Biyuvu bia bitangi

Ngano musamu wa tsoneka Paulo mu 1 Bisi-Korente 15:29 wuzololo tâ ti Bakristo bakaka ba mu ntangu’andi mbo beri batusuku mu bungu dia bantu ba fwa?

Kâni, ka kwena tinsamu ko tizonzelaka musamu wo, Bibila mpe ka dizonzelaka wo ko.

Mpila yi babangurila verse yi mu Mabibila makaka mbo yinataka bantu bakaka babanza ti, Bakristo ba ntete bakaka mbo beri batusuku mu bungu dia bantu ba fwa mu ntangu ya Paulo. Mu tifwani Mabibila makaka mbo matâka: “Buna, tala ti ka kwena mvumbukulu ya ba fwa ko, mu nti babatusulu mu bungu dia bô bafwa?”

Kâ, tataleno mabanza ma bantu bole balongokaka misamu mia Bibila. Dr. Gregory Lockwood watâ ti mabanza matariri bantu beri batusuku “mu bungu dia bô bafwa,” ka bazonzelaka mo mu binsamu na mu Bibila ko. Mpila mosi mpe, Profesere Gordon Donald Fee watsoneka ti, ka kwena tinsamu ko peleko mabanza ma Bibila mazonzelaka Bateme ya mpila yo. Watâ ti kani kabwe ka bazonzelaka wo ko mu Nouveau Testament, mpe ka kwena na kani tidimbu ko tisongela ti Bakristo ba ntete peleko mabundu ma Bakristo malanda ntangu fioti ha manima ma lufwa lwa bantumwa ti mbo beri batusuku mu mpila yo.

Bibila mbo ditâka ti milongoki mia Yezu ntumunu ya ‘kubika milongoki, ya ba batisa, [. . .] ya ba longesa mu kêla misamu miamiansoni’ babahana. (Mat. 28:19, 20) Ntete muntu wabatusu mu bâ mulongoki, wufweti longoka mu zaba, mu kwikila mpe mu tumamana misamu mitariri Yehova na Mwana’andi. Muntu wa fwa we mu mpiema ka wulendi’â wayirika misamu mio ko, mpe muntu wa moyo ka wulendi’â wayirika misamu mio ko mu bungu dia muntu wa fwa.​—Ekl. 9:5, 10; Za 4:1; 1 Kor. 1:14-16.

Buna, Paulo bwe keri zolo tâka?

Bakristo bakaka ba ku Korente mbo beri tâka ti ka kwena mvumbukulu ko. (1 Kor. 15:12) Paulo wabasongela ti musamu wu beri tâka ka weri’â wa matieleka ko. Mu bwe? Wasongela ti bilumbu biabiansoni ‘wafungu lufwa.’ Wa matieleka, wa moyo kwa weri. Wabangula ti bilumbu biabiansoni lufwa keri funguku, kâ lukwikulu lweri nandi ti ha manima ma lufwa lwandi mbo kaketi baka mvumbukulu ya ku mazulu ntiana ya baka Yezu.​—1 Kor. 15:30-32, 42-44.

Bisi-Korente bafweti bakula ti, bâ Mukristo wa tumbu wuzololo tâ telamana nkwamusu bilumbu biabiansoni, mpe bafweti bakula ti ntete Mukristo wa tumbu wabaka mvumbukulu wufweti toko fwa. Bâ wa ‘batusu mu Kristo Yezu’ wuzololo tâ bâ wa ‘batusu mu lufwa lwandi.’ (Rom. 6:3) Buna, ntiana Yezu, mbo baketi mona mpasi mpe mbo baketi fwa ntete babaka mvumbukulu ya ku mazulu.

Mvula zole zike zayôka ha manima ma bateme’andi mu mamba, Yezu watâ kwe ntumwa zandi ti: ‘Bateme yi nibaka meno, beno mpe ya lubaka.’ (Marke 10:38, 39) Buna, Yezu ka vutu’â batusu mu mamba ko. Mu verse yo Yezu mbo keri songelaka ti kwikama kwandi kwe Nzambi mbo kwaketi mu nata ku lufwa. Paulo watsoneka ti Bakristo ba tumbu mbo baketi ‘mona mpasi na yandi, mpe mbo baketi bâ mu nsangu na yandi.’ (Rom. 8:16, 17; 2 Kor. 4:17) Kâ, bafweti toko fwa mu baka mvumbukulu ya ku mazulu.

Buna, mpila ya mbote ya bangurila musamu wa tsoneka Paulo ni eyi: “Tala ti ka ni buna ko, bô bata batusu mu kwizi fwa, ngano nti bata sa? Tala ti wa matieleka bantu ba fwa ka bafweti’â babavumbula ko, mu bungu dia nti bata batusu mu kwizi fwa?”