Nzaza ya Noa

Bantu bayizi bâ babingi ha mutoto. Babingi ha kati diawu misamu mia mbi beri yirikaka. Mbazi zakaka mpe zayizi batika mu yirika misamu mia mbi. Bawu bakatuka ku zulu, ku beri bâka, mu kwiza ha mutoto. Ngano zebi mu bungu dia nti? Nitu ya bantu beri dingaka mu lwata ngatu bakwela bakento.

Mbazi zo zayizi buta bala na bakento bawu. Bala bawu bayizi kula mpe bayizi bâ na ngolo zazingi, mboko na miangu. Misamu mia mbi beri yirikaka kwe bantu bakaka. Yehova ka keti’â bika ko ti musamu wo wazingila. Buna Yandi wabonga nzengolo ya honda bantu babansoni beri yirikaka misamu mia mbi mu Delize, wuzololo tâ mvula ya ngolo yayizi fulusa mutoto wawansoni.

Kâ muntu wumosi wabâ kô wabâ wa swaswana na bantu babansoni. Muntu wango, Yehova keri zoloko. Nkumbu’andi Noa. Yandi, mukento wabâ nandi na bala batatu ba babakala: Seme, Kame na Yafete. Bala bandi mpe ba kwela babâ. Yehova watâ kwe Noa mu tunga nzaza ya yinene ngatu yandi na kanda diandi bavûka mu Delize. Nzaza ntiana caisse ya yinene yena yilendi yangama ha zulu mamba. Yehova watâ mpe kwe Noa mu kotesa bibulu biabingi mu nzaza ngatu bavûka mpe mu Delize.

Noa na kanda diandi bayizi sarila manzangu mu tunga nzaza. Mvula 50 basa mu manisa yo. Bawu bayizi tomo sa buna bwa ba lomba Nzambi. Mu ntangu yo, Noa wayizi tâ kwe bantu bakaka ti Delize mbo yaketi bwa. Kâ, na kani muntu wamuwirikila.

Ha manima, ntangu yafwana yi bakota mu nzaza. Mbo tumona misamu miayôka mu tinsamu tita kwiza.