Matayo

26 B’lo Yesu dya fø lo krʉ podha tso nari goti ke pongʉeri ndi unakpa dho ɨ: 2 “Ddo aro goti kʉ Pasaka nari ni chuchu, ndirigoti ndrŭ Ddù si bbʉni ndiro le tɨ ndi tsú badjo d’e.”

3 Føro bbakuhani djó bbobbonga ma, ndrŭ dhó ngó kpa ma na gbangʉe ndima tso bbò kuhani Kayafa bbá bbaidjo, 4 ndirigoti kpa kpengʉeri nari kʉ ndima lø ke mayele na ndirigoti ndima hwi ke hwi. 5 Ro, kpa ngʉ ripo: “Ri nzá ngani ko lø ke fete dhi ngana ri, ndiro nzɨ ri bbʉ ngbʉngbʉ ndrŭ kana ró.”

6 Betania nǎ Yesu ngʉe korøkorø dhi ke Simoni bbá ná saa na, 7 ddikpa isɨle ndringʉeni ke kuso albatre dhi dju na le thɨ ná chupa nǎ bbo ró dzi dyu ná djuu ngø ná ché na ndirigoti le ngangʉe ri ddodha tso ke djǒ djo nga ke ngʉ nyo* ná saa na. 8 Fø lo ndima nja ro ke unakpa nanga kangʉeni ka, ro kpa pongʉeri: “Fø ká le ritsi sa addudho? 9 Fø ché nanga le ka le dzie bbò mbø ró, ná mbø le ndóe njedha dhi ndrŭ dho.” 10 Fø lo Yesu rr ro ke pongʉeri kpa ni: “Ni ká fø le djǒ nanga ngbʉ addudho? Fø le nji bblo kʉ ná lo ma laidjo. 11 Dhonalo njedha dhi ndrŭ sie nì dhé ni kana, ro ma nga sie ni kana krʉ ddo ró ri. 12 Djuu ngø ná fø ché fø le ddo ma djo ná føri na, le tayarisha ma thei ma d’ødha dho. 13 Bbʉbbʉ dhé ma ripo ni dho, i hwè dhi lo-i si d’rani dz’ djolu ná nga krʉ lu, ndrŭ si loti fø isɨle djo maddi ndima nó na le nga d’e.”

14 Føri goti 12 kʉ ná kpa kana Yuda Iskariote ró dho kʉ ná ke rangʉe bbakuhani djó bbobbonga dhi ngana 15 ndirigoti ke dhungʉeri kpa tso: “Ni ká addu bbʉ ma dho ndiro ma dzi fø ke nanga ni na d’e.” Føro ke ma rrngʉeni kpa na mbøkpa 30 djo. 16 Fønga djó ro ke ngangʉe Yesu nanga ndi ka ndi dzi lu ná bblo kʉ ná chu nedha tso.

17 Nga nǎ thì* kʉ ná mukati dhi fete dzá ya kwanza ddo dyina, Yesu unakpa singʉe ke dhi ngana ndirigoti kpa dhungʉeri ke tso: “Ni ká jiri ko rá Pasaka dhi nyo thɨ ni dho ngbaga?” 18 Ke pongʉeri: “Anira vile na cháke bba ndirigoti ni pori ke dho, ‘Mwalimu pori ɨ: “Madhó li le lie ná saa si chøchø; ko si Pasaka dhi fete nyo ma unakpa ma na ni bba.”’” 19 Føro Yesu unakpa njingʉeri ke jae ndima dho nari nganga bbai ndirigoti kpa thɨngʉe Pasaka.

