Ngano mabundu mafweti kota mu politike?

Mu nza yayansoni, bantu babingi batâka ti Yezu balandaka batomo kotaka misamu mia politike. Bakaka badingaka mu zangula mbêlo’awu peleko dibundu diawu, mfumu peleko bimvuka bia politike bisingasaka mabanza mawu, bayikaka moko. Mfumu za politike misamu mia bantu na mabanza ma mabundu basarilaka ngatu bantu babavota. Mu nsi zakaka, ka wena wa nzitukulu ko mu mona mfumu za mabundu zidingaka babavota. Ntangu zakaka mpe, dibundu dia “Bakristo” balendi diasa dibundu dia luyâlu.

Ngano bwe ta banza? Ngano mulongoki wa Yezu wufweti kota mu politike? Mvutu mu tifwani tia sisa Yezu yena. Yandi watâ: “Meno nilusongele tifwani, ngatu beno mpe lwasa ntiana bu nilusiri.” (Za 13:15) Mu misamu mia politike, ntia tifwani Yezu kasongela?

Ngano Yezu wakota misamu mia politike?

Kâni. Yezu kadinga ko mu kota misamu mia politike mia nza yi.

Yezu ka dinga timfumu tia politike ko. Satana bu kamulomba mu yâla “bimfumu biabiansoni bia mu nza,” yandi wakala.” (Matie 4:8-10)a Tilumbu tiakaka, bantu bu bamona ti Yezu bifu bia mbote bia bâ nandi mu bâ mfumu, bawu badinga mu mu kotesa mu politike. Bibila ditêle: “Yezu, bu kazaba ti mbo baketi kwizi mu bwila mu mu sa mutinu, yandi wayenda ku mongo, yandi kaka.” (Za 6:15) Yezu ka yirika misamu mieri mu lombaka bantu ko. Buna, yandi wakala mu kota misamu mia politike.

Yezu ka kota misamu mia politike ko. Mu tifwani, mu ntangu ya Yezu, guvernema ya Bisi-Rome mpaku za ngolo yeri lombaka, mpe musamu wo Bayuda weri fwemesaka, mu bungu ti kwe bawu titantu tieri. Bu balomba kwe Yezu kakota musamu wo, yandi wakala mu kota timoko tio tia politike. Yandi wabatêla : “Kâriseno bima bia Sezare kwe Sezare, kâ bima bia Nzambi kwe Nzambi.” (Marke 12:13-17) Yezu bu kalembo kota misamu mia politike, watâ ti wafwanana mu futaka mpaku zeri lombaka Sezare, wuzololo tâ mfumu za Bisi-Rome. Yandi wasongela mpe ti lutumamanu kwe guvernema ndilu lwena, mpe ka bafweti’â bahana kwe Luyâlu ko, bima bi bafweti hana kwe Nzambi, wuzololo tâ sambila kwa Yandi.—Matie 4:10; 22:37, 38.

Yezu timfumu tia ku zulu peleko Timfumu tia Nzambi kazangula. (Like 4:43) Yandi kakota mu politike ko mu bungu ti wazaba ti luzolo lwa Nzambi mbo lulungana ha mutoto, ka mu nzila ya guvernema za bantu’â ko, kâ mu nzila ya Timfumu tia Nzambi. (Matie 6:10) Mpe yandi wazaba ti guvernema yo mbo yiyingasa guvernema za bantu, mu bilumbu bita kwiza.—Daniele 2:44.

Ngano Bakristo ba mu mbandu ya ntete politike beri saka?

Kâni. Milongoki mia Yezu ntumunu’andi mieri zitisaka ya “lembo saka tintwari na nza.” (Za 15:19) Bawu tifwani tiandi beri landaka mpe batatamana mu bâ ba hambana na nza ya politike. (Za 17:16; 18:36) Kani bakota misamu mia politike, bawu basala tisalu tia ba tuma Yezu—samuna na longesa Timfumu tia Nzambi.—Matie 28:18-20; Bisalu 10:42.

Lutumamanu kwe Nzambi ni tima tiayôka mfunu kwe Bakristo ba ntete, kâ bawu bazaba mpe ti bafweti zitisa luyâlu. (Bisalu 5:29; 1 Piere 2:13, 17) Bawu misiku beri zitisaka na mpaku beri futaka. (Bisi-Rome 13:1, 7) Bu beri lembo kotaka mu politike, nswa mieri ba hanaka misiku na lusalusu lwa luyâlu beri sarilaka mu tikengerela.—Bisalu 25:10, 11; Bisi-Filipe 1:7.

Bakristo ba ntete na politike—Bantu balongokaka misamu mia ntama bwe batêle

“Bakristo misamu miakaka mi beri lombaka kwe Bisi-Rome beri kalaka. [. . .] Bawu ka babâ na madema ma politike ko.”—On the Road to Civilization—A World History, tinima 238.
“Ka kwena misamu ko wusongelaka ti Yezu wadinga mu sa politike peleko mu nwana muzingu, mpe [. . .] milongoki miandi ni bo beri saka.”—Jesus and Judaism, tinima 231.
“Kwe Mukristo, dibundu dia hambana diabâ na mbêlo ya bantu, mpe nkatika mfunu diabâ, yôka misamu mia politike; kangama kwandi ka kwabâ kwe Sezare ko, kâ kwe Kristo.”—Caesar and Christ, tinima 647.
“[Ntumwa] Paulo wasarila nswa’andi wa Musi-Rome mu baka ndandu za kubika luyâlu mu tikengerela, kâ yandi kayizi’â kota misamu mia politike ko mu ntangu’andi. [. . .] Ni busa ti Bakristo ba ntete bazaba ti luyâlu bafweti zitisa, bawu ka beri’â monaka mfunu ko ya kota mu politike.”—Beyond Good Intentions—A Biblical View of Politics, binima 122-123.
“Bakristo babingi beri kwikilaka ti ka bafweti’â kota misamu mia politike ko. [. . .] Ni bu sa ti ha manima, ku mbatukulu ya mbandu ya ntatu, Hippolyte watâ ti nsalulu ya Bakristo, mfundisi yeri lombaka mu bika tisalu tiandi ngatu kakota mu Dibundu.”—A History of Christianity, Volume I, tinima 253.

Lembo kota misamu mia nza bwawu bu

Bibila ditomono songela ti Yezu na milongoki miandi ka beri’â kotaka misamu mia politike ko. Ntiangu, bu bê Bakristo, Mbangi za Yehova za mu nza yayansoni zilembo kotaka misamu mia politike, kani fioti. Ntiana Bakristo ba ntete, tisalu tia tuma Yezu basalaka—bawu “nsangu za mbote za Timfumu” basamunaka—Matie 24:14.

a Yezu bu kakala ka wuzololo’â tâ ko ti luyâlu lwa Satana kasila ntembe. Ha manima, yandi watâ ti Satana ni “mfumu ya nza.”—Za 14:30