Tatamana mu bâ mu tidzunu na mu bâ na lukwikulu mu Yehova

1. Ntiana mutinu Davide, ntia tiyuvu bantu bakaka balendi tiyula?

BETO bansoni tuzololo ti luzingu lweto lwabâka mu tidzunu. Ka kwena muntu ko wuzololo kabâka mu lwaka. Kâ, ntangu zakaka tulendi bâ na lwaka lwalwingi. Ntiangu bisari biakaka bia Yehova bilendi bâ na tiyuvu timosi na mutinu Davide wayula kwe Yehova ti: “Tii ntia ntangu nibâ na lwaka, na mpasi ku mutima bilumbu biabiansoni?”​—Mik. 13:2.

2. Nti tuzonzela mu timoko ti?

² Ni bu sa ti beto bansoni lwaka lubâka neto ntangu zakaka, bima bie kô bilendi sa ti ka tabândi na lwaka lwalwingi. Mu timoko ti, mbo tutoko zonzela misamu miakaka milendi tu natina lwaka. Ha manima mbo tuzonzela mpila sambanu (6) zitubakisa mu tatamana mu bâ mu tidzunu bu tubâka na misamu.

NTI BILENDI SA TI TABÂ NA LWAKA?

3. Ntia misamu milendi tu natina lwaka, mpe ngano tulendi mia zabirila?

³ Misamu miakaka mie kô mitunatinaka lwaka mi tulendi zabirila na mi tulendi lembo zabirila. Mu tifwani, ka tulendi’â takabakasa ko ti ntalu ya bidia, ya binkuti na ya nzo yanaka mivu miamiansoni; mpe ka tulendi’â tazaba ko ntia ntangu bampwana’eto ba ku tisalu peleko ba ku lukolo batutonta ngatu takondo bunsungu peleko tasa bunsuza. Mpe ka tulendi’â takabakasa bantu ko mu yirika mbi mu tizunga tieto. Mbo tubwabanaka na misamu mio mu bungu ti nza yi tubêlaka ye na bantu babongaka nzengolo zilembo kwelanaka na mitieno mia Bibila. Satana, nzambi ya nza yi, zebi ti bantu bakaka mbo babika nza yi yabanatina lwaka, mpe mbo babika mu vutu sarila Yehova. (Mat. 13:22; 1 Za 5:19) Ntiangu tulembo yitukuku ti nza yabâ na misamu miamingi minatinaka bantu lwaka!

4. Nti bilendi tula tala ti lwaka lwalwingi lwe neto mu bungu dia misamu mieto?

⁴ Lwaka lwalwingi lulendi sa ti ka tuvutuandi tabanza misamu miakaka. Mu tifwani, tulendi bâ na lwaka mu lembo bâ na mbongo zifwanakane mu sumba bima bie neto nsatu peleko tulendi bâ na lwaka mu bungu dia timbevo na mu lembo bâ na lenda dia sarila, peleko tulendi bâ na lwaka lwa hombesa tisalu tieto. Tulendi bâ mpe na lwaka lwa lembo bâ ba kwikama mu ntangu yi batulomba takolamana musiku wa Nzambi. Ntamana Satana mbo kasarila bô bê mu lutumu lwandi mu nwanisa kanda dia Nzambi, ntiangu tulendi bâ na lwaka mu bungu dia misamu mi tuyirika mu ntangu yîna. Tulendi tiyula: ‘Ngano bubi bwena kwe meno mu bâ na lwaka mu bungu dia misamu mio?’

