Buluku dia Balame dita zonza

Bala ba Israele ku tibiti (plaine) tia Moabe beri bâka, ku este ya nzari ya Zurde. Ku sese beri bâka kampe tûka mvula 40. Mimvuka miamingi banunga. Ntangu yafwana kwe bawu mu kota ku Mutoto wa Kani. Kâ Balake, mutinu wa ku Moabe, bunkuta bwabâ nandi ti bala ba Israele babonga nsi’andi. Buna yandi walomba kwe bakala dimosi di beri tâka nkumbu Balame mu kwiza ku Moabe ngatu katâ ndoko kwe bala ba Israele.

Kâ Yehova watâ kwe Balame: ‘Kufweti’â watâ ndoko kwe bala na Israele ko.’ Buna Balame wakala mu kwenda ku Moabe. Dieka bo, Balake wamulomba mbala ya nzole mu kwiza, mpe wamukanisina mu mu hana bima biabiansoni biabâ nandi nsatu. Kâ, Balame wavutu kala. Ha manima Nzambi wamutêla: ‘Tala ti wele, fweti tâ kwa misamu mi nikutêla.’

Balame wanaka ha zulu buluku diandi mpe wayenda mu nzila ya Moabe. Yandi wayenda mu kwe tâ ndoko kwe bala ba Israele, kâ Yehova wamuyimina mu lembo tâ ndoko kwe bala ba Israele. Mbazi ya Yehova yamoneka mbala zitatu mu nzila. Balame ka bâ na lenda ko dia mona mbazi ya Yehova, kâ buluku diandi diamona mbazi ya Yehova. Mbala ya ntete, buluku diakatuka mu nzila mpe diayenda ku musitu wumosi. Mbala ya nzole, buluku diasingama mu tibaka tia matari mpe dianietamana kulu kwa Balame. Mbala ya ntatu, buluku diasêka ha kati dia nzila. Ntangu zazansoni, Balame muti keri wawindaka kwe buluku diandi.

Ha manima, Yehova wazonzesa buluku. Buluku diatâ kwe Balame: ‘Mu bungu dia nti ta kungwindaka muti ntangu zazansoni?’ Balame wavutula: ‘Buzoba nita moneka mu bungu dia nge. Tala ti mbele yi bêleke nani mbo nketi ku honda.’ Buna buluku diamutêla: ‘Meno buluku diaku ndiena tûka mvula zazingi. Ngano ni bo nitoko ku bongelaka?’

Yehova wahana mpe lenda kwe Balame dia mona mbazi. Mbazi yatâ kwe Balame: ‘Yehova nge kalwengese, kufweti’â watâ ndoko ko kwe bala ba Israele.’ Balame wamuvuturila: ‘Musamu wa mbi ndirikiri. Ku nzo kwani ndieka kwenda.’ Kâ mbazi yamutêla: ‘Tala ti wele ku Moabe, fweti tâ kwa misamu mi ku têla Yehova.’

Ngano Balame wabakula malongi ma Yehova? Kâni. Mbala zitatu, yandi wayêla mu tâ bala ba Israele ndoko, kâ mbala yi Yehova wamutuma mu ngolo mu sakumuna Israele. Ha manima, bala ba Israele banwanisa Moabe, mpe Balame bamuhonda. Ngano ka bwabâ bubote ko kwe yandi mu wîla Yehova tûka ku mbatukulu?