NDONGOSOLO 14

Tomo dukisa mabanza ma nguri

Bahebre 8:1

MU BUKUFI: Bakisa bantu bata ku wâ mu tomo landa tinzonzi tiaku, mpe tomo songela bwe mabanza ma nguri mata delakana na kani diaku na mutu-diambu.

MPILA YA SARILA:

Bâ na kani. Zaba tala ti kani dia tinzonzi tiaku ni mu wisa, mu hana nsangu, peleko mu tuma bantu mu sarila diambu dio, mpe tâ tinzonzi tiaku mu mpila yo. Bâ na lukwikulu ti mabanza mamansoni ma nguri mbo makubakisa mu lungisa kani diaku.

Tiyula: ‘Ngano bantu bata ku ngwâ ntia biyuvu na ntia makani malendi bâ nawu mu mutu-diambu wu? Ngano bwe balendi yurila biyuvu biawu peleko bwe balendi songela ntembe?’ Mpe yirika mabanza maku mu mpila yo ngatu bantu bata ku wâ batomo ku landa, babakula mpe batambula nsangu zo.
Tomo dukisa mutu-diambu wa tinzonzi tiaku. Mu tinzonzi tiaku bambula mutu-diambu bukwe kâriri ntêlo za nguri.
Dukisa mabanza ma nguri mu mpila yilembolo mpasi mu bakula. Sola kwa mabanza ma nguri ma delakane na mutu-diambu’aku mpe malendi tomo longesa mu ntangu yi fwanane. Kubika luntangu lwa mabanza ma nguri, tomo zonzela muna mabanza ma nguri, wumaka ntete watâ mabanza makaka, mpe songelaka ti mabanza ma ntete ma sukiri mu zonzelaka mabanza makaka.

Lendi zonzela mabanza ma nguri ha mbatukulu mu bakisa bantu bata ku wâ mu ku landa peleko lendi ma kârila mu mabanza maku ma mansukina mu babakisa mu simba mo.