Tatamana mu baka ndandu mu tifu tia tînaka Nzambi

1-2. Ntiana Lote, ntia musamu wa mpasi Bakristo babwabanaka na wo?

BU TUMONAKA ndiatulu ya mbi ya bantu lumbu ti mbo tumonaka mio mieri monaka Lote. Yandi watomo ‘fwema ku mutima mu bungu dia ndiatulu ya nsoni ya baminsa-mbi,’ Wazaba ti Tata’eto die ku mazulu ndiatulu ya mbi kayinaka. (2 Pi. 2:7, 8) Bunkuta na luzolo mu Nzambi biatuma Lote mu losa ndiatulu ya mbi ya bantu beri mu zungirilaka. Beto mpe, bantu batuzungiriri balendi zitisa mitieno mia ndiatulu mia Yehova peleko kâni. Ntono musamu wo, tulendi tatamana mu bâ ba verela tala ti tusimbiriri luzolo na bunkuta bwa delakana mu Nzambi.—Bin. 14:2.

² Mu bungu dia musamu wo, Yehova mbo katuhanaka lutindusu mu buku dia Bingana. Bakristo babansoni, bakento na babakala, bantwenia na bantu ba nuna, balendi tomo baka ndandu mu malongi ma ndwenga me mu kati.

TIFU TIA TÎNA NZAMBI MBO TITUKENGERELAKA

3. Tintwari na Bingana 17:3, ntia musamu wusaka ti takengerela mitima mieto? (Tala mpe tifwani.)

³ Musamu wa mfunu wusaka ti takengerela mitima mieto ni wena’eti Yehova mitima mieto kataluzulaka. Wuzololo tâ mbo kamonaka mio mi lembo monaka bantu bakaka, mpe zebi ka ntia mpila bantu twena. (Tanga Bingana 17:3.) Mbo katuzolo tala ti tufulusi mbanzulu zeto mu ndwenga zandi zilendi tu hana luzingu. (Za 4:14) Buna kani kabwe ka tufwema ko mu bungu dia ndiatulu ya mbi ya bantu na bungungu bwa Satana na bwa bankwa-mbi mu nza. (1 Za 5:18, 19) Bu tukwe pusane kwe Yehova, luzolo lweto na buzitu bweto mu Yandi mbo bikula. Mu bungu ti ka tuzololo’â ko mu fwemesa Tata’eto, mbo tuyinaka mbanzulu za sa masumu. Bu tubwabanaka na ntontolo ya yirika mbi, mbo tutiyulaka: ‘Mu bungu dia nti nidingila mu fwemesa muntu wakunsongela luzolo lwa lwingi?’—1 Za 4:9, 10.

4. Bwe tifu tia tîna Nzambi tiabakisila mpangi mosi mu lembo kota mu ntontolo?

⁴ Marta, mpangi ya yikento yibâka ku Croatie bayizi mu tonta mu sa bunsuza, têle ti: “Musamu wa mpasi weri kwe meno mu bâ na mabanza ma delakana na mu losa nsatu ya mona nsayi yilembo zingilaka ya masumu. Kâ bunkuta bwa Yehova bwakunkengerela.”b Mu bwe tifu tia tîna Nzambi tiamubakisila? Marta watâ ti mbo keri dimbitilaka mu misendo miaketi nata nzengolo ya mbi. Beto mpe tulendi sila bo. Musendo wa wunene ni wena’eti mbo tufwemesa Yehova mpe ka tuvutu’â bâ na bweso ko bwa mu sarila ntangu zazansoni.—Mba. 6:5, 6.

5. Ntia malongi tulendi baka mu tifwani tia Leo?

⁵ Bu tutînaka Yehova, mbo tusaka keba mu lembo sa tindiku na bô bayirikaka misamu mia mbi. Leo, bâka mu RDC, wayizi baka malongi. Ha manima ma mvula 4 bu kamana baka bateme, wayizi sa tindiku na bantu beri yirikaka misamu mia mbi. Wabanza ti tala ti yandi beni keri’â mia sarilaka ko, keri’â saka masumu ko kwe Yehova. Kâ, ntangu fioti kwa, ndiku zo za mbi zamunata mu nwa malavu mamingi na mu sa bunsuza. Wabatika mu banza mu mio mia mu longesa bibuti biandi bie Bakristo na mu nsayi yi kahombesa. Ngano ntia ndandu zamoneka? Wabatika mu banza mu mpila ya mbote. Na lubakusu lwa bakuluntu, wakâla kwe Yehova. Lumbu ti na nsayi yayansoni kasarilaka Yehova bu kena mukuluntu na mupasuri-nzila wa wunene.

