Nzo ya zangama ya ku Babele

Ha manima ma Delize, bala ba Noa na bakento bawu babuta bala babingi. Makanda mawu mayizi bâ ma manene, mpe baye bâ mu mbuka za mpila na mpila ha mutoto, ntiana bwa ba têla Yehova.

Kâ, makanda makaka ka matumama kwe Yehova ko. Bawu batâ: ‘Tatungeno hata, mpe tabêno kû. Tayirikeno nzo ya zangama yinaka tii ku zulu. Buna, mbo tukwizi bâ nsangu.’

Yehova ka bâ na nsayi ko mu misamu mieri yirikaka bantu; buna Yandi wabakabakasa mu tatamana mu sila bo. Ngano zebi bwe? Yandi wasa ti bazonza mazu ma swaswana. Mu bungu ti ka beri’â lendaka ko mu bakula bampwana’awu, bawu babika tisalu tia ntungulu. Hata di beri tungaka bahana dio nkumbu Babele, wuzololo tâ “Vwandi.” Buna, bantu babatika mu kwe bâ mu mbuka zazansoni za ha mutoto. Kâ bawu batatamana mu yirika misamu mia mbi mu mbuka zi baye bâ. Ngano ha mutoto bantu babâ hô beri zoloko Yehova? Tinsamu tita landa mbo tihana mvutu mu tiyuvu tio.