TIMOKO 59
Lendi korela nkwamusu
Ntangu ni ntangu, Bakristo mbo babwabana na nkwamusu. Ngano fweti bâ na bunkuta?
1. Mu bungu dia nti tufweti bwabana na nkwamusu?
Bibila ditêle ti: “Bô babansoni bazololo mu bâ ba kangama kwe Nzambi, tintwari na Kristo Yezu, mbo babwabana na nkwamusu.” (2 Timote 3:12) Yezu bamukwamisa mu bungu ti keri’â kotaka misamu mia nza ya Satana ko. Beto mpe ka tukotaka misamu mia nza ko, buna ka tususumukaka ko mu ntangu guvernema za nza na mabundu batukwamisaka.—Za 15:18, 19.
2. Bwe tulendi kubamana mu nkwamusu?
Tufweti yika ngolo lukwikulu lweto mu Yehova bwawu bu. Dieka bo, bongaka ntangu ya sambilaka, mpe tangaka Bibila. Yendaka ku tukutakanu. Buna mbo bâ na ngolo ze naku nsatu mu telamana nkwamusu na butindi, ni zibâ nkwamusu za bantu ba kanda diaku. Ntumwa Paulo, wu bakwamisa, watsoneka: “Yehova ni tibakisi tiani; ka nibâ na bunkuta ko.”—Bahebre 13:6.
Tulendi kurisa butindi bweto mpe, bu tuvulu samunaka. Tisalu tia samuna mbo titubakisa mu sikirila Yehova na mu nunga bunkuta bwa bantu. (Bingana 29:25) Tala ti kurisi butindi bwa samunina bwawu bu, mbo tomo kubama mu tatamana mu samuna, ni bu sa ti guvernema ziyimini tisalu tieto.—1 Bisi-Tesalonike 2:2.
3. Bwe tulendi bakila ndandu mu ntangu ya nkwamusu?
Diangana, ka tuzololo’â ko batukwamisaka, kâ bu tulendaka mu korela, timinu tieto ngolo tikwizi bâka. Mbo tubâ ndiku za Yehova mu bungu ti mbo tumona lubakusu lwandi, ngolo zeto bu zisukaka. (Tanga Zaki 1:2-4.) Yehova mbo kafwemaka bu tumonaka mpasi, kâ nsayi yi bâka nandi bu tukorelaka. Bibila ditêle: “Tala ti lukorele mpasi mu bungu ti mbote lusiri, musamu wa mbote wena kwe Nzambi.” (1 Piere 2:20) Musendo wu hana Yehova kwe bô bakorelaka na kwikama, ni luzingu lwa mankululu mu nza yikondolo nkwamusu mu bungu dia nsambululu ya matieleka.—Matie 24:13.
YIKA NDILU
Dzukula ntia ndandu tubaka, mpe mu bungu dia nti tulendi bêla ba kwikama kwe Yehova ntono nkwamusu.
4. Lendi korela nkwamusu za kanda
Yezu watomo zaba ti bantu bakaka mu kanda balendi lembo zolo ti beto tasarila Yehova. Tangeno Matie 10:34-36, mpe zonzeleno tiyuvu eti:
Nti bilendi tûla, muntu wa mu kanda wusolaka mu sarila Yehova?
Mu mona tifwani timosi, taleno VIDEO, mpe zonzeleno tiyuvu tita landa.
Nti lendi sa tala ti muntu wa kanda peleko ndiku yiyêlele mu ku kabakasa mu sarila Yehova?
Tangeno Mikunga 27:10 na Marke 10:29, 30. Bu lumana tanga muna verse, zonzeleno tiyuvu eti:
Bwe kani dio dilendi ku bakisila mu telamana nkwamusu za kanda peleko za bandiku?
5. Tatamana mu sarila Yehova ntono nkwamusu
Butindi budinganaka mu ntangu bantu bakaka bayêlaka mu tu kabakasa mu sarila Yehova. taleno VIDEO, mpe zonzeleno tiyuvu tita landa.
Bwe bifwani bia mu video bita ku hanina butindi?
Tangeno Bisalu 5:27-29 na Bahebre 10:24, 25. Bu lumana tanga muna verse, zonzeleno tiyuvu eti:
Mu bungu dia nti we nkatika mfunu mu tatamana mu sarila Yehova ni bu sa ti bayimini tisalu tieto tia samuna na tukutakanu?
6. Yehova mbo kakubakisa mu korela
Mbangi za Yehova za mvula na mbuka za mpila na mpila zatatamana mpe mu sarila Yehova mu ntangu ya nkwamusu. Mu zaba nti biababakisa, taleno VIDEO. Ha manima zonzeleno tiyuvu tita landa.
Mu video, nti biabakisa Mbangi za Yehova mu korela?
Tangeno Bisi-Rome 8:35, 37-39 na Bisi-Filipe 4:13. Bu lumana tanga muna verse, zonzeleno tiyuvu eti:
Bwe verse yo yita ku hanina lukwikulu ti lendi korela nkwamusu ni nkwamusu?
Tangeno Matie 5:10-12, mpe zonzeleno tiyuvu eti:
Mu bungu dia nti lendi bêla mu nsayi ntono nkwamusu?
Milio za bisari bia Yehova zalenda mu korela nkwamusu. Mbo lenda mpe!
TALA TI BAKUTÊLELE: “Ka ndendi’â nakorela nkwamusu ko.”
Ntia verse zilendi ba hana lukwikulu lwe nawu nsatu?
MU BUKUFI
Yehova tomono zolo ngolo zi tusarilaka ntono nkwamusu. Na lubakusu lwandi, mbo tulenda mu korela!
Biyuvu bia mbambukulu
Mu bungu dia nti Bakristo bafweti bwabana na nkwamusu?
Nti lendi sa bwawu bu mu bâ wa kubama mu ntangu ya nkwamusu?
Nti bilendi tu hana lukwikulu ti mbo tulenda mu sarila Yehova ntono nkwamusu?
ZABA BIAKAKA
Tala mpangi yimosi yita tâ bwe Yehova kamubakisila bu bamukotesa boloko mu bungu ti kakota misamu mia nza ko.
Tala nti biabakisa bantu ba kwelana mu tomo sarila Yehova mvula zazingi ntono nkwamusu.
Longoka bwe telamana nkwamusu na butindi.
“Kubameno bwawu mu bungu dia nkwamusu” (Nzo ya Zangama ya Munkengi, juillet 2019)
Bwe tufweti mwinaka nkwamusu za mu kanda, mpe bwe tulendi telamana misamu mi zitulumunaka?