanaka na muntu we wa kubama mu tambula matieleka, nsatu yibâka neto mu kulu mu bakisa mu bâ mulongoki wa Kristo. Kâ bô balembolo bâ ba kubama, mbo tutatamana mu ba bakisa mu zaba mu bungu dia nti we mfunu kwe bawu mu longoka misamu mitariri Bibila na Nzambi. (Za 4:​35, 36) Lenda dia swasikisa dilendi ku bakisa mu zaba tala ti muntu wa kubama wena peleko kani. Bwawu bu tataleno misamu mi tulendi sa mu timoko tieto tia ntete, mu bakisa muntu we wa kubama mu tambula matieleka. Mbo tutala mpe nti tulendi sa mu bakisa muntu wo mu tatamana mu kula mu timpeve.

BWE TULENDI BAKISILA MUNTU WUTA ZOLO ZABA MATIELEKA

3. Nti tulendi sa bu tubwabanaka na bantu batamburi matieleka mu tisalu tieto tia samuna? (1 Bisi-Korente 9:26)

³ Mu tisalu tieto tia samuna bu tubwabanaka na muntu wuta zolo zaba matieleka, nsatu yibâka neto ya mu bakisa ho nkatika bendo mu bâ mu nzila yinataka ku luzingu. Mu ntangu yo ka tatiyiminakandi mu batika ndongokolo na mu tikisa bantu bo ku tukutakanu mu timoko tieto tia ntete.—Tanga 1 Bisi-Korente 9:26.

4. Zonzela tinsamu tia muntu wo wabâ wa kubama mu longoka Bibila ho nkatika bendo.

⁴ Zonzela ndongokolo ya Bibila. Bantu bakaka ba tuzonzaka na bo, ba kubama babâka mu batika ndongokolo ya Bibila ho nkatika bendo. Mu tifwani, mu tilumbu tia jeudi ku Canada ntwenia yimosi ya yikento yapusana ha prezentware mpe yabonga mukanda wa Bâ mu nsayi ntangu zazansoni!. Mpangi ya yikento yamubangurila ti ndongokolo ya Bibila ya mpamba basaka na mukanda wo. Ntwenia yo yatambula mpe yamuhana nimero’andi. Ha manima mu tilumbu tio kwa, ntwenia yo yatsonekena mpangi yo ya yikento mu bungu dia ndongokolo ya Bibila. Mpangi yo bu yamutêla ti mu lumingu kaketi kwiza, ntwenia yo yamuyula: “Ngano lendi kwiza mbazi?” Babatika ndongokolo ya Bibila mu tilumbu tia vendredi tio. Lumingu lo kwa, ntwenia yo ya yikento yayiza ku lukutakanu mpe yatatamana mu kula mu timpeve.

5. Bwe lenda dia swasikisa dilendi tu bakisila bu tulombaka kwe muntu mu longoka Bibila? (Tala mpe bifwani.)

⁵ Wa matieleka, ka tukêlaka ko ti bantu babansoni ba tuzonzaka na bo, babâ na tiya twabâ na ntwenia yo ya yikento. Bakaka nsatu ntangu yibaka nawu mu zolo matieleka. Kampe tufweti toko zonzela musamu wusimba mutima wa muntu. Kâ tala ti tutatamane mu bâ na mabanza ma delakana na mu songele luzolo kwe muntu wo, mu ntangu fioti lendi batika mu longoka Bibila. Nti tulendi tâ bu tulombaka kwe muntu mu longoka Bibila? Tiyuvu tio tia bayula kwe mpangi zibatikaka ndongokolo ya Bibila mu mpila ya mbote.

6. Nti tulendi sa mu tatamana mu bâ na timoko tia mbote na muntu?

⁶ Bisamuni na mipasuri-nzila mi bayula tala ti balendi batika ndongokolo ya Bibila, babangula ti mu nsi zakaka bu tuzonzelaka ndongokolo ya Bibila, musamu wa mbote wena mu lembo sarilaka ntêlo ntiana “longoka,” “ndongokolo ya Bibila,” peleko “mu ku longesa.” Bayizi bakula ti musamu wa mbote wena mu sarila ntêlo ntiana: “timoko,” na “longoka mu zaba Bibila.” Mu tatamana mu sa timoko lendi tâ: “Musamu wa nzitukulu wena mu mona kabwe Bibila dihaninaka mvutu mu biyuvu bia mfunu bia luzingu” peleko “Bibila ka diena kwa buku dia mabundu ko; dilendi tu bakisa mu misamu miakaka mia luzingu.” Lendi vutu yika: “Timoko ka tibongaka ntangu yayingi ko; 10 peleko 15 minitemifwanane mu longoka musamu wa mfunu.” Ka wena na nsatu ko ya sarila ntêlo ntiana: “tilumbu tiakaka” peleko “tumingu twatwansoni,” mu bungu ti muntu lendi banza ti tiya tamusa ngatu lwamonanaka ntangu zazansoni.

