Matayo

5 Birobiro kʉ ná ndrŭ ke njangʉe ro, ke djingʉe ngøtsɨ djo ndirigoti gʉna ke di nari goti, ke unakpa singʉe ke dhi ngana. 2 Føro ke ngangʉe longaddidha tso ndrŭ dho ɨ ndi ripo ro:

3 “Hwè na kʉ nari kʉ, ngbà churi ndima dhó lo u Mungu ná ndrŭ, dhonalo ra nǎ Pidhinga kʉ kpadhi ri.

4 “Hwè na kʉ nari kʉ, njedha na kʉ ná ndrŭ dhonalo kpa iso si pɨni pɨ.

5 “Hwè na kʉ nari kʉ, nyenyenga dhi ndrŭ dhonalo kpa dho dz’ si che.

6 “Hwè na kʉ nari kʉ, chølo dhi ù ma, ri dyu ma na na kʉ ná ndrŭ dhonalo kpa o si lili.

7 “Hwè na kʉ nari kʉ, zølo dhi ndrŭ, dhonalo kpa dho zølo si dhoni.

8 “Hwè na kʉ nari kʉ, tse thí tse ná ndrŭ, dhonalo kpa si Mungu nja.

9 “Hwè na kʉ nari kʉ, ngoi nji ná ndrŭ, dhonalo kpa si nzini Mungu dzá nzø.

10 “Hwè na kʉ nari kʉ, chølo djotsina nzani ná ndrŭ, dhonalo ra nǎ Pidhinga kʉ kpadhi ri.

11 “Ni kʉ hwè na njati ndrŭ di ni dhudhu ma, ni nzanza ma, inga ndrŭ di krʉ kʉ ná kali dhi lo ma na ti ni djo ma djotsina ró. 12 Aninji hwè ndirigoti aninji hwè bbo, dhonalo ni kobe kʉ bbo ra nǎ. Bbʉbbʉ dhé, ri kʉ føri bbai i ndrŭ nzangʉe ni njí ro ngʉe ná bbanabi maddi ri.

13 “Ni kʉ dz’ djó kʉ, ro njati kʉ vi ndidzá wáwánga vi ró, ká ridzá wáwánga ki ka ndi ngʉ ngbaribbai? Føro ridzá njí sini si ndirigoti ri kʉ bblo le d’rø ri ndrŭ tsi ri nanga ndima kó na.

14 “Ni kʉ dz’ djó kadha. Ngøtsɨ djó kʉ ná bba ro nzá ka ndi runi ri. 15 Tala nzɨ ndrŭ adi tø nja le lí ndi d’yó* tsena d’e ri, ro ri le adi li ri dho le thɨ ná ngana ndiro ri í nga adza kʉ ná ndrŭ krʉ dho d’e. 16 Føri bbai, anibbari nidhi kadha í nga ndrŭ nyǒ njí ndiro kpa nja nidhi bblo njí ndirigoti kpa bbʉ madha nidhi ra nǎ Baba dho d’e.

17 “Nzɨ ni ddiri ma si Sheria inga Bbanabi pongʉe ná lo sasa. Ma nzá si ri sasa ri, ro ma si ri njidha dho. 18 Bbʉbbʉ dhé, ma ripo ni dho ra ma, dz’ ma na ka ndi dada, ro Sheria nǎ sese pli kʉ ná lo inga fø lo lai ro ma nzá ddi ka ndi dá nzá krʉ kʉ ná lo njini ro ri. 19 Føri dzá lo dho, njati ddikpa ke di ngarr nzá yadha nǎ sese pli kʉ ná lo dho ndirigoti ke di riddi nja ndrŭ dho ndima njiri fø ró, ke sie sese pli ra nǎ Pidhinga nǎ. Ro, ddikpa ke di ngarr yadha nǎ sese pli kʉ ná lo dho ndirigoti ke di ri nga ddi nja ndrŭ dho ró, ke sie bbo pli ra nǎ Pidhinga nǎ. 20 Ma ripo ni dho njati nidhó chølo dá nzá nga ndi ná kpa ma, Bbafarisayo ma na dhó ri djolu ró, ni ro nzɨ tsu ra nǎ Pidhinga na ri.

21 “Ni rrngʉeri ni bbui dho le pongʉeri: ‘Ni dho nzá ringani ni hwi ndrŭ ri, ro njati ddikpa ke hwi ndrŭ ró, ke dho ringani ndi dhoni tribinale na.’ 22 Ro, ma ripo ni dho njati ddikpa ke di di thø na adjondi djo ró, fø ke dho ringani ndi dhoni tribinale na. Ndirigoti ddikpa ke po pá le le be na ná lo adjondi ni ró, fø ke dho ringani ndi dhoni Bbò Tribinale na. Njati ddikpa ke pori ‘Ni rɨchu!’ ró, fø ke dho ringani le bu ndi Gehena* dhi kazz na.

23 “Njati rie ni ra bbʉdha bbʉ mazabahu djo, ro ni nó ringa ni kana kʉ lo nidhi djona na ró, 24 abba nidzá bbʉdha føga mazabahu nji ndirigoti arara. Anji ngoi vi adjoni na ndirigoti angʉ ndidzá bbʉdha bbʉ.

