Marko

1 I ri kʉ Mungu Ddù Yesu Kristo djo tilo ná hwè dhi lo-i tso ngani ná nga: 2 Ddiddi Isaya dhó unabi nǎ ri ndingʉeni nari bbai: “(Anja! Ma madzá lo-i mba ná ke chó ni njí, nja ndi thɨ chu nanga ni dho ni njí d’e.) 3 Ddikpa ke ngajø ngødja nǎ ro: ‘Anithɨ Yova* dzá chu nanga! Aniliri ri é mbrø.’” 4 Yohani Mubatizaji ngʉe ngødja nǎ, ro ke ngʉ rid’ra ndrŭ ba batiso ndiri dhǒ ndrŭ leni le nari, ndiro ndrŭ dhó chenga zø njini d’e. 5 Yudea ma, Yerusalemu ma na nǎ ndrŭ krʉ ngʉ si ke dhi ngana ndirigoti ndrŭ ngʉ ndima dhó chenga d’ra pʉlʉpʉlʉ ndirigoti ke ngʉ batiso* bbʉ fø ndrŭ dho Yordani dhi Dda nǎ. 6 Yohani ngʉ adi thó ná rù le thɨngʉe ngamia ró ká na, ke b’ʉso ngʉe zǎ ró kødha na le thɨ ná setir ndirigoti kedhó nyo ngʉe karu ma, tiidda ma na. 7 Ke ngʉ rid’ra ɨ: “Ma goti si ná ke kʉ kpakpa ma djolu. Ma ro nzá ka ma koni ndiro ma kló ke kó ró ss ró mbi tso d’e ri. 8 Ma batiso bbʉ ni dho dda na, ro ke si ri bbʉ ni dho roho takatifu na.”

9 Fø ddo kana Yesu singʉe Galilea nǎ Nazareti nǎ ro, ndirigoti Yohani bbʉngʉe batiso ke dho Yordani nǎ. 10 Føro dda nǎ ro ke vʉ ro thei ke njangʉe ra tso weni nari ndirigoti roho takatifu thʉngʉe ke djo bbǎna ró ji na. 11 Føri goti ddikpa lechu singʉe ra nǎ ro: “Ni kʉ madhi Dduna, bbo ma ji ná ke, ni tso ma uu.”

12 Føri goti thei, roho lingʉeri ke rá ngødja na. 13 Ke njingʉe ddo 40 ngødja nǎ, ná følu i Shetani mbungʉe ke. Ke ma ngʉe tsó nǎ zǎ ma na, ro malaiká ngʉ ke tsotso koko.

14 Yohani kpa sʉ nari goti Yesu rangʉe Mungu dzá hwè lo-i d’ra Galilea na, 15 ke ngʉ rid’ra ɨ: “Li le lie ná saa kaka ndirigoti Mungu dhó Pidhinga si chøchø. Anileni ndirigoti aniu hwè dhi lo-i.”

16 Galilea nǎ jʉdda tso ro lu Yesu ngʉ bbi ro, ke njangʉe Simoni ma, Simoni dhi djona Andrea ma na, jʉdda na ndima ndima dhó bbè-mbi djǒ ro dhonalo kpa ngʉe bbè pɨ ná kpa. 17 Føro Yesu pongʉeri kpa dho: “Anisi ma ulu, ma si rili ni ngʉ ndrŭ pɨ ná kpa.”* 18 Føro kpa bbangʉe ndima dhó bbè-mbi thei ndirigoti kpa rangʉe ke ulu. 19 Føga ro ke ro ra sese ro, ke njangʉe Yakobo ma, adjondi Yohani na, ná føri ngʉe Zebedayo ddui. Kpa ngʉe ndima dhó bbú nǎ ndima dhó bbè-mbi ronga ndima thɨ ro. 20 Føro thei, Yesu nzingʉe kpa. Føri dho, kpa bbangʉe ndima dhi baba Zebedayo bbú na ndirigoti kpa rangʉe ke ulu. 21 Føri goti kpa rangʉe Kapernaumu na.

