Bambukileno mukento wa Lote

Lote na Abrahame keri bâka, mpangi ya tata’andi, ku nsi ya Kana. Abrahame na Lote bayizi bâ na bibulu biabingi, mpe ka bavutu’â bâ na mbuka ya fwana ko mu bungu dia bibulu biawu. Abrahame watâ kwe Lote: ‘Ka tulendi’â tavutu bâ ha mbuka yimosi ko. Buna, sola kûma ku kwenda, mpe meno mbo nikwenda ku lweka lwakaka.’ Diangana, Abrahame musamu wa nkatika wa mbote kayirika.

Lote wamona ti tizunga tiabâ penepene na Sodome tia nkatika tia toma tiabâ. Mamba mamingi mabâ kûna, matiti mpe mamingi. Buna, yandi wasola hata dio mpe waye bâ kûna na kanda diandi.

Bantu ba ku Sodome na ba hata diakaka diabâ penepene, Gomore, misamu mia mbi beri yirikaka. Mu bungu dia nsalulu zawu za mbi, Yehova wabonga nzengolo ya fukisa mahata mango. Mu bungu ti Yehova wazolo mu vukisa Lote na kanda diandi, watambika mbazi zole mu ba têla: ‘Seno manzangu! Dukeno ku hata dio, Yehova mbo kafukisa dio.’

Kâ Lote ka yenda ko mbala mosi. Yandi keri’â sarilaka manzangu ko. Buna, mbazi zabonga Lote, mukento’andi na bala bandi ba bole ba bakento mu moko, mpe babadukisa ku hata dio, bu babatêla: ‘Diokeno! Vukiseno luzingu lweno, ka lutalandi ku manima. Bu lutala ku manima mbo lufwa!’

Bu batûla ku hata dia Zoare, Yehova wanokesa tiya na sufre ku hata dia Sodome na dia Gomore. Mahata mo ma mole matomo fuka. Mukento wa Lote bu katala ku manima, watituka tifwiti tia mungwa! Lote na bala bandi ba bakento bavuka mu bungu ti batumama kwe Yehova. Lote na bala bandi bayizi bâ mu tiari mu mona ti mukento wa Lote ka tumama kwe Yehova ko. Kâ, bawu bayangalala mu bungu ti batumama kwe Yehova.