Bwe mukayulu wa Yezu ye “nkûlulu mu bungu dia bantu babingi”?
Mvutu ya Bibila
Mukayulu wa Yezu ni mpila Nzambi yi kakûrilaka, peleko yi kavukisilaka, bantu mu masumu na mu lufwa. Mu Bibila, menga ma Yezu ma batsamuna nkûlulu batâka mo. (Bisi-Efeze 1:7; 1 Piere 1:18, 19) Ntiangu Yezu katâ ti ha mutoto kayiza mu “hana luzingu mu nkûlulu, mu bungu dia bantu babingi.”—Matie 20:28.
Mu bungu dia nti “nkûlulu mu bungu dia bantu babingi” yadingana?
Muntu wa ntete, Adame, wa lunga bamusala, ka bâ na masumu ko. Tivuvu tia bâ nandi tia zinga ntangu zazansoni, kâ wahombesa tio bu kasola mu kolamana Nzambi. (Mbatukulu 3:17-19) Bu kabuta bala, wabasamburila masumu. (Bisi-Rome 5:12) Ntiangu Bibila ditâka ti Adame “watiteka,” yandi na bala bandi, mu bâ ngamba za masumu na za lufwa. (Bisi-Rome 7:14) Na masumu, ka kwena muntu ko waketi lenda mu kûla bantu mu misamu mia hombesa Adame.—Mikunga 49:7, 8.
Nzambi wafwila bala ba Adame tiari mu bungu dia misamu mi babakotesa. (Za 3:16) Kâ, mitieno mia buderede mia Nzambi mimulombele mu lembo semba masumu peleko lemvokela kwa mpamba. (Mikunga 89:14; Bisi-Rome 3:23-26) Nzambi tomono zolo bantu, buna wahana tima tidelakane na misiku mu lemvokela masumu na mu katula mo. (Bisi-Rome 5:6-8) Tima tiango ni nkûlulu.
Ngano bwe nkûlulu yisarilaka?
Mu Bibila, ntêlo ya “nkûlulu” yizololo tâ misamu mia mitatu mita landa:
Mfutulu yena.—Lutangu 3:46, 47.
Mvukulu yihanika nzila.—Ndukulu 21:30.
Tima tifwanane na ntalu yi bafweti futa.a
Tala bwe misamu mio mita delakana na mukayulu wa Yezu Kristo.
Mfutulu. Bibila ditêle ti Bakristo “babasumba mu mfutulu.” (1 Bisi-Korente 6:20; 7:23) Mfutulu yango ni menga ma Yezu, ma “kasumbila bantu ba mawa, ba mazu, ba makanda na ba nsi zazansoni mu bungu dia Nzambi.”—Nzabukusu 5:8, 9.
Mvukulu. Mukayulu wa Yezu wanata “mvukulu mu nzila nkûlulu” mu masumu.—1 Bisi-Korente 1:30; Bisi-Kolose 1:14; Bahebre 9:15.
Tima tifwanane. Mukayulu wa Yezu wudelakane na tima tia hombesa Adame—luzingu lwa tinsuni lwa lunga. (1 Bisi-Korente 15:21, 22, 45, 46) Bibila ditêle: “Ntiangu, mu bukolo bwa muntu wumosi [Adame] bantu babingi bayizi sumuka, ntiangu mpe mu tumama kwa muntu wumosi [Yezu Kristo] bantu babingi bakwizi bâ ba sungama.” (Bisi-Rome 5:19) Musamu wo wusongele bwe lufwa lwa muntu wumosi lulendi futila nkûlulu mu bungu dia bantu babingi bê na masumu. Diangana, mukayulu wa Yezu ni “nkûlulu ya delakana mu bungu dia bantu babansoni” basarilaka ngolo zifwanane mu bakila yo ndandu.—1 Timote 2:5, 6.
a Mu Bibila, ntêlo ya ntete yi babangula mu “nkûlulu” yizololo tâ mfutulu, peleko tima tia ntalu, ti bafutiri. Mu tifwani, ntêlo ya Hebre kafare yizololo tâ “zibika.” (Mabtukulu 6:14) Mu bungu dia zibika masumu bavulu ya sarilaka. (Mikunga 65:3) Ntêlo ya kofere yizololo tâ ntalu yi bafutiri mu lungisa tisalu. (Ndukulu 21:30) Mpila mosi, Ntêlo ya Greke ya lutrone, yi bavulu bangulaka mu “nkûlulu,” balendi mpe ya sarila mu “ntâlu ya mvukulu.” (Matie 20:28; The New Testament in Modern Speech, by R. F. Weymouth) Bitsoniki bia mu zu dia Greke biasarila ntêlo yizololo tâ mfutulu yi bahanaka mu dukisa muntu we ku boloko peleko mu kûla ngamba.