Yohani
3 Bbafarisayo kana ddi ke ró dho ngʉe Nikodemu, ná føri ngʉe Wayaudi dho ngʉ adi chutso ddá ná kpa kana ddi ke. 2 Ke singʉe Yesu dhi ngana kuna ndirigoti ke pongʉeri: “Rabi, ko churi chu ni kʉ Mungu cho ná Mwalimu, dhonalo ni nji ná fø ddù kpari ro nzá ie ma ka ndi njí ddi ri, rie nga Mungu kʉ ndi na ri ró.” 3 Yesu ngʉngʉe logoti ke dho: “ Bbʉbbʉ dhé ma ripo ni dho, ddikpa ke ki gøni vi* nzá ró, fø ke nzɨ nja Mungu dhó Pidhinga ro ri.” 4 Nikodemu dhungʉeri ke tso: “B’lo ngʉ ngó ná ke ki ká ka ndi gøni vi ngbaribbai? Ke ki ro nzá ka ndi ngʉ ndidzá mama zz na ndiro ndi ki gøni vi d’e ri, ri ká nga fø ri?” 5 Yesu ngʉngʉe logoti ke dho: “Bbʉbbʉ dhé ma ripo ni dho, ddikpa ke gøni dda chulu ndirigoti roho chulu nzá ró, fø ke ro nzɨ tsu Mungu dhó Pidhinga na ri. 6 Le ndí chulu gøni nari kʉ le ndí, ndirigoti roho chulu gøni nari kʉ roho. 7 Nzɨ bbari ni nanga keni, ma pori ni dho: “Ndrŭ dho ringani ndima ki gøni vi” nari dho. 8 Vʉvʉ adi vʉ ndi ji ná nga laidjo, ndirigoti ni adi ri chu i rr nì, ro ni nzá chu ri ká si ngbaga ro ndirigoti ri ká ra ngbaga nari ro maddi ri. Roho chulu gøni ná ndrŭ dhó lo maddi e føri bbai.”
9 Føro Nikodemu dhungʉeri: “Nde, fø lo ká ka ndi njini ngbaribbai?” 10 Yesu ngʉngʉe logoti ke dho: “Ni i kʉ Israeli nǎ mwalimu, ro i ni chu fø lo nzá?” 11 Bbʉbbʉ dhé ma ripo ni dho, chu ko chu ná lo djo ko adi loti ndirigoti nja ko nja ná lo dzá bbʉbbʉnga ko adi dhodho. Ro, ni nzɨ ko adi dzá bbʉbbʉnga dhǒ ná lo ro uri. 12 Ma d’ra dz’ djó lo ni dho nari ni u nzá, ro føro ká ni ka ni u ra nǎ lo ma d’ra ni dho nari ngbaribbai? 13 Føri djolu pli, ddikpa le ro ma nzá ddi d’erie dji ra na ri, rie nga ra nǎ ro thʉngʉe ná ke, ndrŭ Ddù dhé ri ró. 14 Føri goti, ddiddi Musa ngbengʉe su ngødja nǎ nari bbai, ndrŭ Ddù dho maddi ringani ndi ngbeni, 15 ndiro ngbà u ke ná ndrŭ krʉ ba cho ró nŭnŭ di ná shinga d’e.
16 “Dhonalo, Mungu jingʉe dz’ bbo nari dho, ke bbʉngʉe ndidhi Dduna ddikpa dhé gøni ná ke, ndiro ngbà dhǒ udha ke nǎ ná ndi le nzɨ ba sadha, ro ndi le ba cho ró nŭnŭ di ná shinga d’e. 17 Dhonalo Mungu nzá chongʉe ndidhi Ddùna dz’ djo nja ke rá lod’i dz’ djo d’e ri, ro nja dz’ ba gødha ke chulu d’e. 18 Ddikpa ke dhǒ udha ke nǎ ngbà ró, fø ke djo nzɨ lo si d’ini ri. Ro, ddikpa ke dhǒ udha nzá ró, fø ke djó lo d’ini b’lo, dhonalo ke nzá dho udha Mungu dhi dduna ddikpa dhé gøni ná ke ró dho nǎ ri. 19 Lo le si d’i ndrŭ djo ró ro ná lo kʉ ena: “Kadha singʉe dz’ djo, ro ndrŭ jingʉe tɨtɨnga kadha rɨngana, dhonalo kʉ ndrŭ ngʉ nji ná lo ngʉe che. 20 Dhonalo kʉ ddikpa ke di che kʉ ná lo nji ró, fø ke ndro kadha ndro ndirigoti ke ro nzɨ si kadha na ri, ndiro nzɨ ndi nji ná lo djó nga nyani* ró. 21 Ro, ddikpa ke di chø kʉ ná lo nji ró, fø ke adi sisi kadha na, ndiro ndi nji ná lo tso gbani ngbà Mungu ji ná lo na nari dhoni pʉlʉpʉlʉ d’e.”