5. Ngano Yezu bwe keri zolo tâka bu katâ ti: ‘Ka lwendandi [bê na lwaka]’?

⁵ Tuzebi ti Yezu watâ kwe milongoki miandi ti: ‘Ka lwendandi [bê na lwaka].’ (Mat. 6:25) Ngano Yezu ebu keri zolo tâka ti ka tufweti’â tabâka na lwaka ko? Kâni! Bambukeno ti bisari biakaka bia Yehova bia kwikama bia mu ntangu ya ntama biabâ mpe na lwaka. Kâ Yehova mbo keri tatamanaka mu ba tambula.b (1 Mit. 19:4; Mik. 6:3) Yezu mbo keri tu tindisaka mu lembo bâka na lwaka lwalwingi mu bungu dia misamu mia luzingu, ngatu tisalu tieto tia Nzambi ka tiabândi tima tilembolo mfunu mu luzingu lweto. Ngano nti tulendi sa mu ntangu yi tubâka na lwaka?​—Tala kaku tie na mutu-diambu: “Bwe lendi bwa sila.”

MISAMU SAMBANU (6) MILENDI TU BAKISA MU LUNDA TIDZUNU

6. Tintwari na Bisi-Filipe 4:6, 7, nti bilendi tu bakisa mu bâ mu tidzunu?

⁶ (1) Vulu sambilaka. Mu ntangu yi bâka na lwaka, lendi sambila Yehova ngatu kakubakisa. (1 Pi. 5:7) Yehova lendi hanina tusambulu twaku mvutu bu kakuhana “tidzunu tia Nzambi, tiyôkele misamu miamiansoni mi [lendi bakula bantu].” (Tanga Bisi-Filipe 4:6, 7, NWT.) Yehova mbo kakuhana tidzunu mu nzila ya mpeve santu’andi ya ngolo.​—Nga. 5:22.

7. Ntia musamu tufweti bambukilaka bu tusambilaka Nzambi?

⁷ Mu ntangu yi sambilaka Yehova, mu ziburilaka mutima’aku. Mu têla ntia musamu we naku mpe mu bangurila bwe ta mona ku mutima. Tala ti mpila ye kô ya yirikila musamu we naku, mu lomba kakuhana ndwenga na ngolo za sarila. Tala ti mayela makusukiri, lomba kwe Yehova kakubakisa mu zabirila lwaka lwaku mu bungu dia musamu wo. Bu tâka misamu buna bu miena mu tusambulu twaku, ntangu bu yiyôka mbo kwizi tomo mona bwe Yehova kahanini mvutu mu tusambulu to. Tala ti mvutu ka yita kulu kwiza ko ha manima ma tusambulu twaku, kubikandi mu sambila. Yehova zololo ti kusukinandi kwa mu mu têla musamu buna bu wena, kâ watatamana mu mu sambila mu bungu dia musamu wo.​—Like 11:8-10.

8. Ntia misamu miakaka tufweti tâka mu tusambulu tweto?

⁸ Mu ntangu yi zonzelaka lwaka lwaku kwe Yehova, mu tondaka mpe. Musamu wa mbote wena mu kontaka tusakumunu tu tubakaka, ni bu sa ti misamu mia mpasi miamingi mie neto. Kâ, nti fweti sa tala ti kuta lenda ko mu tâ kwe Yehova mio mi ta mona ku mutima? Bambuka ti Yehova mbo kahanina tusambulu twaku mvutu ni bu sa ti ebu kwa mu têlele: ‘Mulemvo’aku kumbakisa!’​—2 Nta. 18:31; Rom. 8:26.

9. Nti tufweti sa bu tubâka na bunkuta?

⁹ (2) Sikirila ndwenga za Yehova, ka za nge beni’â ko. Mu ntangu ya mbikuri Izaya, kanda dia Yuda bunkuta bweri nawu bwa Bisi-Asiri beri dingaka babakotela. Kanda dia Yuda ka dieri’â zoloko ko Bisi-Asiri babanunga, ntiangu badinga lubakusu lwa Bisi-Ezipte. (Iza. 30:1, 2) Yehova wabakebesa ti lukwikulu lwawu mu Bisi-Ezipte mbo lubanata ku mfukulu. (Iza. 30:7, 12, 13) Mu nzila ya Izaya, Yehova watâ kwe kanda diandi bwe baketi bêla na kondo kwa bunkuta kwa matieleka. Watâ ti: “Ngolo zeno ni mu tatamana mu bâ mu tidzunu na mu bâ na lukwikulu” mu Yehova.​—Iza. 30:15b.

