Matayo

24 Hekalu nǎ ro Yesu ngʉ vʉ ro ke unakpa ndringʉeni ke kuso ndirigoti kpa dhongʉe ngbaribbai ma le chi hekalu nari ke dho. 2 Ke ngʉngʉe logoti kpa dho: “Ni ká fø ritsi krʉ nja nì? Bbʉbbʉ dhé, ma ripo ni dho iga nzɨ ddikpa dju ro ma si ma nja dju djo ddi nzá ndi glʉni ro ri.”

3 Mizeituni dhi ngøtsɨ djó Yesu ngʉ di ná saa na, ke unakpa singʉe ke dhi ngana, nga nja ndrŭ kʉ ná ngana ndirigoti kpa dhungʉeri ke tso: “Apori ko dho di, d’ʉ ká fø lo si njini ngbá saa na ndirigoti ni si b’lo* nari ma, i dz’* djó lo tso si d’ø nari ma na ká ko si nja ngbá lo ró?”

4 Yesu ngʉngʉe logoti kpa dho: “Anidi krr, nzɨ ni bbari ddikpa le ma shá ni ro ddi, 5 dhonalo bí kʉ ná ndrŭ si kʉ si ma ró dho na ɨ ndima ripo ro, ‘Ma kʉ Kristo’ ndirigoti kpa si bí kʉ ná ndrŭ shasha. 6 Ni si là dhi lo rr ndirigoti là djo ndrŭ loti nari rr. Ro, nzɨ ni bbari ni ronga tá dhonalo fø lo dho ringani ndi njini njí, ro ngatso d’ø ná saa sie nzá ndi d’e si go ro.

7 “Dhonalo nja ndrŭ tsɨ si dani ndima nji là nja ndrŭ tsɨ tso ró, nja pidhinga si dani ndi nji là nja pidhinga tso ró, ndirigoti nyo tso si vʉni vʉ, føri goti rɨ da nari si ngaba ddi ngana ndirigoti nja ngana. 8 Fø lo kpari krʉ sie bbobbo kʉ ná nzadha tso ngani ri.

9 “Ndrŭ si ni nzanza ndirigoti ndrŭ si ni cheche, føri goti krʉ kʉ ná ndrŭ tsɨ si ni ndrondro ma ró dho djotsina. 10 Føri dho bí kʉ ná ndrŭ thí si bʉni bʉ, ndrŭ si ndima nanga dzidzi ndima kana ndirigoti ndrŭ si ndima ndrondro ndima kana. 11 Bí kʉ ná kali dhi bbanabi si kʉ si ndirigoti kpa si bí kʉ ná ndrŭ shasha. 12 Ndirigoti yadha dho ndrŭ ngarr nzɨ nari si ra anzi nari dho, bí kʉ ná ndrŭ dhó jidha si djødjø. 13 Ro, ngbà ve ngatso kpø mwisho djo ná ke si gødha ba. 14 Ndirigoti Pidhinga dzá i hwè lo-i si d’rani dz’ djó ndrŭ di ná nga krʉ lu ndiro ndrŭ tsɨ krʉ chu lo ri djo d’e, ná føri goti i ngatso ve kʉ d’ø.

15 “Føri dzá lo dho, ddiddi nabi Danieli pongʉeri nari bbai, ni si ngasa ná nzá tsetse ná ritsi nja takatifu kʉ ná nga na ró, (lo zø ná ke di lo utsod’idha na), 16 Yudea lú kʉ ná ndrŭ dho ri si ngani ndima nyinga ngøtsɨ djo. 17 Dza djó le chɨ ná ngana kʉ ná ke nzɨ thʉni ndi rá ndibbá adzá kʉ ná ritsi sø, 18 ndirigoti nza gʉ é ná ke dho nzá ringani ndi ngʉ ndi ró arugu rù dzidha dho ri. 19 Njedha sie lɨnga dhi ndrŭ ma, ba bbʉ nzø dho ná ndrŭ ma na dho fø saa na! 20 Anidi nganzi ndiro nzɨ nga ni nyi ná saa ra si grì dhi bi na inga Sabato ddo dyina ró. 21 Dhonalo fø saa na si ngaba nari sie nzá ro d’erie ngaba nga le no ná nga djó ro kpø njʉnga djo ná mbudha, ndirigoti ri nzɨ ka si nga ki ro ba ri. 22 Fø ddo nanga le ngʉe ngʉ nzá ró, ddikpa le ro ma nzá ddi ka ndi gøeri, ro vʉ le vʉ ná ndrŭ djotsina le si fø ddo nanga ngʉngʉ.