20 Føro ngasdjó nga si ro, Yesu ma dingʉe ndi una 12 kʉ ná kpa ma na mesa tso ro. 21 Nga kpa ngʉ nyo ro ke pongʉeri: “Bbʉbbʉ dhé ma ripo ni dho, ni kana ddikpa ke si ma nanga dzidzi.” 22 Fø lo bbʉngʉe njedha bbo kpa dho nari dho kpa krʉ ngangʉe ri dhudha tso: “Bboke, ri nga kʉ ma ri, ri ká nga fø ri?” 23 Ke ngʉngʉe logoti: “Ri kʉ ddikpa no nǎ ko nganyo na ná ke i si ma nanga dzi ri. 24 Bbʉbbʉ dhé ndrŭ Ddù rara ndi dho, ndi djo ri ndini nari bbai. Ro, njedha ndrŭ Ddù nanga si dzi ná ke dho! Ri ka ndi ée bblo nzɨ fø ke gøeni pá.” 25 Ke nanga sie dzi ná ke Yuda dhungʉeri: “Ri nga kʉ ma ri, ri ká nga fø ri Rabi?” Yesu ngʉngʉe logoti: “Ni nganga i ripo fø.”

26 Nga kpa ngʉ nyo nari kana, Yesu dzingʉe mukati, ke nzingʉe ledha ri djo nari goti, ke d’rɨngʉe ri nanga ndirigoti ke bbʉngʉe ri ndi unakpa dhona ɨ ndi ripo ro: “Aniko ri, aninyo ri dhonalo ri dhǒ nari kʉ ma ndí.” 27 Føri goti ke dzingʉe divai dhi kopo, føro b’lo ndi po mbai nari goti ke bbʉngʉe ri kpa dhona ɨ ndi ripo ro: Ni krʉ, anijø ri. 28 Dhonalo ri dhǒ nari kʉ ma ró ju, ‘koddo dhi ju,’ bí kʉ ná ndrŭ dhi chenga zø njini d’e ndi si d’røni ro. 29 Ro, ma ripo ni dho: Ma nzɨ i divai ki ro jø, kpø ko ka ve si ri ki jø ni ma na madzá Baba dhó Pidhinga nǎ ná nga djo ri.” 30 Mwisho, b’lo kpa ngo madha le bbʉ na ná dyi* nari goti, kpa rangʉe Mizeituni dhi ngøtsɨ djo.

31 Føri goti Yesu pongʉeri kpa dho: “Njʉ i kuna ni krʉ si ma bbabba* ma si bani na ná lo djotsina, dhonalo ri ndini: ‘Ma si chembø ró rø ná ke hwi, nari goti chembø nanga si plini dhaa.’ 32 Ro, ma ga nari goti ma si da ni njí Galilea na. 33 Føro Petro pongʉeri: “Nja kpa krʉ bbani bbá* ma ni ró si njini ná lo djotsina ró, ma i nzɨ ni ro bbari.” 34 Yesu pongʉeri ke dho: “Bbʉbbʉ dhé ma ripo ni dho, njʉ i kuna økpa ngoni nari njí ni si ma gʉ gbo ina.” 35 Petro pongʉeri: “Ri uri ko dhedhe ma ni ma na ró, ma nzɨ ni ro gʉ pɨpɨ nanga ri.” Ke una nja kpa krʉ maddi pongʉeri fø.

36 Føri goti Yesu ma singʉe ndi unakpa ma na Getsemani le nzi ná ngana ro, ke pongʉeri kpa dho: “Anidi iga, go ma ra sala nji chaga ró.” 37 Føro ke dzingʉe Petro ma, Zebedayo ddui aro kʉ ná kpa ma na, føri goti ke thí ngangʉe bbo ndi vodha ba nari tso ndirigoti ke nanga ri ngʉ d’o bbo. 38 Føro ke pongʉeri kpa dho: “Ma* kʉ njedha na bbo pli hwi ka ndi hwi ma ná ngatsi. Anidi iga ndirigoti anidi kere ddironga ma na.” 39 Føga ro ke ro ndrini sese ro, ke kongʉeni ndi d’eti djo gʉna ndi nganja ro ndirigoti ke nzingʉeri ɨ: “Baba, njati rie ngbà ri ka ndi ka ri ró, atu i kopo da ma ró ro. Ro, nga ma jiri nari bbai ri, ro ni jiri nari bbai.”

