Luka

21 Føro Yesu ngbengʉe ndi nyǒ ro, ke njangʉe mali dhi kpa ndima dhó bbʉdha li bbʉdha dhi no na nari. 2 Føro ke njangʉe dhe bbá ke dhe ná njedha kʉ ná ddikpa le, sese pli dhó valer kʉ ná rere aro kʉ ná mbøkpa* djú ndi djo ri na ro, 3 ndirigoti ke pongʉeri: “Bbʉbbʉ dhé ma ripo ni dho, dhe bbá ke dhe ná njedha kʉ ná afø le li ná mbø dada nja ndrŭ krʉ li nari djolu. 4 Dhonalo nja ndrŭ krʉ bbʉ nari ndrŭ bbʉ ndima dhó nì kʉ nari kana ro, ro nì mai ndi kʉ njedha ro, fø le bbʉ shi ndi di d’e ka ndi b’oe ndi ronga nari krʉ.”

5 Luti, nja ndrŭ ngʉ loti hekalu djo ndirigoti ngbaribbai ma le thɨ ri ronga bbo d’ani ná dju ma, Mungu dho le bbʉ ná ritsi ma na na nari djo. 6 Ro, ke pongʉeri: “Ddikpa ddo ro si nì, ná dyi njʉ ni nja ná fø ritsi krʉ si glʉni glʉ, ddikpa dju ro ma nzɨ ddi si ma nja dju djo nzá ndi glʉni ro ri.” 7 Føro kpa dhungʉeri ke tso: “Mwalimu, d’ʉ ká fø lo si njini ngbá saa na ndirigoti ri si njini ná nga kʉ chøchø nari ká ko si chu addu ró?” 8 Ke pongʉeri: “Anidi krr, nzɨ ni bbari ndrŭ shá ni dhonalo bí kʉ ná ndrŭ si si ma ró dho na ɨ ndima ripo ro, ‘Ma i kʉ ke,’ føri goti ‘Li le li ná saa kʉ chøchø.’ Nzɨ ni ra kpa ulu. 9 Føri kina, ni si là dhi lo ma, ngbʉngbʉ ma na djo ndrŭ loti nari rr ró, nzɨ ni bbari ni ronga tá. Dhonalo fø ritsi krʉ dho ringani ndi njini vi, ro ngatso d’ø ná saa nzɨ si si thei ri.”

10 Føri goti ke pongʉeri kpa dho: “Nja ndrŭ tsɨ si dani ndima nji là nja ndrŭ tsɨ tso ró, nja pidhinga si dani ndi nji là nja pidhinga tso ró. 11 Bbobbo kʉ ná rɨ da nari si kʉ ngaba, ndirigoti nyo tso vʉni nari ma, nya ndi nanga nyá ná dhe ma na si ngaba ddi ngana ndirigoti nja ngana. Føri goti, do ka ndi tá le na ná ritsi ma, bbobbo kʉ ná alama ma na si njani rakpa ro.

12 “Ro, fø lo krʉ njini nari njí, ndrŭ si ndima thó li ni djo ndirigoti ndrŭ si ni nzanza. Ndrŭ si ni mba sinagogi ma, prizo ma na lu ndirigoti ndrŭ si ni mba pikpa ma, bbaguverner ma na nji lu. 13 Føri si kʉ chu bbʉ ni dho, nja ni d’ra lo d’e. 14 Føri dho, anivʉri vʉ ni thí nǎ nari kʉ, nzɨ ni kpe ngbaribbai ma ni si soni nari nzina, 15 dhonalo ma si kʉ bbʉ ni dho ná lo ma, nyod’yu ma na dho, ni tso ró ddani ná kpa njú ndima tso ddingana ma ró, kpa ro nzɨ si tøni ni tso ro inga ndima po fø lo dzá njonjo nga ri. 16 Føri kina, ni nanga si dzi nari sie nidhó gø dhi ndrŭ nganga ma, ni djoi ma, nidhó familia nǎ ndrŭ ma, nidhó bbakau ma na, ndirigoti kpa si ni kana nja ndrŭ cheche, 17 ndirigoti krʉ kʉ ná ndrŭ si kʉ ni ndrondro ma ró dho djotsina. 18 Ro, ni djoká ddikpa ri ro ma nzɨ ddi si vi ri. 19 Ni si nidhi shinga ronga b’o* nidhó ngatsovedha chulu.