6. Ntia tifwani tia bakento bole tuzonzela?

⁶ Tataluzuleno Bingana tikapu 9, mu tutangaka ti ndwenga na buzoba mbo bamonekesaka bio mu tifwani tia bakento bole. (Fwanakasa na Bisi-Rome 5:14; na Bisi-Ngalate 4:24.) Bu kwe tia tangi, zaba ti mu nza ya Satana bunsuza na porno bia batomono zolo. (Efz. 4:19) Buna, nkatika mfunu wena kwe beto mu tatamana mu tîna Nzambi na mu dioka mbi. (Bin. 16:6) Beto bansoni, babakala peleko bakento, tulendi baka ndandu mu misamu mie mu kati dia tikapu tio. Bakento bo mbo babazonzelaka ntiana bawu bata tâ mbila bô balembolo zaba misamu—bô “balembolo na bunsungu.” Muna mukento mbo wutâtaka ti: ‘Yizeno mu nzo’ani mpe lwadia bidia biani.’ (Bin. 9:1, 5, 6, 13, 16, 17) Kâ misamu mia swaswana miturilaka bantu batambulaka muna mbila yi bawâka.

KALA MBILA YA MUKENTO WA TIZOBA

7. Tintwari na Bingana 9:13-18, mbila yimosi kwe yinataka? (Tala mpe tifwani.)

⁷ Tazonzeleno mbila ya mukento wa tizoba. (Tanga Bingana 9:13-18.) Mbo katomo tâka mbila bô balembolo na bunsungu ti, ‘Yôkeleno ha’ mpe dieno malaki. Nti bibaturilaka? ‘Mbila zandi mbo zinataka ku nguria nsi ya ndiamu.’ Kampe mbo ta bambukila ntelo yo ya tifwani ye mu Bingana. Mbo batulwengesaka mu ‘mukento wa nzenza’ na mu ‘mukento wa tiyala.’ Mbo batutêlaka ti: ‘Nzo’andi yatinduka ku lufwa.’ (Bin. 2:11-19) Mu Bingana 5:3-10 mbo batulwengesaka mu ‘mukento wa nzenza’ we na ‘malu makôkaka ku lufwa.’

8. Ntia nsololo tufweti sa?

⁸ Bô bawirikilaka ‘mukento wa tizoba’ bafweti sola: Ngano mbo batambula mbila’andi peleko kâni? Beto mpe tulendi bwabana na nsololo ya mpila yo. Ntia nsololo tusa? Bu batulomba mu sa bunsuza peleko mu tala porno, ntiana bu biyôkaka mu media na mu Internet.

9-10. Ntia misamu misaka ti tasa keba mu ndiatulu ya bunsuza?

⁹ Misamu miamingi mia mbote misaka ti tasa keba mu ndiatulu ya bunsuza. ‘Mukento wa tizoba’ mbo bamuzonzelaka ntiana muntu wuta tâ ti: ‘Mamba ma balabiri ma lembama mena.’ Ngano ‘mamba ma balabiri’ ni nti? Bibila mbo difwanakasaka nsayi ya vukasa kwa nitu kwa bantu bakwelana na mamba ma lembama. (Bin. 5:15-18) Mukento na bakala balendi mona nsayi ya vukasa nitu mu mpila ya delakana mu makwela mawu. Kâ, ntia luswaswanu lwe ha kati dia ‘mamba ma balabiri.’ Musamu wo wulendi tarila bunsuza. Mu masweki wuvulu yôkelaka. ‘Mamba ma balabiri’ malendi bâ ma lembama tala ti bantu babenzi ti ka babazaba ko. Diangana nkatika bungungu bwena! Yehova miamiansoni kamonaka. Tala ti Yehova kata vutu tu tambula ko, wo ni musamu wuyôkele bubi wulendi tu turila, ka wena musamu wa nsayi ko. (1 Kor. 6:9, 10) Kâ misamu miakaka mie kô.

