Luka

12 Fø saa na, maelfu kʉ ná birobiro kʉ ná ndrŭ njungʉe ndima tso ddingana, ná føri dho ndrŭ ngʉ ndima nanga tsítsi. Føro Yesu ngʉ ripo ɨ ndi unakpa dho: “Anib’o ni ronga Bbafarisayo dhó thì* ró, føri kʉ kpa kʉ aro kudjo dyʉ* nari. 2 Bblo pli le ru ná lo kana nga kʉ nzɨ si keni ná lo ro ri, ndirigoti nzá d’e chuni ná lo krʉ si chuni chu. 3 Føri dho, tɨtɨnga nǎ ni ti ná lo si rrni kadha nǎ, ndirigoti bbølobbølo nǎ ni ti atsi chumba nǎ ná lo si jøni dza djó ro. 4 Føri kina ma ripo ni dho, madzá bbakau nzɨ ni nji le ndí hwi ná ndrŭ do, nzá ndima ka ndima njí nja d’i lo ki ro føri goti ro. 5 Ro, ma d’ra ngbà do ni ka ni njí ná ke ni dho: Aninji do nari kʉ, b’lo ndi hwi le ró kʉ bbonga na ndi bu le Gehena* na ná ke. Bbʉbbʉ dhé ma ripo ni dho, aninji fø ke do. 6 Mbʉ kʉ ná wanyoí nanga ká le adi dzi sese dhó valer kʉ ná mbøkpa* aro ró nzɨ? Føro mai, ri kana ddikpa ri nga ro ma nzɨ ddi adi vi Mungu ró ri.* 7 Bbʉbbʉ dhé, ni djoká ma krʉ nanga zøni zø. Nzɨ ni nji do dhonalo nidhó valer dada bí kʉ ná wanyoí djolu.

8 “Njati ddikpa ke u ritso ndrŭ nyǒ njí nari kʉ ndi kʉ ma unake ró, ndrŭ Ddù maddi si ritso u Mungu dhó malaiká nyǒ njí nari kʉ, ke kʉ ndi unake. 9 Ro, njati ddikpa ke gʉ ma ndrŭ nyǒ njí ró, ma si ke gʉ Mungu dhó malaiká nyǒ njí. 10 Njati ddikpa ke ti chelo ndrŭ Ddù djo ró, fø ke zø si njini nji; ro ddikpa ke dhu roho takatifu ró, fø ke zø ro nzɨ si njini ri. 11 Njati ndrŭ si ni mba krʉ ndrŭ dhó njudha* ma, sheria nǎ bbobbokpa ma, bbobbonga na kʉ ná kpa ma na nji ró, nzɨ ni bbari rid’o ni nanga ngbaribbai ma ni si soni nari ma, ni si po ná lo ma na dho, 12 dhonalo roho takatifu si ni po ná lo ngaddi ni dho fø saa nganga na.”

13 Føro birobiro kʉ ná ndrŭ kana ro ddikpa ke pongʉeri Yesu dho: “Mwalimu, apori madhi djona dho ko ndó ko dho le bba ná mali nanga ndó.” 14 Yesu ngʉngʉe logoti: “I ke, ma ká ie li ma é ni kana lo d’i ná ke inga ni aro tso gba ná ke?” 15 Føro ke pongʉeri kpa dho: “Aniwe ni nyǒ tso ndirigoti anib’o ni ronga njonjo kʉ ná tamaa ró, dhonalo njati ddikpa ke dhó ritsi é bbo ma ró, kedhó shinga nzɨ adi si fø ritsi nǎ ro ri.” 16 Føri goti ke bbʉngʉe i loroji kpa dho: “Ddikpa mali dhi ke dhó nyo ongʉe bbo.” 17 Føri dho ke ngʉ riddi ndi thí nǎ ɨ: ‘Kpadjo ká ma ka ma njiri ngbǎ dhonalo madhó nyo tso ma nju ná nga ro kʉ nga ró?’ 18 Føro ke pongʉeri, ‘Ma rinji ɨ: Ma madhó depo kpari glʉglʉ ndirigoti ma dada ri djolu nari chi. Føri goti ma madhó nyo-kpa ma, nja ritsi ma na krʉ tso nju ri na. 19 Føri goti ma si ripo ma* ni: “Ni* nju bblo ritsi tso bí, bí kʉ ná cho dho, achʉ ni ronga, anyonga, ajø jødha dhi ritsi ndirigoti anji hwè.”’ 20 Føri dho Mungu pongʉeri ke ni, ‘Rrchu ná ke, i kuna ni si nidhó shinga* vivi. Nde, ni nju tso nidhó ná fø ritsi krʉ ká si ma ie dho?’ 21 Føri i kʉ, ndi nganga dho mali tso njú ná ke si ba ná lo, nga ndi kʉ mali Mungu nyǒ njí ro.”

