Nkesi zamutuma mu honda muntu

Bu bamana duka mu nsaba ya Edene, Adame na Eva bayizi buta bala babingi. Mwana’awu wa ntete, Kayine, nsaba keri salaka, mpe mwana’awu wa nzole, Abele, muvungi wabâ, bibulu keri twilaka.

Tilumbu timosi, Kayine na Abele bayizi hana mikayulu kwe Yehova. Ngano mukayulu wa zebi? Kabu dia nzitukulu diena di bahana kwe Nzambi. Mukayulu wa Abele watâ Nzambi nsayi, kâ mukayulu wa Kayine ka watâ Nzambi nsayi ko. Mu bungu dia musamu wo Kayine wayizi baka nkesi. Yehova wamutêla ti nkesi zandi mbo zaketi mu tuma mu yirika musamu wa mbi. Kâ Kayine ka wîla Yehova ko.

Kayine watâ kwe Abele: ‘Yiza na meno, toko ku musitu.’ Buna bu babâ ha mbuka ya bawu kaka ku musitu, Kayine wabwila mpangi’andi mpe wamuhonda. Ngano Yehova nti kasa? Bu kamona misamu mia yirika Kayine, Yehova wasemba Kayine mpe wamutambika mala na kanda diandi. Mpe Kayine ka vutu’â bâ na lenda ko dia kâla mu kanda diandi.

Ntia malongi tuta baka mu tinsamu tio? Ntangu zakaka misamu milendi yilamana mu mpila yi tuta lembo banza. Tulendi kwizi bâ na nkesi zazingi—peleko muntu wulendi kwizi tu zonzela mu bungu ti beto kamweni mu nkesi—buna tufweti kulu zabirila nkesi zeto ntete zatuzabirila.

Abele, Yehova keri zoloko mpe misamu mia mbote keri yirikaka. Buna Yehova ka mu zimbakana ko. Yandi mbo kamuvumbula kwe ba fwa, bu katûla paradi ha mutoto.