25 “Njati ni kana é lo ddikpa ke na ró, anisi ni kana kʉ ná lo go ni kʉ chu nǎ ro, nzá ni d’e si tribinale nǎ ro ndiro nzɨ ke bbø ni lod’i ná ke dho ndirigoti nzɨ lod’i ná ke bbʉ ni prizo ronga b’o ná ke dhona ndirigoti nzɨ ke ni bu prizo na ró. 26 Bbʉbbʉ dhé ma ripo ni dho, ni ro nzɨ vʉ føtsi ro, njati ni bbʉ ni nǎ kʉ ná ddeni nzá kpø sese pli kʉ ná mbøkpa* djo ró ri.

27 “Ni rrngʉeri ri pongʉeni ɨ: ‘Ni dho nzá ringani ni njí uzinifu* ri.’ 28 Ro, ma rid’ra ni dho njati ddikpa ke di isɨle nja kpø ddo ndi ddo le na nari dyu si ndi na ná nga djo ró, fø ke nji uzinifu* fø le na b’lo ndi thí nǎ. 29 Njati rie ni nyǒ thá djó ri rili ni njí chenga ri ró, atu ri tu ni ró ro ndirigoti abu ri da. Dhonalo ri kʉ bblo pli ni vi ni ndí ró ddikpa sehemu ro, lu le ni bu Gehena* na nari djolu. 30 Føri kina, njati rie ni thó thá djó ri rili ni njí chelo ri ró, akrr ri krr ni ró ro ndirigoti abu ri da. Dhonalo ri kʉ bblo pli ni vi ni ndí ró ddikpa sehemu ro, lu le ni bu Gehena* na nari djolu.

31 “Føri kina ri pongʉeni: ‘Njati ddikpa ke kló ndoa nanga ndibbá le na ró, ringani ke bbʉ ndoa nanga kloni nari dhǒ ná barua le dhona.’ 32 Ro, ma ripo ni dho njati ddikpa ke kló ndoa nanga ndibbá le na, ro rie nga le nji uasherati* nari djó dhé ri ró, ke rili fø le njí uzinifu.* Ndirigoti klo dhó ndoa nanga kloni ná le kø ná ke nji uzinifu.*

33 “Ni rrngʉeri ki le pongʉeri ni bbui dho: ‘Ni dho nzá ringani ni tsoni ndirigoti ni njí ni tsoni djo ná lo nzá ri, ro ni dho ringani ni njí Yova* dho ni tsoni djo ná lo njí.’ 34 Ro, ma ripo ni dho: Nzɨ ni ro tsoni karrnø maddi; ra ró dho na ma, dhonalo ri kʉ Mungu dhó pi dhi kiti; 35 dz’ ró dho na ma nzɨ ddi, dhonalo ri kʉ ke kó ke adi li ná nga, Yerusalemu ró dho na ma nzɨ ddi, dhonalo ri kʉ bbò Pi bbá bba. 36 Nzɨ ni tsoni ni djǒ ró dho na maddi, dhonalo ni dho nzá ri ro ka ndi ka ni ngʉ ni djoka ddikpa ri ro maddi sawø inga tɨtɨ ri. 37 Anibbari ni tso nǎ ro si ná lo é ‘O’ ró ri di o, ro rie ‘Nzɨ’ ró ri di nzɨ, dhonalo føri kina le ndri ná lo adi si che kʉ ná ke dhó ro

38 “Ni rrngʉeri, ri pongʉeni: ‘Le nyǒ tø, ná le nyǒ le tøtø ndirigoti le kù ko, ná le kù le koko.’ 39 Ro, ma ripo ni dho: Nzɨ ni tøni chelo nji ndá ná ke tso ró, ro ddikpa ke b’ɨ ni bitɨ thá djó ri ró, ale ddi nga laidjó ri maddi ke dho. 40 Ndirigoti njati ddikpa ke bbø ni tribinale na ndiro ndi dzi ni ró atsi rù d’e ró, abba ni ró arugu rù maddi ke dho. 41 Ndirigoti bbonga na kʉ ná ddikpa ke lø ni kpakpanga na ni d’u no kilometre* ddi djo ró, ara ri na kilometre aro djo. 42 Ddikpa ke kó ritsi ni tsó ró, abbʉ ri bbʉ ke dho ndirigoti ddikpa ke jiri ndi wø ritsi* ni dhó ro ró, nzɨ jʉ ke tso.

43 “Ni rrngʉeri, ri pongʉeni: ‘Ringani ni ji ni lai ndirigoti ni ndro nidhó mbuba ndro.’ 44 Ro, ma ripo ni dho: Anira anzi nidhó mbubai ni ji nari na ndirigoti anidi sala nji nza ni nzá ná ndrŭ dho, 45 fø ni rinji nari na ni adi ridho nari kʉ ni kʉ nidhi ra nǎ Baba dzá nzø dhonalo ke adi dyi ká chelo dhi ndrŭ ma, bblolo dhi ndrŭ ma na djo ndirigoti ke adi dji kó chølo dhi ndrŭ ma, nga kʉ chølo dhi ri ná ndrŭ ma na djo. 46 Njati ni ji, jiji ni ná ndrŭ dhé ró, ká ni kobe kʉ addu? Kitas tso nju ná kpa ma ká adi rinji fø ddi nzɨ? 47 Njati ni di ni djoi kpali chu dhu ró, føga ká kʉ le nanga keni dho ná lo ro maddi? Nde, ndrŭ tsɨ ma ká adi rinji fø ddi nzɨ? 48 Ni dho ringani ni é ka ni ka* ro, nidhi ra nǎ Baba karie ka nari bbai.