Tukutakanu twa timvuka mu vidéoconférence

Tuyalu twatwingi mu nza twaheni musiku walembo bundakanaka (distanciation sociale) mpe twayizi yimina bantu babansoni mu vukanaka. Mbangi za Yehova zizololo mu zitisa musiku wo bu zita kwe tatamane mu kutakanaka mu mpila ya mbote. Dieka bo, bimvuka biayizi sarila applications za vidéoconférence ntiana Zoom, mu kutakanaka.

Mu bakisa bantu ngatu bakutakanaka bubote bu bata kwe tikengerele, Timvuka titwarisaka tiayizi sumba comptes za Zoom mu bungu dia bimvuka. Musamu wo watomono bakisa bimvuka bilembolo na lenda dia sumba compte ya Zoom ya vidéoconférence yifwaka ntalu yôka 15-20 $ (9 000-12 000 FCFA). Bimvuka bio mbo bivulu sarilaka applications za ofele peleko zilembolo za delakana. Bimvuka biabiansoni bisarilaka Zoom biabakiri comptes za Zoom za bawu beni zi balendi sarila mu mpila ya fwanana na bweso bwa kutakanaka na bantu babingi. Lumbu ti, bimvuka yôka 65 000 mu nsi yôka 170 bisarilaka comptes za Zoom

Timvuka tia Kairagi, ku Manado, ku nore ya Sulawesi, ku Indonésie tiayizi bika comptes ya vidéoconférence yilembo ya delakana yi tieri sarilaka mu sarila compte ya timvuka ya bawu beni. Mpangi’eto Hadi Santoso têle ti: “Ni zibâ mpangi zilembolo zaba mu sarila appareils zilendi bâ ku tukutakanu mu bungu ti ka basiri’â na nsatu ko ya tisaka connecter mbala zazingi mu lukutakanu lumosi.”

Lester Jijón, Jr., mukuluntu wumosi wa timvuka tia Guayacanes ku Guayaquil ku Équateur, têle ti: “Mu bungu dia mbaya ya mpangi zazingi, ka taketi’â bâ na lenda ko mu timvuka dia sumba comptes za Zoom zaketi bakisa timvuka tiatiansoni mu kutakanaka. Bwawu bu, mu bungu ti tulendi tisa connecter beto babingi, mu comptes za tu heni organizasio, tulendi lomba kwe bantu bakaka bizi ku tukutakanu, mpe ka twena na lwaka ko lwa yôkesa lutangu lwa connections zi tulendi sarila.”

Johnson Mwanza, mukuluntu wumosi wa timvuka tia Ngwerere-Nord ku hata dia Lusaka, ku Zambie, watsonekene ti: “Mpangi zazingi zayizi tâ, mbala zazingi ti: ‘Zoom ya timvuka yatomono tu bakisa mu bâka tintwari na mpangi zeto za mu timvuka, kâ yatubakisi mpe mu bakula ti Yehova beto kakipaka mpe beto kazoloko.’”

Comptes za Zoom zita sarilaka bimvuka, mu mbongo za lubakusu lwa mu ntangu ya catastrophes basumbiri zo. Mbongo zango mu makabu ma luzolo lwa mutima ma mu nza yayansoni zitukaka. Makabu mango mamingi bahaninaka mu donate.jw.org. Matondo mamingi mu bungu dia makabu meno ma luhaninaka mu luzolo, mu bakisisa bisalu biakaka mu nza.​—2 Bisi-Korente 8:14.