10. Ngano mu ntia misamu tulendi songela lukwikulu lweto mu Yehova?

¹⁰ Mu ntia ntangu tulendi songela lukwikulu lweto mu Yehova? Tabongeno mwa bifwani. Bakuheni tisalu tifutaka bubote, kâ tisa ti wayôkesaka ntangu yayingi mpe tikukabakasa mu tomo sarila Yehova. Peleko muntu wu lusalaka wukwe ku zolo, kâ ka tiena tisari tia Nzambi ko tia batusu. Peleko muntu wa kanda diaku wukukebese ti: “Sola ka nani landa, meno peleko Nzambi’aku.” Mu misamu miamiansoni, nzengolo yi bonga mpasi yena, kâ mu musamu ni musamu, Yehova mbo kakuhana lutwalusu lwe naku nsatu. (Mat. 6:33; 10:37; 1 Kor. 7:39) Tiyuvu ni eti, ngano mbo bâ na lukwikulu mu Yehova mpe mbo tumamana lutwalusu lwandi?

11. Ntia binsamu bia Bibila tulendi longoka mu tatamana mu bâ mu tidzunu mu ntangu yi tubâka mu nkwamusu?

¹¹ (3) Longoka mu nzila ya bifwani bia mbote na bia mbi. Mu Bibila mwe na binsamu biabingi bisongelaka ti nguria mfunu wena mu tatamana mu bâ mu tidzunu na mu bâ na lukwikulu mu Yehova. Bu kwe longoke binsamu bio, dimbitilaka nti biabakisa bisari bia Nzambi mu tatamana mu bâ na tidzunu bu beri mu nkwamusu za ngolo. Mu tifwani, mu ntangu Nzo ya Mfundusu ya Yinene ya Bayuda yayimina bantumwa mu vutu samunaka, bantumwa ka bayizi’â bâ na bunkuta ko. Kâ, bayizi tâ na butindi bwabwansoni ti: ‘Bubote, bu [tutumamane] kwe Nzambi na bu [tutumamane] kwe bantu!’ (Bis. 5:29) Ni bu sa ti bayizi bazwanda bisikoti, bantumwa ka bayizi’â bâ na bunkuta ko. Mu bungu dia nti? Mu bungu ti bazaba ti Yehova ku lweka lwawu keri. Yehova wayangalala mu ndiatulu’awu. Buna, batatamana mu samuna nsangu za mbote. (Bis. 5:40-42) Mpila mosi mpe, mu ntangu yi beri dingaka mu honda Etiene, Etiene watatamana mu bâ mu tidzunu, mpe tidiri tiandi tiayizi bâ ‘ntiana tidiri tia [mbazi].’ (Bis. 6:12-15) Mu bungu dia nti? Mu bungu ti lukwikulu lweri nandi ti Yehova mbo keri yangalalaka mu ndiatulu’andi.

