Yezu kêri ku zulu

Ku Galile, Yezu wabwabana na milongoki miandi. Yandi wabahana ntumunu ya nkatika mfunu: ‘Yendeno mpe kubikeno milongoki kwe bantu ba nsi zazansoni; ba longeseno misamu mi nalulongese, mpe ba batiseno.’ Ha manima, yandi wabakanisina: ‘Bambukakeno ti mbo nibâ na beno ntangu zazansoni.’

Bilumbu 40 ha manima ma mvumbukulu’andi kwe ba fwa, Yezu wamoneka kwe milongoki miandi miakaka ku Galile na ku Yerusaleme. Yandi wabalongesa malongi ma mfunu, mpe wasa bimangu biabingi. Buna, Yezu wabwabana na ntumwa zandi mbala ya mansukina ha zulu mongo wa Miti mia Olive. Yandi watâ: ‘Ka lukatukandi ku Yerusaleme. Tatamaneno mu kêla tima tia lu kanisini Tata.’

Ntumwa ka zeri’â bakulaka misamu mi keri tâka ko. Bawu bamuyula: ‘Ngano ni bwawu bu bâ mutinu wa Israele?’ Yezu watâ: ‘Ntangu ka yeka’eti fwana ko kwe Yehova ngatu meno nabâ mutinu. Ntamana, mbo lubaka ngolo za mpeve santu, mpe mbo lubâ mbangi zani. Yendeno lwasamuna ku Yerusaleme, ku Yude, ku Samaria na ku mbuka za nkatika mala ha mutoto.’

Dieka bo, Yezu wananguka ku zulu mpe tuti diamuyabama. Milongoki miandi ka mieri’â bîkaka ko mu tala ku zulu, kâ yandi wayenda.

Milongoki miakatuka ku mongo wa Miti mia Olive, mpe bayenda ku Yerusaleme. Bawu mu nzo yimosi yabâ mu zulu beri vulu kutakanaka mu sambila. Lutwalusu lwakaka lwaketi ba hana Yezu beri kêlaka.