Roma
5 Kpadjo ko nzini b’lo chølo dhi ndrŭ kodhó udha chulu nari dho, ko kana ka ndi é ngoi Mungu na kodhi Bboke Yesu Kristo chulu. 2 Ko kʉ udha na Yesu djo nari adi rili ko kana nga é chøchø Mungu na ndirigoti ko ba Mungu dhó nzá tso ka ndi koe le djo ná zølo. Ko ka ko é hwè na dho nari kʉ, ko kʉ ngab’odha na ko si kadha ba Mungu dhó ro. 3 Føri kina, ko ka ko é hwè na nza ko nzani ná saa na maddi, dhonalo ko churi chu nari kʉ kodhó nzadha nǎ ro ngatsovedha adi si. 4 Kodhó ngatsovedha adi rili ko tso uni u Mungu na ndirigoti ko tso uni ke na nari adi rili ko é ngab’odha na, 5 ndirigoti kodhó ngab’odha nzɨ adi ko thí ro bʉ ri. Dhonalo Mungu dhó jidha d’røni ko thí lu, Mungu adi bbʉ ko dho ná roho takatifu chulu.
6 Ko tsotso ko ná ndrŭ ro ngʉe nga ná saa na, Kristo dhengʉe nzɨ Mungu do nji ná ndrŭ djotsina li le lingʉe ná saa na. 7 Ri ka ndi é kpakpa ddikpa ke dhe chølo dhi ke djotsina; njaro ddikpa ke ka ndi uri ndi dhe bblo kʉ ná ke djotsina i ngbà. 8 Ro, Mungu dho ndi nganga dzá jidha ko dho dhonalo nì mai ko ngʉe chenga dhi ndrŭ go ro, Kristo dhengʉe ko djotsina. 9 Føri dho, kpadjo le nzi ko chølo dhi ndrŭ b’lo Yesu dzá ju chulu nari dho, ko ka ko uri u nari kʉ, ko ka ko gøgø Mungu dhó thø nǎ ro. 10 Nì mai ko ngʉe Mungu dhó mbubai ro, ko ngʉngʉe kedzá bbakau kedhi Dduna dzá dhe chulu. Føri rili ko uri gʉ pli nari kʉ, ko si gødha ba Yesu dzá shinga chulu dhonalo kpadjo ko kʉ Mungu dzá bbakau. 11 Mungu nji kodhi Bboke Yesu Kristo chulu ná lo rili ko é hwè na bbo, dhonalo ri kʉ ke chulu i ko kana kau ngʉ bblo Mungu na kpadjo ri.
12 Chenga tsungʉe dz’ djo ddikpa ke chulu ndirigoti chenga nǎ ro singʉe nari kʉ dhe. Føri dho, dhe plingʉe ndi nanga krʉ kʉ ná ndrŭ ro dhonalo ndrŭ krʉ njingʉe chenga. 13 Chenga singʉe dz’ djo Yadha njí ndirigoti ndrŭ ro nzá le ka le zø chenga dhi ndrŭ ngadhi yadha ro ri. 14 Dhe nyongʉe pi Adamu djó ro kpø Musa djo. Ri nyongʉe pi nzá njingʉe chenga Adamu bbai ná ndrŭ djo ma krʉ ddi. Adamu ngʉe luti ka ndi sie si ná ke ró ji.
15 Nì mai ri kʉ fø ro, Mungu bbʉngʉe ná kado nga kʉ Adamu dhó chenga na ddiddi ri. Bí kʉ ná ndrŭ chengʉeni ddikpa fø ke nji ná chenga djotsina. Ro, Mungu dzá zølo ma, ddikpa ke Yesu Kristo dzá nzá tso ka ndi koe le djo ná zølo chulu ke bbʉ pá ná kado ma na dzá bblonga da bbo pli. 16 Mungu bbʉ pá ná kado ma, ddikpa ke nji ná chenga ma na kana kʉ i njonjonga: Ddikpa ke nji ná chenga nǎ ro si ná lod’idha kʉ malipizi, ro bí kʉ ná chenga kpari goti le bbʉ ná kado liri bí kʉ ná ndrŭ le zø chølo dhi ndrŭ. 17 Dhe nyongʉe pi ddikpa fø ke dhó chenga chulu. Ro, bbo pli ba nzá tso ka ndi koe le djo ná zølo ma, chølo chulu ba pá le bbʉ ná kado ma na ná ndrŭ si di shi ndirigoti kpa sie pikpa, ddikpa ke Yesu Kristo chulu!
18 Ddikpa kʉ ná chenga lingʉeri lod’ini ndrŭ krʉ djo, ná føri bbai ddikpa kʉ ná chølo lingʉeri ndrŭ krʉ nzini chølo dhi ndrŭ shinga badha dho. 19 Ddiddi ddikpa ke rrngʉe nga nzá nari lingʉeri bí kʉ ná ndrŭ ngʉ chenga dhi ndrŭ nari bbai, ddikpa ke rrnga nari si rili bí kʉ ná ndrŭ ngʉ chølo dhi ndrŭ. 20 Yadha le bbʉngʉe ndiri dhǒ ngbaribbai ma chenga dhi ndrŭ ngʉe nari d’e. Ro, ngbá ngatsi ma chenga kʉ nari dhongʉeni ná saa na, Mungu dhó nzá tso ka ndi koe le djo ná zølo maddi ndringʉeni bbo pli. 21 Fø ká ri njingʉeni addudho? Ndiro ddiddi chenga ma nyopi ddinga dhe na nari bbai, Mungu dhó nzá tso ka ndi koe le djo ná zølo nyó pi chølo chulu ndiri bbʉ cho ró nŭnŭ di ná shinga Yesu Kristo chulu d’e.