20 “Ro, ni si Yerusalemu ronga tso bbasødda d’e nari nja ró, anichuri chu ri dhó sadha kʉ chøchø. 21 Føro Yudea lu kʉ ná ndrŭ nyinga ngøtsɨ djo ndirigoti Yerusalemu nǎ kʉ ná ndrŭ vʉvʉ ri nǎ ro ndirigoti nza gʉ lu kʉ ná ndrŭ nzɨ ngʉ Yerusalemu na, 22 dhonalo føri kʉ chølo si njini* ná dyinga ndiro ndi ndini ná lo krʉ si njini d’e. 23 Njedha sie lɨnga dhi isɨ ndrŭ ma, ba bbʉ nzø dho ná ndrŭ ma na dho fø ddo na! Dhonalo ngø djo bbò kʉ ná nzadha si kʉ ngaba ndirigoti i ndrŭ djo bbò kʉ ná thø si kʉ ngaba. 24 Kpa ndrŭ si che sà na ndirigoti kpa le si mba njonjo kʉ ná ndrŭ tsɨ dhó no tsena ndirigoti Yerusalemu nanga ndrŭ si tsitsi ndima kó na, kpø ndrŭ tsɨ dho le bba ná saa tso d’yani ná nga djo.

25 “Føri kina, alama si dhoni dyi ma, bi ma, dyødyø ma na na ndirigoti ngø djó ndrŭ tsɨ sie njedha na bbo, føri goti jʉdda mbø nari ma, dda-gru ndi bú nari ma na dho ndrŭ nzɨ si ndima nji ná lo ro churi. 26 Ndrŭ si cheni che do dho, dz’ djo si ná lo ndima b’o ro, dhonalo rakpa ró kpakpanga kpari si jaja. 27 Føri goti ndrŭ si ndrŭ Ddù si ndundu nǎ kpakpanga ma, bbò kadha ma na nari nja. 28 Fø lo njini nari tso ngani ró, anitøni mbrø ndirigoti anida ni djǒ dhonalo nidhó gødha si chøchø.”

29 Føri goti ke bbʉngʉe i loroji kpa dho: “Aninja figi dhi tsú ma, nja tsú ma na. 30 Tsú bɨ di ddedde ró, ni adi richu nari kʉ, bbo kazz adi o ná saa kʉ chøchø. 31 Føri bbai, njati ni di fø lo krʉ njini nari nja ró, anichuri Mungu dhó Pidhinga kʉ chøchø. 32 Bbʉbbʉ dhé ma ripo ni dho, i gø nzɨ da nzá fø lo krʉ d’e njini ro ri. 33 Ra ma, dz’ ma na si dada, ro madzá lo ro nzɨ da ngbá dyi maddi ri.

34 “Ro, anib’o ni ronga ndiro nzɨ ni thí ngʉ lì, bbo le nganyo nari ma, bbo le wa jø nari ma, maisha nǎ lo le nanga d’o nari ma na na ró, ndiro nzɨ fø ddo ra si ni ro chʉ nzá djo ni ddienga ná saa na, 35 mutego bbai ró, dhonalo ri si kʉ si dz’ djó di ná krʉ kʉ ná ndrŭ djo. 36 Føri dho, anidi kere ndirigoti anidi ddo nǎ le ddoni ná sala nji krʉ saa ró, ndiro ni nyí fø dyi si kʉ njini ná fø lo krʉ tso ndirigoti ni si kʉ tøni ndrŭ Ddù njí d’e.”

37 Dyina ke ngʉ adi longaddi hekalu nǎ, ro kuna ke ngʉ adi ra ddo Mizeituni dhi ngøtsɨ djo. 38 Krʉ kʉ ná ndrŭ ngʉ adi si bbʉtsó kukú hekalu na ndiro ndima rr ke d’ra ná lo d’e.