12. Tintwari na 1 Piere 3:14 na 4:14, mu bungu dia nti tulendi bêlaka mu nsayi mu ntangu yi batukwamisaka?

¹² Bantumwa tidimbu tieri nawu tieri tomo ba songelaka ti Yehova ku lweka lwawu keri. Yehova wabahana lenda dia saka bimangu. (Bis. 5:12-16; 6:8) Lumbu ti, Yehova ka tuhanaka lenda ko dia saka bimangu. Ni bu sa ti ni bo, mu nzila ya Zu diandi, na luzolo lwalwansoni, Yehova mbo katuhanaka lukwikulu ti mu ntangu yi batumwisaka mpasi mu bungu dia buderede, mbo kayangalalaka mu beto mpe mpeve’andi mbo yibâka neto. (Tanga 1 Piere 3:14; 4:14.) Buna, kani tadinga mu zaba ka bwe tusa mu mfietokoso zikwiza, tufweti tûla mabanza meto mu mpila yi tulendi tungila lukwikulu lweto mu lenda die na Yehova dia tu bakisa na dia tu vukisa. Ntiana bwa sa milongoki mia ntete, tufweti bâ na lukwikulu mu kani dia sa Yezu: ‘Mbo niluhana ludede na mayela ma lembo tindila na ma lembo hanina batantu beno babansoni mvutu.’ Yezu watukanisina ti: ‘Mu korela kweno, ni mo luvukisila bilundi [luzingu] bieno.’ (Like 21:12-19) Mpe kani kabwe kuzimbakanandi ti Yehova mbo kalundaka mu nsimu’andi misamu mia fioti fioti mitariri bisari biandi bifwaka na kwikama kwakwansoni, mpe mbo kabavumbula kwe ba fwa.

13. Bwe tulendi bakila ndandu mu binsamu bia bantu balembana mu tatamana mu bâ mu tidzunu na mu kwikila Yehova?

¹³ Tulendi longoka binsamu bia bô balembana mu tatamana mu bâ mu tidzunu mpe mu kwikila Yehova. Ndongokolo ya bifwani bio bia mbi, mbo yitubakisa mu lembo kârila misamu mi bayirika. Mu tifwani, mutinu Aza bu kabatika mu tuma ku Yuda, mpe mu ntangu mukangu wa binwani wa wunene wayizi mu nwanisa, Aza wasikirila Yehova, mpe Yehova wamusakumuna bu kamubakisa mu nunga. (2 Nta. 14:9-12) Ha manima, mutinu Baasa wa ku Israele wayizi nwanisa Aza na mukangu wa binwani wa nkatika wa fioti. Kâ mu ntangu yo, Aza ka sikirila Yehova ko ngatu kamubakisa ntiana bu katoko bwa sa mu ntama. Kâ, Aza wafuta Bisi-Siri ngatu bamubakisa. (2 Nta. 16:1-3) Mpe bu keri penepene na lufwa lwandi, mu ntangu yi keri na timbevo tia ngolo, ka sikirila mpe Yehova ko ngatu kamubakisa.​—2 Nta. 16:12.

14. Nti tulendi longoka mu misamu mia mbi mia yirika Aza?

¹⁴ Ku mbatukulu, Aza mbo keri dingaka Yehova bu keri bâka na misamu. Kâ ha manima, ka sikirila lubakusu lwa Nzambi’andi ko. Wayela mu yirika misamu mu yandi beni. Ku mbatukulu, mpila ya sarila Aza bu kalomba lubakusu lwa Bisi-Siri ngatu banwanisa Israele, mbo yeri monekenaka ntiana ya nkatika ya mbote. Kâ tidzunu tiandi ka tiazingila ko. Mu nzila ya mbikuri, Yehova wamutêla: “Mu bungu ti lukwikulu tûriri mu mutinu wa ku Siri, kani watûla lukwikulu mu Yehova Nzambi’aku, ntiangu mukangu wa binwani wa mutinu wa ku Siri wutionokene ha koko kwaku.” (2 Nta. 16:7) Tufweti saka keba mu banzaka ti tulendi yirika misamu mieto beto beni ni bu sa ti Yehova ka tu twarisi’â ko mu nzila ya Zu diandi. Ni bu sa ti tufweti bonga nzengolo mu ntinu-ntinu, na tidzunu tiatiansoni tufweti sikirila Yehova, mpe mbo katubakisa mu bonga nzengolo ya mbote.

