Matayo

20 “Ra nǎ Pidhinga le ka le ddi, ddikpa dza dhi bboke dani bbʉtso kukú ndiro ndi li njí dhi kpa ndidhó divai dhi nza gʉ d’e nari na. 2 B’lo ke ma rrni njí dhi kpa na njati kpa njinjí dyina blii ró, ndi si dinari* ddikpa bbʉ kpa dho nari goti, ke chongʉe kpa divai dhi nza gʉ. 3 Chøchø saa tatu* na ndi vʉ ro, ke singʉe nga dhó njí kʉ ná nja kpa ki ro soko rɨ nǎ ndima tøni ro. 4 Ke pongʉeri fø kpa dho, ‘Ni maddi, anira divai dhi nza gʉ. Ma si ni kobe bbʉ ngbà thonga nari bbai ró.’ 5 Føro, fø kpa rangʉe ra nza gʉ. Føri goti ke ki ra saa sita* si ro ndirigoti saa tisa si ro dyina; føro maddi ke si ri ki nji fø. 6 Mwisho ke ki rangʉe saa 11 si ro, føro ke singʉe nja kpa ki ro føga ndima tøni ro; ro ke dhungʉeri kpa tso: “Ni ká tøni iga blii nga dhó njí ro addudho?” 7 Kpa ngʉngʉe logoti, ‘Ri kʉ ko ro nzá ndrŭ nzi njí dho ri nari dho.’ Føro ke pongʉeri kpa dho, ‘Ni maddi, anira njínji divai dhi nza gʉ.’

8 “Ngasdjó nga si ro, divai nza dhi bboke pongʉeri ndidhó njí dhi kpa djó bbonga dho, ‘Anzi njí dhi kpa ndirigoti abbʉ kpadhó mbø. Anga ri tso ya mwisho sie ná kpa djó ro, ndirigoti ni dyá ri tso ya kwanza sie ná kpa na.’ 9 Saa 11 na sie ná kpa si ro, kpa krʉ dho le bbʉngʉe dinari* ddi ddi. 10 Føro ya kwanza singʉe nza gʉ ná kpa si ro, kpa ngʉ riddi ndima dho le ka le bbʉ ri fønga djolu ri, ro kpa dho ma le bbʉngʉe ri ddi ddi dhé. 11 Ri le bbʉ kpa dhona ro, kpa nanga ngangʉe nudha tso dza dhi bboke djo, 12 ndirigoti kpa ngʉ ripo, ‘Ya mwisho si ná i kpa njinjí saa ddikpa dhé. Ro i ni bbʉ mbø kpa dho ko na ddiddi, ko i ngʉ njínji kpakpanga na dyi kpà lili nǎ blii ro?’ 13 Ke ngʉngʉe logoti kpa kana ddikpa ke dho, ‘Ma lai ke, ma ro nzá tani ni dho ri. Ni na ká nzá ko rr eni dinari* ddikpa djo ri? 14 Ako nidhó mbø ndirigoti arara. Ma jiri ma bbʉ ri ya mwisho si ná i kpa dho ni dho ma bbʉ ri ná ngatsi nganga. 15 Ma dho ká ri tso uni nzá ma njí ma thí ji ná lo madzá ritsi na? Inga ni nyǒ ká kʉ dda na* ma bblolo nji* nari dho?’ 16 Ri kʉ fø chu nǎ i, ya mwisho kʉ ná ndrŭ si ngʉ ya kwanza ndirigoti ya kwanza kʉ ná ndrŭ si ngʉ ya mwisho ri.”

17 Yerusalemu na ndima dji ro, Yesu dzingʉe ndi una 12 kʉ ná kpa ngatsotso ndirigoti ke ngʉ ripo kpa dho chu nǎ ɨ: 18 “Anirr di! Ko ra Yerusalemu na ndirigoti ndrŭ Ddù si kʉ bbʉni bbakuhani djó bbobbonga ma, nga ndi ná kpa ma na dhona ndirigoti kpa si kʉ lod’i ke djo le hwi ke hwi. 19 Føri goti kpa si ke bbʉ ndrŭ tsɨ dhona ndiro kpa be ke pá, kpa dhɨ ke fimbo na ndirigoti kpa tɨ ke tsú badjo d’e. Ndirigoti ddo gbo djó ke si gaga.”