7. Mu ntia ntangu bantu bakaka bayizi tambula matieleka ma Bibila? (1 Bisi-Korente 14:​23-25)

⁷ Ba tikisa ku lukutakanu. Mu mbandu ya Paulo, bantu babingi batambula matieleka bu bayiza ku lukutakanu. (Tanga 1 Bisi-Korente 14:​23-25.) Musamu mpe ni wo wuyilamaka lumbu ti. Bantu babîngi, mu ntinu bakulaka bu bakwizaka ku lukutakanu. Mu ntia ntangu tufweti ba tikisa? Mu buku dia Bâ mu nsayi ntangu zazansoni! mu timoko tia 10 batikisaka bantu mu kwiza ku lukutakanu, kâ ka wena na nsatu ko mu tûla mu timoko tina mu tikisa muntu ku lukutakanu. Mu timoko tieno tia ntete, lendi tikisa muntu mu kwiza ku lukutakanu lwa tumingu, bu mu zonzela mutu-diambu wa tinzonzi tia bantu babansoni peleko mabanza ma ndongokolo ya Nzo ya Zangama ya Munkengi ya lumingu lo.

8. Ngano nti tulendi tâ kwe muntu wu tuta tikisa ku tukutakanu? (Izaya 54:13)

⁸ Bu tikisa muntu, mu bangurila mu ntia mpila lukutakanu lweto lwe lwa swaswana na mio miyôkaka mu mabundu makaka. Mulongoki wumosi wa Bibila bu wamona mbala ya ntete bwe ndongokolo ya Nzo ya Zangama ya Munkengi yiyôkelaka, wayula kwe mpangi ya yikento yeri mu longesaka: “Ngano muntu wuta twarisa nkumbu za bantu babansoni za kazebi?” Mpangi ya yikento yamutêla ti ngolo tusarilaka mu zaba nkumbu za bantu babansoni bê mu timvuka, ntiana bu tuzabilaka nkumbu za bantu bê mu kanda dieto. Mulongoki wo wamona ti musamu wo wa swaswana wena na mio mi keri monaka mu dibundu diandi. Tulendi bangula mpe kwe muntu mu ntia mpila yakaka lukutakanu lweto lwe lwa swaswana na mio miyôkaka mu mabundu makaka. (Tanga Izaya 54:13.) Kutakana tukutakanaka mu kunda (adorer) Yehova, mu longoka mu mu zaba na mu titindisa beto na beto. (Ebr. 2:12; 10:​24, 25) Ntiangu bakubika tukutakanu tweto mu tu bakisa mu longoka, mpe tukutakanu tweto ka tusikamanaka ko mu bikulu peleko nsalulu za mabundu makaka. (1 Kor. 14:40) Nzo zeto za Nsambululu batomo za sala mu tu bakisa mu tomo longoka. Mu bungu ti ka tukotaka misamu mia politike ko, ka tuzonzelaka mpe mio ko; mpe ka tuzonzelaka mabanza ma beto beni ko. Kampe wulendi bâ mfunu ntete-ntete mu songela kwe mulongoki’aku video ye na mutu-diambu Ngano nti biyôkaka ku Nzo ya Nsambululu? Buna mbo katizabila misamu mita mu kela.

9-10. Bu tutikisaka muntu ku tukutakanu, ngano nti tulendi mu têla ngatu ka bândi na bunkuta mu kwiza? (Tala mpe tifwani.)