¹⁰ Bunsuza bulendi nata nsoni, mbanzulu za mona ti ka wena salu ko, zimi dilembolo kekolo, mpe makanda malendi mwangana. Diangana, mbo tusarila ndwenga bu tukala mbila ya mukento wa tizoba. Bantu babîngi mbo bahombesa tindiku tiawu na Yehova, mpe mbo babakaka bimbevo bilendi kulu ba honda. (Bin. 7:23, 26) Verse 18 ya tikapu 9 mbo yimanisinaka ebu: ‘Mbila zandi ku nguria nsi ya ba fwa zinataka.’ Buna, mu bungu dia nti babîngi batamburilaka mbila’andi yinataka ku lufwa?—Bin. 9:13-18.

11. Mu bungu dia nti tifu tia tala porno tie tia nguria tia mbi?

¹¹ Mutambu wakaka ni porno. Bantu bakaka mbo babanzaka ti tifu tia talaka porno ka tisaka tima ko. Kâ porno bantu yibebesaka, buzitu yibamanisaka, mpe musamu wa mpasi wena mu bika tifu tia talaka yo. Mu bungu ti binsinsia bio bia mbi zingila bizingilaka mu fwasuka bio mu mbanzulu zeto. Diangana, porno ka yikumaka nsatu za mbi ko; kâ mbo yivutu za yikaka ngolo. (Kol. 3:5; Zaki 1:14, 15) Yee, bô batalaka porno mbo batatamanaka mu yirika misamu mia mbi.

12. Bwe tusongela ti mbo tusaka keba mu binsinsia bilendi tu hana nsatu ya vukasa nitu?

¹² Bu twena Bakristo, ngano nti tufweti sa tala ti tifwani tia porno timonekene mu appareil électronique’eto? Na manzangu mamansoni tufweti tia katula. Ka wubâ musamu wa mpasi ko kwe beto mu sila bo tala ti tubakuri ti tima tiyôkele mfunu kwe beto ni tindiku tieto na Yehova. Binsinsia bi tumonaka ti ka yena porno ko bilendi tu hana nsatu ya vukasa nitu. Mu bungu dia nti tufweti bia losela? Mu bungu ti ka tuzololo’â ko na kani fioti mu sa bunsuza mu mutima’eto. (Mat. 5:28, 29) Mukuluntu wumosi wa ku Thaïlande we na nkumbu David têle ti: “Mbo nitiyulaka: ‘Ni bu sa ti binsinsia ka biena bia porno ko, ngano Yehova mbo kayangalala tala ti ntatamane mu tala bio?’ Mbanzulu za mpila yo mbo zikumbakisaka mu sarila ndwenga.”

13. Nti bitubakisa mu sarila ndwenga?

¹³ Tamana bâ na bunkuta bwa fwemesa Yehova mbo butubakisa mu sarila ndwenga. ‘Bandu dia ndwenga, ni tîna Yehova.’ (Bin. 9:10) Musamu wo mbo wumonekaka mu titini tia ntete tia Bingana 9, mu batutêlaka ti mukento wo wakaka wa tifwani, ni “ndwenga za matieleka.”

TAMBULA MBILA YA MUKENTO WA NDWENGA

14. Ntia mbila ya swaswana bazonzelaka mu Bingana 9:1-6?

¹⁴ Tanga Bingana 9:1-6. Mwawu mu mbo tutangaka mbila yitûkaka kwe Yehova Yandi we Titeko tia ndwenga za matieleka. (Bin. 2:6; Rom. 16:27) Tifwani ti basarilaka ni tia nzo ya yinene ye na makunzi ma 7. Tifwani tio mbo titusongelaka ti Yehova lukabu lwe nandi, mpe mbo kabwanaka bô bazololo mu sarila ndwenga mu luzingu lwawu.