40 Føro, ke ngʉ ndi unakpa dhi ngana ro, ke singʉe kpa ro ddo ndima ddo ro ndirigoti ke pongʉeri Petro ni: “Ni ro ká ka ni di ma na kere saa ddikpa kpali ma nzá ddi? 41 Anidi kere ndirigoti anira anzi nga ni nzi nari na ndiro nzɨ ni tsu mbudha na ró. Bbʉbbʉ dhé, le thí jiri ngbà, ro le ndí i kʉ sʉsʉ.” 42 Føri goti ke ki ra ro, ke nzingʉeri ɨ: “Baba, rie nzá i kopo ka ndi tuni da nzá ma jø ndi tso ro ri ró, abbari ni ji ná lo njini.” 43 Ke ki ngʉ ndi unakpa dhi ngana ro, ke singʉe kpa ro ddo dhé kpa ddo ro dhonalo kpa nyǒ ngʉ o li. 44 Føri dho, kpa kuso ro ke tuni ro, ke rangʉe nga ki nzi fø lo djo dhé, ri si na gbo ina d’e. 45 Føri goti ke ngʉ ndi unakpa dhi ngana ro, ke pongʉeri kpa ni: “Ká i di ná saa na i ni ddoddo ndirigoti ni ni ronga chʉ? Aninja! Ndrŭ Ddù si bbʉni chenga dhi kpa dhona ná saa si chøchø. 46 Anidani, akora. Aninjari! Ma nanga si dzi ná ke si.” 47 Go, ke ngʉ loti ro, Anja! Ke una 12 kʉ ná kpa kana ddi ke, Yuda singʉe. Ke ma ngʉe sà ma, tsú ma na kʉ dhó ná birobiro kʉ ná ndrŭ ma na. Fø ndrŭ bbakuhani djó bbobbonga ma, ndrŭ dhó ngó kpa ma na chongʉe.

48 Ke nanga ngʉ si dzi ná ke bbʉngʉe i alama kpa dho: “Ddikpa ke dho ma si yambø bbʉ mbʉ ma ke mbʉ ro, ná føri i kʉ ke. Anilø ke.” 49 Føro ke rangʉe mbrø Yesu djo ro, ke pongʉeri: “Yambø Rabi!” Ndirigoti ke mbʉngʉe Yesu djø ndi djø ndi ro. 50 Ro, Yesu pongʉeri ke ni: “Ma lai ke, ni ká si addu nji iga?” Føro kpa si ro, kpa løngʉe Yesu lø. 51 Ro, Yesu unakpa kana ddikpa ke pʉngʉe ndidhó sà ro, ke krrngʉe bbò kuhani dhó njí dhi ke bɨ. 52 Føro Yesu pongʉeri ke ni: “Angʉ nidhó sà ndidhi ngana, dhonalo sà na ndrŭ che ná ndrŭ si cheni sà chulu. 53 Ni ká riddi nzá ma ka ma nziri madzá Baba tso, ke chó malaiká dhó kundi kpadjo 12 ndima nji ma djó là d’e ri? 54 Nde, fø ma njiri ró, ndi ndini ná lo pongʉeri ringani ri njini fø, ná fø lo ká ka ndi njini ngbaribbai?” 55 Føro Yesu pongʉeri birobiro kʉ ná ndrŭ kpari dho: “Ni ká si ma lø sà ma, tsú ma na na gbʉ dhi ke bbai? Krʉ ddo ró, ma ngʉe hekalu nǎ longa ma ddi ro, ro ni løngʉe ma ro nzá. 56 Ro, fø lo krʉ njini ndiro bbanabi ndingʉe ná lo* njini d’e.” Føri goti ke unakpa krʉ bbangʉe ke bba ndirigoti kpa nyingʉe nga nyi.

57 Yesu løngʉe ná kpa rangʉe ke na bbò kuhani Kayafa bba, ná føga i nga ndi ná kpa ma, ngó kpa ma na gbangʉe ndima tso. 58 Ro, Petro rangʉe Yesu una dadá kpø bbò kuhani bbá bbaidjo. B’lo ke si bbaidjo nari goti ke ma dingʉe njí dhi kpa ma na ndiro ndima nja føri goti njini ná lo d’e.