⁹ Bantu bakaka bunkuta bu baka nawu mu bungu ti mbo babanzaka ti mbo babalomba mu bâ Mbangi za Yehova. Tâ kwe muntu ti tuzololo mu bâka na banzenza ku tukutakanu tweto mpe ka tumutuma mu ngolo ko mu hana mvutu ku lukutakanu peleko mu bâ Mbangi ya Yehova, wufwanane kwa kawâ. Makanda ma tuzoloko mu bwana ni bu sa ti bala ba fieti bê nawu. Ku tukutakanu tweto bala ka bêna na mbuka ya bawu kaka ko yi babakaka ndongosolo. Bibuti na bala tintwari bazakalaka mu baka ndongosolo. Buna bibuti bizebi bala bawu na ba nani bena mpe ntia ndongosolo bata baka. (Lub. 31:12) Ka bafutaka mbongo ko mpe ka kubâka nsinsani ko. Kani tasila bo, mutieno wa Yezu tulandaka wutâka: ‘Bia mpamba lwabakiri, hana’eno mpe bia mpamba.’ (Mat. 10:8) Lendi tâ mpe kwe muntu ti kena na nsatu ko ya lwata binkuti bia ntalu mu kwiza ku tukutakanu. Nzambi katalaka mpila yi monekenaka muntu ko, kâ mutima’andi katalaka.—1 Sam. 16:7.

¹⁰ Tala ti muntu wiziri ku lukutakanu, sa miamiansoni mi lenda mu mu bwana mu mpila ya mbote. Mu songela kwe bakuluntu na kwe bisamuni biakaka. Tala ti tomono mu bwana mbo kabâ na nsayi ya vutu kâla. Mu ntangu ya lukutakanu tala ti kena na Bibila ko, kabana Bibila diaku na yandi mpe mu songela bwe tulandilaka lukutakanu lweto.

NTI TULENDI SA BU TUBATIKAKA NDONGOKOLO YA BIBILA

11. Bwe lendi songela ti ntangu ya mulongoki’aku zitisaka?

¹¹ Nti tufweti bambukila bu tulongokaka na muntu? Zitisaka ntangu yi ku hanaka muntu. Mu tifwani bu tambulaka mu longoka na muntu fweti bâ ho mu ntangu yi luwisane, ni bu sa ti bantu ba tizunga tiaku ka basilaka bo ko. Kâ musamu wa mbote wuba mu timoko tia ntete mu lembo bonga ntangu yayingi. Bisamuni bie na luzabu mu tisalu tia samuna, mbo bimonaka ti musamu wa ndwenga wena mu lembo yôkesa ntangu, ni bu sa ti muntu wo wuta tu wirikila wudingiri mu zaba misamu miamingi. Mpe kuzonzandi bwabwingi. Bîka mulongoki’aku kazonza.—Bin. 10:19.

12. Ntia kani difweti bâ neto bu tubatikaka ndongokolo ya Bibila na muntu?

¹² Tûka ku mbatukulu kani diaku difweti bâ dia bakisa mulongoki’aku mu zaba Yehova na Yezu, ngatu kakurisa luzolo lwa ngolo mu bungu dia bawu. Mu lungisa kani dio fweti mu songela misamu mitâka Bibila, ka mio mia ko mi banzaka nge. (Bis. 10:​25, 26) Ntumwa Paulo mpe wasikamasa ndongosolo’andi mu Yezu, weri muntu Yehova wu katambika mu tu bakisa mu mu zaba na mu mu zolo. (1 Kor. 2:​1, 2) Paulo wasongela mu bungu dia nti we mfunu mu bakisa milongoki mia môna mu kurisa bifu bia mbote, bi balendi fwanakasa na ore, arza na matari ma ntalu. (1 Kor. 3:​11-15) Ha kati dia bifu bio bia mbote tulendi zonzela timinu, ndwenga, lenda dia swasikisa na bunkuta bwa Yehova. (Mik. 19:​9, 10; Bin. 3:​13-15; 1 Pi. 1:7) Landa mpila ya ndongosolo ya Paulo mu bakisa mulongoki’aku mu kurisa timinu tia ngolo mpe na tindiku tia mbote na Tata’andi dia luzolo die ku zulu.—2 Kor. 1:24.

13. Bwe tulendi bêla na luvivululu kâ mpe na mabanza ma delakana bu tubakisaka milongoki mia Bibila? (2 Bisi-Korente 10:​4, 5) (Tala mpe tifwani.)