22 Føri goti Yesu ma rangʉe ndi unakpa ma na Yudea nǎ tsó nǎ kʉ ná eneo na. Ke ma ro dingʉe kpa ma na følu sese kʉ ná saa kana ndirigoti ke ngʉ batiso bbʉ. 23 Ro, Yohani maddi ngʉ batiso bbʉ ndrŭ dho Aenoni nǎ Salimu kuso, dhonalo føga dda ngʉe bbo ndirigoti ndrŭ ngʉ si ke dhi ngana nzá ndima nanga d’ɨni ro, føri goti ke ngʉ batiso bbʉ ndrŭ dho; 24 dhonalo kʉ Yohani nzá ndrŭ d’engʉe sʉ prizo nǎ ri.
25 Føro Yohani unakpa ma kana gʉ tangʉe ddikpa Muyaudi na tse le rili le tse nari djó. 26 Føri dho kpa singʉe Yohani dhi ngana ro, kpa pongʉeri ke dho: “Rabi, anja Yordani dzá chá dzɨ nga laidjó ni ngʉe ma na ndirigoti ni ngʉ lod’ra djo ná chá ke batiso bbʉ ndrŭ dho ndirigoti ndrŭ krʉ ra ke dhi ngana.” 27 Føro Yohani ngʉngʉe logoti: “Ddikpa ke ma nzá ddi ka ndi ba ddikpa ritsi ro maddi ri, rie nzá le bbʉ ri ke dhona ra nǎ ro ri ró. 28 Ni krʉ chu ma pongʉe ná i lo chu, ‘Ma nga kʉ Kristo ri, ro ma le chongʉe ke njí.’ 29 Ndoa-yi kʉ dhó ná føri i e ndoa-ba. Ro, ndoa-ba dhó kau di tøni ndirigoti ke di ndoa-ba chu rr ró, ke e hwè na bbo ke chu ndi rr nari dho. Føri bbai, madhó hwè tso maddi kaka. 30 Fø ke dho ringani ndi rá anzi ndidhó njí kana, ro ma i ngʉ sese.”
31 Arø ro si ná ke dada krʉ ndrŭ djolu. Ro, dz’ djó ro si ná ke kʉ dz’ djó ro si ná ke ndirigoti ke adi loti dz’ djó ritsi djo. Ro, ra nǎ ro si ná ke dada krʉ kʉ ná nja ndrŭ djolu. 32 Ke lod’ra nja ndi nja ndirigoti rr ndi rr ná lo djo, ro ddikpa le ma nzɨ ddi ke d’ra ná lo ro uri. 33 Ddikpa ke u ke d’ra ná lo u ró, fø ke uri u* nari kʉ Mungu kʉ bbʉbbʉlo dhi ke. 34 Dhonalo kʉ, ddikpa ke Mungu chó ró, fø ke adi Mungu dhó ro si ná lo d’ra, dhonalo Mungu adi ndidzá roho bbʉ ngadhi d’ya ro. 35 Baba jirie le Ddù ji ndirigoti ke bbʉ krʉ kʉ ná ritsi ke dhona. 36 Ddikpa ke dhǒ udha le Ddù nǎ ró, fø ke kʉ cho ró nŭnŭ di ná shinga na; ro ddikpa ke di ngarr le Ddù dho nzá ró, fø ke nzɨ ba shinga ro ri ndirigoti Mungu dhó thø ro nzɨ tuni ke djó ro ri.