15. Nti Nzambi katulombaka mu sa?

¹⁵ Tifwani tia mukento wumonekesaka “ndwenga za matieleka,” ti bazonzelaka mu Bingana tikapu 9, mbo titulongesaka ti Yehova lukabu lwe nandi mpe bima biabingi katuhanaka bia mbote. Verse zo mbo zitutêlaka ti mukento wo tikisi bantu mu kota mu nzo’andi mu dia bima bia mbote bi kalembi, ntiana ngombe na vinu. (Bin. 9:2, note) Tintwari na verse 4 na 5: “[Ndwenga za matieleka] mbo zitâka kwe bô balembolo na bunsungu ti: ‘Yizeno lwadia bidia biani.’” Mu bungu dia nti tufweti tamburila mbila ya mukento wo? Yehova zololo ti bala bandi babâ na ndwenga mpe ka babândi mu bunkuta. Ka zololo’â ko ti tatâ makuba matumwisa mpasi. Ntiangu kalundaka ndwenga mu bungu dia bantu ba sungama. (Bin. 2:7) Bu tutîna Yehova, ka tuzolo’â ko mu mu niongesa. Mbo tuwirikilaka malongi mandi ma ndwenga, mpe tuzololo mu sarila mo.—Zaki 1:25.

16. Bwe tifu tia tîna Nzambi tiabakisila Alain mu bonga nzengolo ya ndwenga, mpe ntia ndandu zamoneka?

¹⁶ Banza’eti ka bwe tifu tia tîna Nzambi tiabakisila Alain mu bonga nzengolo ya mbote. Alain mukuluntu wena mu timvuka mpe ku lukolo kalongesaka. Têle ti: “Bampwana’ani ku salu mbo beri banzaka ti filme za porno mpila yena ya baka malongi mu musamu wutariri vukasa kwa nitu.” Kâ Alain ka hunakana ko. Têle ti: “Mu bungu dia bunkuta bwa Nzambi, nakala mu tala filme zo, mpe natêla bampwana’ani ka mu bungu dia nti ndieri karilaka.” Alain wasarila malongi ma “ndwenga za matieleka” mu ‘diatila mu nzila ya mayela.’ (Bin. 9:6) Bampwana’andi bayituku mu nzengolo ya ngolo yi kabonga, bakaka mu bawu lumbu ti mbo balongokaka Bibila mpe mbo bakwizaka ku tukutakanu twa Bakristo.

17-18. Bantu batambulaka mbila ya “ndwenga za matieleka” ntia tusakumunu babakaka, mpe nti balendi kekolo? (Tala mpe tifwani.)

¹⁷ Yehova bu kasarila tifwani tia bakento bo, ni mu tu songela ka bwe tulendi bêla na luzingu lwa nsayi ku matu. Bô batambulaka mbila ya ‘mukento wa tizoba’ mbo bayêlaka mu mona nsayi mu nsalulu ya bunsuza. Ka babakulaka ko ti, mio mi bayirikaka mbo mibanatina misendo ku matu. Ndandu’awu ‘ku nguria nsi ya bafwa yena.’—Bin. 9:13, 17, 18.

¹⁸ Bô batambulaka mbila ya ‘mukento wa ndwenga’ misamu mia swaswana babwabana na mio ku matu. Mbo babakaka ndandu mu malaki ma batomo kubikaka ma mbote, malaki ma bidia bia timpeve bia mbote. (Iza. 65:13) Mu nzila ya mbikuri Izaya, Yehova watâ ti: ‘Kungwirikileno, dieno mpe bia bibote; mbo lubakila nienze’eno mu bidia bia mbote.’ (Iza. 55:1, 2) Mbo tulongokaka mu zolo bio bi zololo Yehova na mu yina bio bi kayinaka. (Mik. 97:10) Mpe mbo tubâka mu nsayi bu tutikisaka bantu bakaka mu baka ndandu za “ndwenga za matieleka.” Ntiana beto tufweti ‘kwaya mu zulu malonde me ku mumvuka: ‘Tizengi tie kô, kizi kû!’” Ndandu zi tubaka na zi babaka, ka zena kwa za ntangu yi ko. Mbo zizingila, mbo zituhana bweso bwa zinga mankululu bu tuta kwe ‘diatiri mu nzila ya mayela.’—Bin. 9:3, 4, 6.

19. Tintwari na Ekleziaste 12:13, 14, Nti tufweti tatamana mu sa? (Tala mpe kaku “Bu tutînaka Nzambi ndandu tubakaka.”)

¹⁹ Tanga Ekleziaste 12:13, 14. Buzitu bwabwîngi mu Yehova mbo butukengerela mpe mbo butubakisa mu tatamana mu bâ ba verela mu ndiatulu, na mu bâ penepene na Yandi mu ntangu yi ya mansukina. Bunkuta bo mbo bututuma mu tikisa bantu babingi mu dinga ‘ndwenga za matieleka’ na mu bakila zo ndandu.