Biyuvu bia bitangi

Ngano banani beri bapolisie ba ku Tempelo ya Bayuda? Ngano ntia bisalu beri salaka?

Bala ba Levi bakaka balembo bâ nganga-nzambi mbo beri salaka bisalu biakaka ntiana tia bâ polisie. Mu lutumu lwa mfumu (Capitaine) ya ku Tempelo beri salaka. Titsoniki timosi tia Bayuda ti batâka nkumbu Philo tele, nti bisari biango bieri saka: “[Bala ba Levi] bakaka mielo mi beri kotelaka ku Tempelo beri kengerelaka. Bakaka mbuka ya santu beri kengerelaka. Bawu mbo beri saka ti ka ku bandi muntu wusa lutambi mu mbuka ya santu ni bu sa ti ka weyi’â wo ko. Bakaka mbuka yayansoni ya Tempelo beri kwe zungane mu kengerela yo. Mpimpa na mwini beri zunganaka Tempelo yayansoni mpe yongasana beri yongasanaka.”

Sanedre (Sanhédrin) mpe, mbo yeri lombaka kwe polisie zango mu ba bakisa. Ni bawu kwa luyalu lwa ku Rome lwahana nswa wa bâ na binwanunu.

Muntu wumosi wa mayela wu batâka nkumbu Joachim Jeremias watâ ti: “Yezu wayula kwe bisari biayizi mu kanga mu bungu dia nti balembo mu kanga mu ntangu yi keri longaka ku Tempelo. (Mat. 26:55) Tala ti ka zeri’â polisie za ku Tempelo ko, ka keti’â bayula tiyuvu tio ko.” Muntu wo wa mayela mbo wubanzaka ti bantu beri toko dingaka mu kanga Yezu beri mpe polisie za ku Tempelo. (Za 7:32, 45, 46) Bilumbu biabingi ha manima, Sanedre yalomba kwe mfumu ya Tempelo na bisari biakaka babanatina bantumwa. Kampe bisari biango bieri mpe polisie za ku Tempelo.​—Bis. 4:1-3; 5:17-27; 21:27-30.