59 Fø saa na, bbakuhani djó bbobbonga ma, Sanhendrini nǎ kpa krʉ ma na ngʉ kali dhi lo ne Yesu djo ndiro ndima hwi ke d’e. 60 Ro, kpa nzá bangʉe ri ro ddikpa maddi ri, nì mai kali dhi lo d’ra ke djo ná ndrŭ kpari ngʉe bí ro. Luti aro kʉ ná kpa dangʉeni, 61 ndirigoti kpa pongʉeri: “Fø ke pori, ‘Ma ka ma glʉ Mungu dhó hekalu glʉ ndirigoti ma chi ri gbo cha.’” 62 Føro bbò kuhani dangʉeni ro, ke pongʉeri: “Ni ká po ddikpa lo ro ma nzá ddi fø lo djo? Fø kpa bbø ni na ná lo djo ká ni po ngbá lo?” 63 Ro, Yesu gongʉe ddi. Føri dho, bbò kuhani pongʉeri ke ni: “Ma rinzi ni tsoni ko dho, shi di ná Mungu ró dho na, nari kʉ ni i kʉ Kristo, Mungu Ddù!” 64 Yesu ngʉngʉe logoti ke dho: “Ni nganga i ripo fø.” Ro, ma ripo ni dho: “Kpadjonga djó ro ni si kʉ ndrŭ Ddù nja, kpakpanga dhi thá djó le thó laidjó ndi di ro ndirigoti rakpa ró ndundu djó ndi si ro.” 65 Føro bbò kuhani thangʉe ndi ró rù nanga ndirigoti ke pongʉeri: “Ke dhu Mungu! Ko ká ka ko ne nja ngbá lo ki ke djo? Dhonalo ni rr ke dhu Mungu nari rr aføna. 66 Ni ká addu ddi fø lo djo?” Kpa ngʉngʉe logoti: “Ke ka dhe dho.” 67 Føri goti kpa hwingʉe sadda ke nyǒ na ndirigoti kpa ngʉ ke d’ru ngumi na. Nja kpa ngʉ ke nyǒ djó nga b’ɨ, 68 ɨ ndima ripo ro: “Kristo, Ad’ra unabi ko dho. Ni ká ie b’ɨ?”

69 Fø saa na, Petro ngʉe bbaidjó ndi di ro. Føro njí dhi ddikpa singba ngba singʉe ke dhi ngana ndirigoti ngba pongʉeri: “Ni ma ngʉe ddi Galilea nǎ ke, Yesu una!” 70 Ro, ke gʉngʉe fø lo krʉ ndrŭ nyǒ njí ɨ ndi ripo ro: “Ma nzá chu addu ma ni po nari ri.” 71 Føri goti bbò dzaitso laidjo ke ngʉ ra ro, njí dhi nja le njangʉe ke ki ndirigoti le pongʉeri føga ngʉe ná ndrŭ dho: “I ke ma ngʉe ddi Nazareti nǎ ke Yesu una.” 72 Ke gʉngʉe ke ki i ndi tsoni ro: “Ma chu fø ke nyi nzá.” 73 Føri goti tse, føga ngʉe ná ndrŭ singʉe Petro dhi ngana ndirigoti ndrŭ pongʉeri: “Bbʉbbʉ dhé, ni kʉ fø kpa dhi ddi ke ro, ni tso nǎ lo* ni ká si ngbaga ro nari dhodho.” 74 Føro ke ngangʉe chádha ndi nzi ndi djo nari tso ndirigoti ke tsongʉeni ɨ: “Ma nzá chu fø ke ri!” Føri goti thei økpa ngongʉeni. 75 Føro Petro nongʉe Yesu pongʉe ndi dho ná i lo nga: “Økpa ngoni nari njí ni si ma gʉ gbo ina.” Føro ke rangʉe arugu ro, ke dzzngʉe che sani.