22 Føri goti ke pongʉeri ndi unakpa dho: “Ri kʉ føri dho i ma ripo ni dho, nzɨ ni bba rid’o ni nanga nidhi shinga* dzá lo dho, føri kʉ ni ká nyo addu inga ni ká tho addu ni ndí ro nari djo. 23 Dhonalo shinga* dada nyo djolu ndirigoti le ndí dada rù djolu. 24 Aninja krø: Ri nzɨ adi nyo ro zʉ inga nyo tso ro nju ri ndirigoti ri dhó nga e nyo tso le nju na ná dza ma, depo ma na ro ri; ro i Mungu adi ri ngungu dhé. Nde, ni na mana ká dada nzá rè djolu? 25 Ni kana ie i ká ka ndi ndrí ndidzá ddo ro sese* ma, ndi ribba rid’o ndi nanga nari na? 26 Nde, rie nzɨ sese kʉ ná fø lo kpali ma njini ni dho ri ró, føro ká ni ribba rid’o ni nanga nja ritsi kpari djo addudho? 27 Aninja ngbaribbai ma nza gʉ maua adi dhi nari: Ri nzɨ adi njí ro nji ri ndirigoti ri nzɨ adi rù ro maddi ro ndima ro ri; ro ma ripo ni dho, nì mai Sulemani dhó mali ngʉe bbo ro, ke ngʉ njø ná rù ro nzá d’angʉeni fø maua kana ddikpa ri bbai maddi ri. 28 Njati rie føri bbai Mungu adi njʉ kʉ ndirigoti bbʉ le si bu kazz na ná nza gʉ tsó ronga thó ri ró, ni sese dhó udha kʉ ná ndrŭ, ni ronga gʉ ke ka ndi thó fønga djolu! 29 Føri dzá lo dho, anibba ni ká ka ni nyó addu inga ni ká ka ni jø addu nari ni dhú ni tso nari tso ndirigoti anibba bbo ni ribba rid’o ni nanga nari tso; 30 dhonalo, føri krʉ kʉ bbò ù na i dz’ djó ndrŭ tsɨ adi ne ná ritsi, ro nidhi Baba chu nidhó lo u fø ritsi nari chu. 31 “Føri rɨngana, anidi kedhó Pidhinga ne ndirigoti fø ritsi si ndrini ndri ni dho.

32 Nzɨ ni nji do, nga kʉ bí ná miya, dhonalo nidhi Baba u ritso u ndi bbʉ Pidhinga ni dho. 33 Anidzi nidhó ritsi nanga ndirigoti anibbʉ ritsi njedha dhi ndrŭ dho.* Anithɨ nzá d’u ka ndi kó ná kpʉ mbø dho, anili nzá ka ndi sini ná mali ra na, fønga na nzá gbʉ ka ndi si ri ndirigoti ucha ma nzá ddi ka ndi d’a ri ri. 34 Dhonalo ni thí e nidhó mali kʉ ná ngana.

35 Anitho rù ni ro ndirigoti ni é tayari,* rø nidhó tala rø ro, 36 ndirigoti ringani ni é, ndima dhi bboke b’o ndoa dhi ngana ro ná kpa bbai, ndiro ke si dzaitso d’o ró ndima pʉ ri tso ke dho thei d’e. 37 Fø nokpá sie hwè na njati ke si kpa ro nì kpa di kere ro ró! Bbʉbbʉ dhé ma ripo ni dho, ke si njí dhi rù tho* ndi ro, ke si ripo kpa di mesa tso ro ndirigoti ke si nyo bbʉ kpa nyó. 38 Føro ke si kuna bbo* ma inga kuna saa sita goti* ma, ro ke si kpa ro tayari dhé ró, kpa sie hwè na! 39 Ro, anichu i lo: Njati dzaba chue ngbá saa na ma gbʉ dhi ke si nari chu ró, ke nzá ka ndi bbaeri gbʉ tsu ndi bba ri. 40 Ni maddi anidi tayari dhonalo ndrŭ Ddù si si nzá djo ni ddinga ná saa na.”