¹³ Landa mpila ya ndongosolo ya Yezu bu songela luvivululu na mabanza ma delakana. Sa keba mu lembo yula muntu biyuvu bimufwisa nsoni. Tala ti wufwanane lendi toko bîka mitu-diambu mi kata lembo bakula mu karila mio ha manima. Kani wamutuma mu ngolo mu tambula ndongosolo ya Bibila ntete kabâ wa kubama, mu hana ntangu ngatu matieleka ma Bibila mazakala mu mutima’andi. (Za 16:12; Kol. 2:​6, 7) Bibila mbo difwanakasaka ndongosolo za bungungu na bima bio bitomono sikama kâ bi tufweti mwangasa. (Tanga 2 Bisi-Korente 10:​4, 5) Ka wubâ musamu wa fioti ko kwe mulongoki’aku mu bîka bima bie bia sikama kwe yandi, kâ lendi mu bakisa mu tûla lukwikulu lwandi mu Yehova. Buna mbo kabâ na lenda dia bîka nkwikulu zandi za mbi.—Mik. 91:9.

BWE LENDI BAKISILA MUNTU WIZIRI KU LUKUTAKANU MU MBALA YA NTETE

14. Bwe tufweti bongelaka bantu bakwizaka ku tukutakanu tweto?

¹⁴ Yehova zololo ti, tabongela bantu bakwizaka mu mbala ya ntete ku lukutakanu na kondo kwa tihambula, ntono tikulu tiawu, mazu mawu na mbongo zawu. (Zaki 2:​1-4, 9) Buna, bwe tulendi songela luzolo kwe bantu bakwizaka ku tukutakanu tweto?

15-16. Nti tulendi sa ngatu bantu bo biziri ku lukutakanu mu mbala ya ntete bayangalala?

¹⁵ Bantu bakaka balendi kwiza ku lukutakanu lweto mu kwizi zaba kwa kabwe misamu miyôkelaka, peleko muntu we ku mbuka yakaka wabatikisi mu kwiza. Buna, ka tutiyiminakandi mu pusana kwe bantu bakwizaka ku tukutakanu tweto. Tomo ba bwana mpe kubândi na tiyaka. Ba tikisa mu zakala na nge. Kabana Bibila diaku na mukanda’aku wa ndongokolo na bawu peleko ba hana wa bawu beni. Banza mpila zakaka zilendi ba yangirika. Bakala dimosi diayiza ku nzo ya nsambululu, watâ kwe mpangi yo ya mu bwana ti, lwaka lweri nandi mu bungu dia binkuti bi kalwata. Mpangi yo yamutêla ti, ntiana kwa bantu babansoni twena ni bu sa ti ni bo tulwatilaka ku lukutakanu lweto. Ni bu sa ti bakala dio diatûla tii ku bateme kasa zimbakana mvutu yo ko. Kâ, musamu wu tufweti sila keba ni wena’eti: bu tuzonzaka na muntu wiziri ku lukutakanu, tufweti sa keba mu lembo kota mu misamu miandi.—1 Pi. 4:15.

¹⁶ Tulendi yangirika bantu bakwizaka ku lukutakanu lweto mu mpila yakaka, mu tifwani: mu ntangu yi tuzonzelaka bantu balembolo Mbangi za Yehova peleko nkwikulu zawu, tufweti bwa silaka na buzitu bwabwansoni mu bimoko bieto peleko mu mvutu zeto. Sa keba mu lembo sarila nzonzolo yisa ti muntu katâ kuba peleko kabanza ti finga tamufinga. (Tite 2:8; 3:2) Mu tifwani ka tutsala nkwikulu za bantu ko ni bu sa ti ka bêna Mbangi za Yehova ko. (2 Kor. 6:3) Buna, mpangi zo zisaka tinzonzi tia bantu babansoni, bafweti sa keba mu musamu wo. Mbo basongela mpe ti bantu balembolo Mbangi za Yehova bata belokela lwaka bu babangula ntêlo zilembolo zaba bantu.

17. Ngano kani dieto ni die bu tubwabanaka na bantu bata dinga mu zaba miakaka?

¹⁷ Tisalu tieto tia kubika milongoki tiyôkele mfunu mu ntangu yi ya mansukina, mpe mbo tutatamana mu dinga bantu bê na “mabanza ma delakana mu baka luzingu lwa mankululu”. (Bis. 13:​48, NWT) Bu tukwe ba dingi, ka tufweti’â takekama ko mu ba zonzela ndongokolo ya Bibila peleko mu ba tikisa ku lukutakanu. Tamana sila bo, mbo tubabakisa mu bâ ‘mu nzila yi nataka ku luzingu.’—Mat. 7:14.