23 “Njati ddikpa ke pori ni dho, ‘Aninjari! Kristo kʉ Iga’ inga, ‘Chaga!’ ró, nzɨ ni u ri. 24 Dhonalo kali dhi Kristo kpari ma, kali dhi bbanabi ma na si kʉ si ndirigoti kpa si bbobbo ddù ma, ké ka ndi ke le nanga ná ritsi ma na nji ndiro ndima shá, ngbà ri ka ró vʉ le vʉ ná ndrŭ ma krʉ d’e. 25 Aninja! Ma fø lo po ni dho nzina. 26 Føri dho, njati ndrŭ pori ni dho, ‘Aninja! Ke kʉ ngødja nǎ’ ró, nzɨ ni ra, inga ‘Aninja! ke kʉ chumba nǎ’ ró, nzɨ ni uri. 27 Dhonalo ndrŭ Ddù dhó sidha* sie, vo chá nari adi nga í dyi si ná nga nǎ ro kpø dyi tsu ná ngana nari bbai. 28 Bbŭ dhi rè si ndima tso nju, bʉ kʉ ná ngana.

29 “Mbudha dhi ddo da nari goti thei, dyi nyǒ djó nga si tɨtɨ, bi si ka ndi ká nari tso bbabba, dyødyø si d’røni d’rø ndirigoti rakpa ró kpakpanga kpari si jaja. 30 Føri goti ndrŭ Ddù si nari dhǒ ná lo si njani rakpa ro ndirigoti dz’ djó ndrŭ bbu krʉ si ndima badjo b’ɨ vodha dho. Føri goti ndrŭ si ndrŭ Ddù si ndundu djó kpakpanga ma, bbò kadha ma na nari nja. 31 Ndirigoti ke si ndidhó malaiká cho bbò kʉ ná ngøga chu na, ndirigoti kpa si vʉ vʉni ná ndrŭ tso nju ddingana ngø djó tho kʉ ná nga laidjó ro, ra tso ngani ná ngana ro kpø ra tso d’ø ná ngana.

32 “Anichu i lo figi dhi tsú dhó lo nǎ ro: Fø tsú lerr dzá jadda kʉ ná ri di ngʉ dde* ndirigoti ri bɨ maddi di tøtø ró, ni adi richu cho dyi kʉ chøchø. 33 Føri bbai, njati ni di fø lo krʉ njini nari nja ró, anichuri ke kʉ chøchø dzaitso ró. 34 Bbʉbbʉ dhé ma ripo ni dho, i gø nzɨ da nzá fø lo krʉ d’e njini ro ri. 35 Ra ma, dz’ ma na si dada, ro madzá lo ro nzɨ da ngbá dyi maddi ri.

36 “Fø ddo ma, fø saa ma na ro nzá ddikpa le ma chu ddi ri, ra nǎ malaiká ma nzá ddi, le Ddù ma nzá ddi, ro Baba dhé. 37 Noa cho nǎ ri ngʉe nari bbai, ri sie ndrŭ Ddù si ná saa* na maddi. 38 Ddiddi bbò Dji ko nari njí ri ngʉe nari bbai, ndrŭ ngʉ nganyo, ndrŭ ngʉ jødha dhi ritsi jø, kpetsi kpa ngʉ dhɨ kø, isɨ ndrŭ ngʉ køni kø kpø Noa tsu safina na ná nga djo. 39 Ndrŭ ngʉ di nga nyǒ djó lo nga ro, kpø Dji ko ndirigoti ndi sa kpa krʉ ná nga djo. Ndrŭ Ddù dhó sidha maddi sie føri bbai. 40 Føro aro kʉ ná kpetsi kpa sie nza gʉ, ddikpa ke le si dzidzi ndirigoti ddikpa ke le si bbabba. 41 Aro kʉ ná isɨ ndrŭ sie dju djó ndima ngau ro, ddikpa le le si dzidzi ndirigoti ddikpa le le si bbabba. 42 Anidi krr dhonalo ni nzá chu ngbá dyi ma nidhi Bboke si nari ro ri.

43 “Ro, anichu i lo: Njati dzaba chue kuna ngbá saa na ma gbʉ dhi ke si nari chu ró, ke ka ndi die kere ndirigoti ke nzá ka ndi bbaeri gbʉ tsu ndi bba ri. 44 Ri kʉ føri dho i, ni maddi anidi tayari dhonalo ndrŭ Ddù si si nzá djo ni ddinga ná saa na.

45 “Nde, chi njí dhi nyod’yu dhi noke ká kʉ ie, ndidzá bboke li ndi ndibbá dza nǎ ndrŭ djó ndiro ndi bbʉ nyo kpa dho ngbà thonga ná saa na d’e ro? 46 Hwè na kʉ nari kʉ fø noke, njati kedzá bboke si ke ro fø ndi rinji ro ró! 47 Bbʉbbʉ dhé ma ripo ni dho, ke si ke li ndidzá ritsi krʉ djo.

48 “Ro, njati fø noke é che kʉ ná ke ndirigoti ke di riddi ndi thí nǎ, ‘Madzá bboke rɨni rɨ,’ 49 ndirigoti ke nga ndi lai nja nokpa njidha tso, føri goti ke ma di nga ma nyo, wa ma jø nja warɨ ma na ró, 50 fø noke dzá bboke si si nzá djo ke ddienga ná dyi ndirigoti nzá ke chu ná saa na, 51 ndirigoti ke si malipizi bbʉ ke dho bbo pli ndirigoti ke si ke ma li aro kudjo dyʉ* kʉ ná kpa ma na. Følu i ke ka ve di dzzdzz ndirigoti ndi kudjo kǎ.