41 Føro Petro pongʉeri: “Bboke, ni ká fø loroji bbʉ ko kpali dho inga ndrŭ krʉ dho?” 42 Føro Bboke pongʉeri: “Nde, bbʉbbʉ dhé, ndidzá bboke li ndibbá dza nǎ ndrŭ djó nga njadha dho ná chi njí dhi nyod’yu dhi ri ká kʉ ie,* ndiro ke di nyo bbʉ kpa* dho ngbà ka ná ngatsi, ngbà thonga ná saa na d’e? 43 Hwè na kʉ nari kʉ fø noke, njati kedzá bboke si ke ro fø ndi rinji ro ró! 44 Bbʉbbʉ dhé ma ripo ni dho, ke si ke li ndidzá ritsi krʉ djo. 45 “Ro, njati fø noke di riddi ndi thí nǎ: ‘Madzá bboke rɨni rɨ,’ ndirigoti ke nga ndi lai njí dhi kpetsi kpa ma, isɨ ndrŭ ma na njidha tso, føri goti ke di nga ma nyo, wa ma jø ndirigoti ke di wa rɨ ró, 46 fø noke dzá bboke si si nzá djo ke ddienga ná dyi ndirigoti nzá ke chu ná saa na, føro ke si malipizi bbʉ ke dho bbo pli nari goti ke si ke ma li nzɨ tøni chi ná kpa ma na. 47 Fø noke chue ndidzá bboke ji ndi njí ná lo ngbà, ro i ke tayarisha ndi nzá ndirigoti ke nji ndi tso ke nzie ná lo* nzá nari dho, ke le si dhɨ che sani. 48 Ro, ddikpa ke chue ndi dho ringani ndi njí ná lo nzá, ro ke njí dhɨ dho ringani le dhɨ ndi ná lo ró, ke le si dhɨ sese. Bbʉbbʉ dhé, bí dhona le bbʉe ri ná ke tsó le si ri ko bí, ndirigoti bí kʉ ná ritsi djó nga njadha dho le lie ná ke tsó le si ri ko nga ngani ná nga djolu.

49 “Ma singʉe ndiro ma tø kazz dz’ djo d’e. Nde, rie b’lo ri rø ri ró, føri ró ro ki ma ji pli nari ká kʉ addu? 50 Bbʉbbʉ dhé, ringani ma ba ddikpa batiso ndirigoti ma kʉ njedha na bbo kpø ri tso d’yani ná nga djo! 51 Ni ká rid’yá nari kʉ, ma si ngoi li i dz’ djo? Nzá, ma ripo ni dho, ma si ndrŭ kana nga ndo. 52 Dhonalo kpadjonga djó ro, ddikpa dza nǎ mbʉ kʉ ná ndrŭ nanga si ndoni ndo, gbo kʉ ná ndrŭ si tøni aro kʉ ná ndrŭ tso ro ndirigoti aro kʉ ná ndrŭ si tøni gbo kʉ ná ndrŭ tso ro. 53 Ndrŭ nanga si ndoni ndo, ngba ba si tøni ndidzá kpetsi ngba tso ro, kpetsi ngba si tøni ndidzá baba tso ro, ngba dzá mama si tøni ndidzá singba ngba tso ro, singba ngba si tøni ndidzá mama tso ro, le-dja si tøni ndidzá møle tso ro ndirigoti møle si tøni adjandi tso ro.”

54 Føri goti ke pongʉeri birobiro kʉ ná ndrŭ dho: “Njati ni njari ndundu si dyi adi tsu ná nga laidjó ro ró, føro thei ni adi ripo ‘Bbò vʉvʉ si si’ ndirigoti ri adi njini fø. 55 Ndirigoti ni njari vʉvʉ si agʉnga laidjó ro ró, ni adi ripo ‘Kazz si o bbo’ ndirigoti ri adi njini fø. 56 Aro kudjo dyʉ* kʉ ná kpa, dz’ djó ndirigoti rakpa ró njini ná lo nanga nedha ni chuchu, ro i saa na njini ná lo nanga i ká neni ni dho nzɨ addudho? 57 Nde, ni ka ni njí ná chølo utso ká d’ini ni dho nzɨ addudho? 58 Loroji na, njati rie ni ra pi bba ni bbø ná ke na ri ró, anisi ni kana kʉ ná lo go ni kʉ chu nǎ ro, ndiro nzɨ ke bbø ni lod’i ná ke dho ndirigoti nzɨ lod’i ná ke bbʉ ni polis dhona ndirigoti nzɨ polis ni bu prizo na ró. 59 Ma ripo ni dho, Bbʉbbʉ dhé ni ro nzɨ vʉ føtsi ro, njati ni bbʉ ni nǎ kʉ ná ddeni nzá kpø sese pli kʉ ná mbøkpa* djo ró ri.”