Korneye bakiri mpeve santu

Ku Sezare, tinwani tia nsangu tia Bisi-Rome tieri bâka kô ti beri tâka nkumbu Korneye. Ni bu sa ti ka bâ Muyuda ko, Bayuda yandi beri zitisaka. Yandi watomo bakisa bamputu beri na nsatu lubakusu. Korneye timinu tiabâ nandi mu Yehova, mpe yandi keri sambilaka ntangu zazansoni. Tilumbu timosi, mbazi yamonekena Korneye, mpe yamutêla: ‘Tusambulu twaku Nzambi twa kawîri. Buna, tambika bantu ku mumvuka wa Zope, ku bâka Piere, mpe mu lomba mu kwiza kwe nge. Hô nkatika bendo, Korneye watambika bantu batatu ku Zope, ha titini tia kampe kilometre 50 ku side ya Sezare.

Mu ntangu yo ku Zope, Piere wabaka timona-meso. Yandi wamona bibulu bi bayimina kwe Bayuda mu dia, mpe wawâ zu diamutêla mu dia. Piere wakala, mpe watâ: ‘Mu luzingu lwani ka ndieka’eti dia tibulu tilembolo tia verela ko.’ Buna zu dio diamutêla: ‘Kutândi ti bibulu bio ka biena bia verela ko. Nzambi bia katsemese.’ Buna batâ mpe kwe Piere: ‘Bantu batatu bê ha mwelo’aku. Yenda na bawu.’ Piere wayenda ha mwelo mpe wayula kwe bantu bo nti beri dingaka. Bawu bamutêla: ‘Korneye tu tambikiri, tinwani timosi tia Bisi-Rome. Ku Sezare kwenda ku nzo’andi.’ Piere walomba kwe bantu bo mu yôkesa mpimpa na yandi. Tilumbu tialanda, bawu bayenda ku Sezare na mpangi zakaka za ku Zope.

Korneye bu kamona Piere, wafukama. Kâ Piere watâ: ‘Telama! Meno mpe muntu kwa ndiena ntiana nge. Nzambi kuntêlele mu kwiza kwe nge, ni bu sa ti Bayuda ka bakotaka mu nzo za bapaye ko. Buna kuntêla mu bungu dia nti kuntêlele mbila.’

Korneye watâ kwe Piere: ‘Bilumbu biyà biayôkele, Nzambi nabêle sambilaka, mpe mbazi yakuntêlele mu tambika bantu mu ku tikisa. Tala ti zololo, tu longesa Zu dia Yehova.’ Piere watâ: ‘Mbakuri ti Nzambi kena na tihambula ko. Bô babansoni bazololo mu mu sambila katambulaka.’ Piere wabalongesa misamu miamingi mitariri Yezu. Buna mpeve santu yakoka kwe Korneye na kwe bô beri na yandi, mpe babansoni babatusu.