Ngano Mbangi za Yehova Bibila dia bawu beni die nawu?
Mbangi za Yehova mbangululu za Bibila zazingi bayizi sarila mu ndongokolo’awu ya Bibila. Kâ yi tutomo zoloko ni la Traduction du monde nouveau mu bungu ti nkumbu ya Nzambi yisarilaka, ya matieleka yena, mpe ka yena mpasi ko mu bakula.
Nkumbu ya Nzambi yisarilaka. Bidukisi biakaka bia Bibila ka biazitisa ko Wo vwiri Bibila. Mu tifwani, mbangululu yimosi ya Bibila yitangumunaka nkumbu ya bantu kampe 70 bahana lubakusu mu ndukulu ya mbangululu yo. Kâ, yazimbakana mu tangumuna nkumbu ya Wo vwiri Bibila—Nzambi’eto Yehova!
Kâ, la Traduction du monde nouveau nkumbu ya Nzambi yikarisaka mu mafunda za mbuka zeri monekaka nkumbu yo mu matsonoko ma ntete. Komite ya dukisa mbangululu yo ka yatizabikisa ko.
Ya matieleka yena. Mbangululu zazansoni ka zizonzelaka nsangu za Bibila na matieleka ko. Mu tifwani, mbangululu yimosi zonzelaka Matie 7:13 mu mpila eyi: “Mu mwelo wa fioti kwa tulendi kotela zulu! Nzila yinataka ku benga dia tiya ya sarila yena.” Kâ, mu matsonoko ma ntete ntêlo yi basarila ni “mfukulu,” ka “benga dia tiya” ko. Kampe bantu babangula dio basarila “benga dia tiya” mu bungu ti babanzaka ti bankwa-mbi ku benga dia tiya babamwisa mpasi ntangu zazansoni. Kâ nkwikulu yo ka yisikamane’â mu Bibila ko. Dieka bo, mu la Traduction du monde nouveau tulendi tanga: “Koteleno ku mwelo wa fioti; mu bungu ti ya yinene na ya sarila ni nzila yinataka ku mfukulu, babingi balandaka yo.”
Ka yena mpasi ko mu bakula. Mbangululu ya mbote ka yifweti’â yabâ kwa ya matieleka ko, kâ mpe ka yifweti’â yabâ mpasi ko mu bakula. Tabongeno tifwani. Mu Bisi-Rome 12:11, ntumwa Paulo wasarila ntelo yizolo tâka butomo tala “bêno na tiya mu mpeve.” Mu bungu ti ntelo ka yena na nsasa ko mu lari, la Traduction du monde nouveau ya bangula verse mu ntelo yi balendi bakula. Yitêle ti Bakristo bafweti “bâ na luhemo mu nzila ya mpeve.”
La Traduction du monde nouveau ya swaswana yena mu bungu ti nkumbu ya Nzambi yisarilaka, ya matieleka yena, mpe ka yena mpasi ko mu bakula. Kâ tima tiakaka tie kô. Ya mpamba bayangasaka yo. Buna milio za bantu balendi tanga Bibila mu zu diawu dia mbutukulu ni bu sa ti ka bêna na lubaku lwalwingi ko.