20 Føro, Zebedayo ddui dhi mama singʉe ke dhi ngana ndi ddui na, le kongʉeni ke nji ndi d’eti djo ndirigoti le nzingʉe ddikpa lo ke tso. 21 Ke dhungʉeri le tso: “Nidhó lo ká ji addu?” Le ngʉngʉe logoti: “Ajari ma ddui aro kʉ ná i kpa kana ddikpa ke si di nidzá thá djó ro ndirigoti ddikpa ke si di nidzá gru djó ro nidhó Pidhinga nǎ.” 22 Yesu ngʉngʉe logoti: “Ni nzá chu ma tso ni nzi ná fø lo ri. Ni ká ka ni jø karrnga goti ma si jø ná kopo tso ngbà?” Kpa ngʉngʉe logoti: “Ngbao.” 23 Yesu pongʉeri: “Bbʉbbʉ dhé, ni ka ni jø madhó kopo tso ngbà, ro madhó thá djó ro inga madhó gru djó ro le di ná føri i nzá ma ka ma bbʉ ni dho ri. Ro, føri kʉ madzá Baba kpe fønga dho ná kpa dhó nga.”

24 Føro 10 kʉ ná nja kpa rrngʉe fø lo ro, kpa lu aro kʉ ná fø kpa dhi lo kangʉeni ka. 25 Yesu nzingʉe kpa ndi dhi ngana ndirigoti ke pongʉeri: “Ni churi chu nari kʉ dz’ djó pikpa adi pinyo ndrŭ tsɨ djo ndirigoti bbobbokpa adi ndrŭ cho ndrŭ njí ndima ji ná lo. 26 Ro, ni kana nzá ringani ri é fø ri, ro ddikpa ke jiri ndi é bbo kʉ ná ke ni kana ró, fø ke dho ringani ndi é nidhó njí dhi ke. 27 Ndirigoti ddikpa ke jiri ndi é ya kwanza ni kana ró, fø ke dho ringani ndi é nidhó nokpa. 28 Føri bbai ndrŭ Ddù singʉe ro, ke nzá singʉe ndrŭ i njinjí ndi dho ri, ro ndi i njinjí ndrŭ dho ndirigoti ndi bbʉ ndidzá shinga* le ødha dhi be, bí kʉ ná ndrŭ djotsina d’e.”

29 Yeriko nǎ ro kpa ngʉ tuni ro, birobiro kʉ ná ndrŭ kpari rangʉe ke ulu. 30 Ndirigoti Anja! Nga nyǒ kʉ ná aro kʉ ná kpa ngʉ di chutso ró ndirigoti kpa rrngʉe Yesu da nari ro, kpa ngangʉe ɨ ndima ndima nanga jø nari tso: “Bboke, abe zø ko djo, Daudi Ddù.” 31 Ro, birobiro kʉ ná ndrŭ ngʉ tá kpa djó ndiro kpa go ddi d’e. Ro, føro i kpa gʉ ngʉ ndima nanga jø bbo pli ɨ ndima ripo ro: “Bboke, abe zø ko djo, Daudi Ddù.” 32 Føro, Yesu tøngʉeni ro, ke nzingʉe kpa ndirigoti ke dhungʉeri: “Ni ká jiri ma njí addu ni dho?” 33 Kpa pongʉeri: “Bboke, aliri ko nyǒ njanga.” 34 Kpadhi ri zø nji ndi ro, Yesu løngʉe kpa nyǒ ronga; føro kpa nyǒ tso wengʉeni thei ndirigoti kpa rangʉe ke ulu.