15. Nti tulendi sa bu tutangaka Bibila?

¹⁵ (4) Simba verse mu mutu. Bu bukilaka verse za Bibila zisongelaka ti mfunu wena mu tatamana mu bâ mu tidzunu na mu kwikilaka Yehova, sarilaka ngolo mu simba zo mu mutu. Lendi mona ti bubote bwena mu tumbulaka zu bu tangaka zo, peleko watsoneka zo mpe wavulu za tangaka. Yehova walomba kwe Yoswa katangaka buku dia Musiku ntangu zazansoni mu zu dia malembe ngatu kasarila ndwenga. Misamu mi keri tangaka mu Musiku mbo miaketi mu bakisa mpe mu lembo bâ na bunkuta, kâ mu twarisa kanda dia Nzambi na butindi bwabwansoni. (Yos. 1:8, 9) Verse zazingi za Bibila zilendi ku bakisa mu bâ na tidzunu mu misamu mivulu nataka lwaka peleko bunkuta.​—Mik. 27:1-3; Bin. 3:25, 26.

16. Bwe Yehova kasarilaka timvuka mu tu bakisa mu tatamana mu bâ na tidzunu na mu bâ na lukwikulu mu Yandi?

¹⁶ (5) Yôkesaka ntangu na kanda dia Nzambi. Yehova mpangi zeto kasarilaka mu tu bakisa mu tatamana mu bâ na tidzunu na mu bâ na lukwikulu mu Yandi. Ku tukutakanu tweto, mbo tubakaka ndandu mu ndongosolo zitubakaka mu nzila ya binzonzi, ya mvutu zi hanaka bantu, na mu bimoko bitungaka bi bâka neto na mpangi zeto. (Ebr. 10:24, 25) Tulendi baka mpe lutindusu lwalwingi mu ntangu yi tuzonzelaka misamu mitutâka lwaka kwe ndiku zeto za mutima za mu timvuka. “Musamu wa mbote” wutûkiri kwe ndiku wulendi tu bakisa mu lembo bâ na lwaka lwalwingi.​—Bin. 12:25.

17. Tintwari na Bahebre 6:19, bwe tivuvu tieto mu Timfumu tilendi tu sikamasa ntono misamu mia mpasi?

¹⁷ (6) Tatamana mu bâ na tivuvu tia ngolo. Tivuvu tieto mu Timfumu mbo tisalaka ntiana “ancre [tisengo tisikamasaka bato mu mamba] mu bungu dia tilundi,” titusikamasaka ntono misamu mia mpasi peleko mabanza matutâka lwaka. (Tanga Bahebre 6:19, NWT.) Dimbitila mu bungu dia makani ma Nzambi matariri bilumbu bia ku matu. Mu ntangu yîna ka ku bâ muntu ko wubâ mu lwaka. (Iza. 65:17) Timona mu nza ya môna ya tidzunu, ku lembo vutu bâ misamu mia mbi. (Mika 4:4) Mbo tomo yika tivuvu tiaku ngolo bu kwe zonzele nza ya môna kwe bantu bakaka. Sa miamiansoni mi lenda mu salaka tisalu tia samuna na tia kubikaka milongoki. Wamana sila bo, lendi “lunda lukwikulu lwalwingi mu tivuvu tii ku nsuka.”​—Ebr. 6:11, NWT.

18. Ntia misamu mia mpasi milendi tu turila mu bilumbu bita kwiza, mpe bwe tulendi lendela mu telamana mio?

¹⁸ Mu bungu ti nza yi ku nsuka yita kwenda, mbo tukwizi bâ na misamu miamingi mia mpasi milendi tu natina lwaka. Verse’eto ya muvu wa 2021 yilendi tu bakisa mu telamana misamu mio na mu tatamana mu bâ mu tidzunu, ka mu ngolo za beto beni’â ko, kâ mu lukwikulu lweto mu Yehova. Mu muvu wu, mu nsalulu zeto tasongeleno ti timinu tie neto mu kani dia Yehova ditâka ti: “Ngolo zeno ni mu tatamana mu bâ mu tidzunu na mu bâ na lukwikulu.”​—Iza. 30:15.