Yohani

14 “Nzɨ ni bbari rid’o ni nanga bbo. Anidho udha Mungu nǎ; ndirigoti anidho udha ma nǎ maddi. 2 Madzá Baba bbá dza nǎ didha dhi nga kʉ bí. Ri ée fø nga ró, ma poéri po ni dho dhonalo ma ra ngathɨ ni dho. 3 Føri kina, njati rie nga ma ra thɨ ni dho ri ró, ma ki si ngʉ vi ndiro ma kó ni ma dhi ngana d’e, nja ma kʉ ná ngana ni ma é ddi d’e. 4 Ndirigoti ma ra ná ngana ra ná chu ni chuchu.”

5 Føro Tomas dhungʉeri: “Bboke, ko ngʉ ni ra ná nga ro ma chu nzá, ro ká ko ka ko chu fø ngana ra ná chu ngbaribbai?”

6 Yesu ngʉngʉe logoti: “Ma kʉ chu, bbʉbbʉlo, ndirigoti shinga. Ddikpa le ro ma nzá ddi ka ndi si Baba dhi ngana, rie nga ma chulu dhé ri ró. 7 Njati ni chue ma chu ró, ni ka ni chue madzá Baba maddi, ro kpadjonga djó ro ni chu ke chu ndirigoti ni nja ke nja.”

8 Føro Filipo pongʉeri: “Bboke, adho Baba ko dho, føri dhé kaka ró.”

9 Yesu ngʉngʉe logoti: “Filipo, ká føbø ko di ni ma na ro i ni d’e ma chu nzá dhé? Ddikpa ke nja ma ró, fø ke nja Baba maddi. Nde, ká addudho ni ripo, ‘Adho Baba ko dho’? 10 Ma tso gbani Baba na ndirigoti Baba tso gbani ma na nari ká ni d’e u nzá dhé? Ni dho ma po ná føri nga kʉ ma dhó ro si ná lo ri. Ro, ri kʉ ma tso gbani na ná ke, Baba i ndidzá njí nji ri. 11 Aniuri u nari kʉ, ma tso gbani Baba na ndirigoti Baba tso gbani ma na; rie nzá ni u føri ri ró, aniu ri ma nji ná njí kpari dhi lo dho ma che. 12 Bbʉbbʉ dhé ma ripo ni dho, njati ddikpa ke li ndidhó udha ma djo ró, fø ke maddi si ma nji ná njí nji; ndirigoti ke si ri nji ma nji ná nga djolu ma krʉ ddi, dhonalo ma ra madzá Baba dhi ngana. 13 Føri kina, ma ró dho na ni nzi ná ritsi krʉ ma si njinji; ndiro Baba ba madha le Ddù chulu d’e. 14 Njati ni nzi ddikpa ritsi ma ró dho na ró, ma si ri njinji.

15 “Njati ni ji ma ngbà ró, ni si ngarr rr madhó yadha dho. 16 Ma si nganzi Baba tso ndirigoti ke si ni tsotso kó* ná nja ke bbʉ ni dho, ná fø ke sie ni na theinga dho, 17 ná føri kʉ bbʉbbʉlo dhi roho, nzá ro dz’ ka ndi ba ná ri dhonalo dz’ nzá d’erie ri ro nja ri ndirigoti dz’ nzá chu ri ro chu maddi ri, ro ni i chu ri chu dhonalo kʉ, ri di ni ma na ddinga ndirigoti ri kʉ ni nǎ. 18 Ma nzɨ ni ro bba ddiro* ri. Ma ki si ngʉ vi ni dhi ngana. 19 Karrnga goti, dz’ nzɨ si ma nyi ro nja ri, ro ni i si ma njanja dhonalo ma di shi ndirigoti ni maddi si di shi. 20 Fø dyi ni si ri chuchu nari kʉ, ma tso gbani ddi madzá Baba na ndirigoti ni tso gbani ddi ma na ndirigoti ma tso gbani ddi ni na. 21 Njati ddikpa ke dhó é madzá yadha ná ri dho ke di ngarr ró, føri i kʉ jiji ma ná ke ndirigoti ngbà ji ma ná ke madzá Baba ma si jiji ddi, føri kina ma maddi si fø ke jiji ndirigoti ma si ma dho pʉlʉpʉlʉ ke dho.

22 Nja d’i Yuda, ro nga Iskariote ri, dhungʉeri: “Bboke, addu i ká liri ni neri ni dhǒ ni pʉlʉpʉlʉ ko dho dhé, ro nga dz’ dho ri?”

23 Føro Yesu ngʉngʉe logoti ke dho: “Njati ddikpa ke ji ma ró, fø ke si ngarr rr madzá lo dho ndirigoti madzá Baba si fø ke jiji føri goti ko si kodhó didha dhi nga li ke bba. 24 Nzá ji ma ná ke nzɨ adi ngarr madzá lo dho ri. Ma dhó ro ni rr ná lo nga kʉ madzá ri ri, ro ri kʉ cho chongʉe ma ná ke Baba dhó ro si ná lo.

25 Ma fø lo po ni dho go ma kʉ ni kana ná saa na. 26 Ma ró dho na Baba si nga tsotso kó ná ke roho takatifu cho ni dho, ná ke si krʉ kʉ ná lo ngaddi ni dho ndirigoti ke si krʉ ma ddingʉe ni dho ná lo ngano ni dho. 27 Ma bba ngoi ni kana; ma bbʉ madzá ngoi ni dho. Ma nzɨ ri bbʉ ni dho dz’ adi ri bbʉ nari bbai ri, nzɨ ni bba rid’o ni nanga ndirigoti nzɨ ni bbari ni ró klø sini do djotsina. 28 Ni rrngʉeri ma pongʉeri ni dho, ‘Ma rara ndirigoti ma ki si ngʉ vi ni dhi ngana.’ Rie ngbà ni jie ma ri ró, ni ka ni bae hwè ma ra Baba dhi ngana nari dho dhonalo Baba kʉ bbo pli ma djolu. 29 Føri dho kpadjo ma fø lo po ni dho nzá ri d’e njini ná saa na ndiro ri si njini ná saa na ni si ri uu d’e. 30 Ma nzɨ loti ni na bbo ri dhonalo i dz’ djó pi kʉ ná ke kʉ si ndi si ro; ndirigoti ke ro nga kʉ bbonga na ma djo ri. 31 Ro, ndiro dz’ churi ma ji Baba ji d’e ma adi Ke ja ma dho ná lo nganga nji. Anidani; akora ra iga ro.