Føro Sabato tso ngani nari goti thei ke rangʉe sinagogi na ndirigoti ke ngangʉe longaddidha tso. 22 Ndrŭ nanga kengʉeni bbo kedhó longaddidha dho, dhonalo ke ngʉ longaddi bbonga na kʉ ná ke bbai, ro nga, nga ndi ná kpa bbai ri. 23 Fø saa nganga na dhé, sinagogi nǎ ngʉe gó kʉ nǎ ná ddikpa ke, ná fø ke ngʉ ndi nanga jø: 24 “Ni ma na ká ri di ngbǎ ko kana, Nazareti nǎ Yesu? Ni ká si ko sadha dho? Ma chu ni ká kʉ ie nari bblo pli, Ni kʉ Mungu dzá Takatifu kʉ ná Ke!” 25 Ro, Yesu tangʉe ri djo ɨ: “Ago ddi ndirigoti avʉ fø ke nǎ ro!” 26 Gó jangʉe ke nanga che bbo ndirigoti b’lo ri hø ndidhó kpakpanga na krʉ nari goti, ri vʉngʉe vʉ ke nǎ ro. 27 Ndrŭ nanga kengʉeni bbo nari dho, ndrŭ ngangʉe ri tidha tso ɨ ndima kana: “Føri ká kʉ addu? Ri kʉ wø longaddidha. Ke kʉ bbonga na ndi ja lo gó dho ma krʉ ndirigoti ri ngarr rr dhé ke dho.” 28 Fø lo njini nari goti Yesu dhó lo gangʉe lele bbo Galilea nǎ krʉ kʉ ná ngalu.

29 Sinagogi nǎ ro kpa vʉ nari goti, kpa rangʉe Simoni ma, Andrea ma na bba, ddironga Yakobo ma, Yohani ma na. 30 Simoni dhi djana ngʉ yiyi dhonalo le dhe* ngʉ nji. Føro thei kpa rangʉe fø lo d’ra Yesu dho. 31 Ke rangʉe le dhi ngana ro, ke løngʉe le thó ndirigoti ke dangʉe le røna. Føro dhe singʉeni le ró ro si ndirigoti le ngangʉe nyo ridha tso kpa dho.

32 Ngasdjó, b’lo dyi tsu nari goti ndrŭ mbangʉe dhe dhi ndrŭ krʉ ndirigoti gó kʉ nǎ ná ndrŭ Yesu dhi ngana. 33 Ndirigoti vile nǎ ndrŭ krʉ gbangʉe ndima tso føga dzaitso ro. 34 Føro Yesu gøngʉe njonjo kʉ ná dhe kʉ ró ná bí kʉ ná ndrŭ ndirigoti ke pʉngʉe bí kʉ ná gó. Ro, ke nzɨ ngʉ ribba gó tilo ro ri, dhonalo ri chungʉe ke kʉ Kristo* nari chu.

35 Bbʉtso kukú, go nga tɨ mbi ro, ke dangʉeni ro, ke vʉngʉe bbaidjo ndirigoti ke rangʉe di nga ndrŭ kʉ ná ngana ndirigoti ke ngangʉe sala njidha tso. 36 Ro, Simoni ma, ndima ngʉe na ná kpa ma na ngangʉe ke nedha tso. 37 Ke kpa ba ro, kpa pongʉeri ke dho: “Krʉ kʉ ná ndrŭ ni ne.” 38 Ro, ke ngʉngʉe logoti: “Akora nja d’i ngana, i bba tsotso lu kʉ ná bba gʉ ndiro ma d’ralo fø bba gʉ lu maddi d’e, dhonalo ri kʉ føri dho i ma singʉe ri.” 39 Føri goti ke rangʉe lod’ra Galilea nǎ ngʉe ná sinagogi krʉ lu ndirigoti ke ngʉ gó pʉ.

40 Føga korøkorø dhi ddikpa ke singʉe ke dhi ngana ro, ke ngʉ ddoni ke ró ndi d’eti djó ndi koni ro, ɨ ndi ripo ro: “Njati rie ngbà ni jiri ró, aliri ma tsetse.” 41 Fø ke dzá ri zø nji Yesu ro, ke ddangʉe ndi thó, ke løngʉe ke ronga ndirigoti ke pongʉeri: “Ma jiri ngbà! Atsetse.” 42 Føro ke ró korøkorø singʉeni thei ndirigoti ke tsengʉe tse. 43 B’lo ndi ja lo ke dho nari goti thei Yesu pongʉeri ke rara, 44 ke jangʉeri ke dho ɨ: “Nzɨ d’ra fø lo ro ddikpa le dho maddi. Ro, ara ni dho kuhani dho ndirigoti ni bbʉ Musa jangʉe ná bbʉdha ndiri dhǒ ni ró dhe sini nari kpa dho d’e.” 45 Føga ro fø ke ra ro, ke ngangʉe ndi dho Yesu nji ná fø lo bbedha tso krʉ ndrŭ dho. Føri dzá lo dho, Yesu ro nzá ka ndi tsue ddikpa vile na maddi pʉlʉpʉlʉ ri. Føri dho, ke ngʉ adi di arugu nga ndrŭ ro kʉ ná ngana. Ro, føro mai ndrŭ ngʉ adi si ke dhi ngana krʉ kʉ ná ngalu ro dhé.