Yohani

18 Fø lo ndi po nari goti Yesu ma rangʉe ndi unakpa ma na Kidroni dhi djǎ* dzá chá dzɨ nga laidjo ndirigoti kpa tsungʉe føga ngʉe ná ddikpa í na. 2 Ke nanga sie dzi ná ke Yuda ma chungʉe fønga ddi, dhonalo føga Yesu ma ngʉ adi ndima tso njú ndi unakpa ma na bí ina. 3 Føri dho, Yuda ma singʉe birobiro kʉ ná bbasøddá ma, bbobbonga ma na; ná fø kpa bbakuhani ma, Bbafarisayo ma na chongʉe ndirigoti kpa singʉe ndima dhó rørø ná kazz tso ma, tala ma, là dhi no ma na na. 4 Yesu chungʉe ndi ró si njini ná lo chu nari dho, ke ndringʉeni kpa dhi ngana ndirigoti ke dhungʉeri kpa tso: “Ni ká ie ne?” 5 Kpa ngʉngʉe logoti ke dho: “Yesu Nazareti nǎ ke.” Føro Yesu pongʉeri kpa dho: “Ma i kʉ fø ke.” Ke nanga ngʉ dzi ná ke Yuda ma ngʉ tøni kpa kana ddi.

6 Ro, Yesu pongʉeri, “Ma i kʉ fø ke” ná saa na kpa ngʉngʉe aluti ndirigoti kpa kongʉeni dz’ djo. 7 Føro Yesu dhungʉeri ki kpa tso: “Ni ká ie ne?” Kpa ngʉngʉe logoti ke dho: “Yesu Nazareti nǎ ke.” 8 Yesu ngʉngʉe logoti: “Ma pori ni dho, ma i kʉ fø ke. Føri dho, njati rie ma ni ne ri ró, anibbari i kpa i rará.” 9 Fø lo ke pongʉe ndiro anziro ndi pongʉe ná i lo njini d’e: “Ni bbʉ ma dhona ná ndrŭ kana ro nzá ddikpa le ro ma vi madhó ro ddi ri.”

10 Føro Simoni Petro dhó ngʉe ddikpa sà, ná fø sà ke pʉngʉe ndirigoti ke krrngʉe bbò kuhani dhó njí dhi ke bɨ thá djó ri. Njí dhi fø ke ró dho ngʉe Malkus. 11 Ro, Yesu pongʉeri Petro ni: “Angʉ nidhó sà ndidhi kló na. Ri ká ngani nzá ma jø Baba bbʉ ma jø ná kopo tso?”

12 Føro bbasøddá ma, bbasøddá djó bbonga ma, Wayaudi dhó bbobbonga ma na løngʉe Yesu ndirigoti kpa chingʉe ke chi. 13 Ya kwanza kpa mbangʉe ke Anas bba, dhonalo føri ngʉe fø cho nǎ ngʉe bbò kuhani ná ke Kayafa dhi bbuna. 14 Kayafa i pongʉeri Wayaudi dho nari kʉ, ddikpa ke dhe ndrŭ djotsina, ná føri kʉ kpadhi bblonga dho.

15 Føro, Simoni Petro ma, Yesu una ddikpa d’i ke ma na ngʉ ra Yesu una dhé. Fø ke bbò kuhani chungʉe chu ndirigoti ke ma tsungʉe Yesu ma na kpø bbò kuhani bbá bbaidjo, 16 ro Petro ngʉ tøni dzaitso ró bbaidjó. Føri dho, chu ma chungʉeni bbò kuhani na ná fø ke rangʉe loti dzaitso ronga ngʉ b’o ná ke na ndirigoti ke tsungʉe Petro adzá. 17 Føro dzaitso ronga ngʉ b’o ná njí dhi singba ngba dhungʉeri Petro tso: “Ni maddi ká nga kʉ fø ke unakpa kana ddi ke ri?” Ke ngʉngʉe logoti: “Ngao.” 18 Ro, njí dhi kpa ma, nga ngʉ b’o ná kpa ma na ngʉ di makala na ndima vʉngʉe ná kazz tsó. Kpa ngʉ kazz dhǒ ndima ró grì ngʉ o nari dho. Petro maddi ngʉ tøni kpa kana kazz ndi dhǒ ro.

19 Føro bbakuhani djó bbonga dhungʉe nga Yesu tso ke unakpa ma, ke ngʉ adi ddi ná lo ma na djo. 20 Yesu ngʉngʉe logoti: “Ma pongʉe krʉ kʉ ná lo pʉlʉpʉlʉ dz’ dho. Krʉ ddo ró ma ngʉ adi longaddi sinagogi nǎ ndirigoti hekalu nǎ, ná fø ngana Wayaudi krʉ ngʉ adi si ndima tso nju. Ma nzá pongʉe ddikpa lo ro maddi rúrunga nǎ ri. 21 Nde, ni ká ngadhu ma tso addudho? Adhunga ma d’rangʉe ná lo rrngʉe ná ndrŭ tso. Fø ndrŭ chu ma d’rangʉe ná lo chu.” 22 Fø lo Yesu po ro, føga ngʉ tøni ná bbobbonga kana ddi ke b’ɨngʉe Yesu bɨtɨ nanga ndirigoti ke pongʉeri: “Bbakuhani djó bbonga dho ká ni ka ni ngʉ logoti fø?” 23 Yesu ngʉngʉe logoti: “Njati rie kali dhi lo ma po ri ró, anidho ma sha kali nari dhǒ ná lo. Ro, rie bbʉbbʉlo ma po ri ró, føro ká ni b’ɨ ma addudho?” 24 Føri goti Anas chongʉe ke chi le chi ke ro Bbò kuhani Kayafa bba.

25 Simoni Petro ngʉe føga kazz ndi dhǒ ro. Føro kpa dhungʉeri ke tso: “Ni ká kʉ nga fø ke unakpa kana ddi ke ro ri?” Ke gʉngʉe ndi ɨ ndi ripo ro: “Ma nga kʉ fø kpa ro ri.” 26 Bbò kuhani dhó njí dhi kpa kana ddi ke, føri ngʉe krr bɨ Petro krrngʉe ná ke ma dhó familia nǎ ke dhungʉeri Petro tso: “Ni i ká ma njae fø ke ma na í na nzá?” 27 Ro, Petro gʉngʉe fø lo ki vi dhé, nari goti økpa ngongʉeni thei.

28 Føri goti kpa mbangʉe Yesu Kayafa bbá ro guverner bba. Føri ngʉe bbʉtsó kukú. Ro, Wayaudi nganga ro i nzá tsungʉe guverner bba ri, ndiro nzɨ ndima ngʉ nzá tse ná ndrŭ ró, nja ndima nyó Pasaka d’e. 29 Føri dho, Pilato vʉngʉe arugu ndirigoti ke dhungʉeri: “Ni ká bbø i ke ngbá lo djó?” 30 Kpa ngʉngʉe logoti: “Njati i ke ée chelo* nji ná ke nga ró, nzá ko ka ko mbae ke ro ni dhona ri.” 31 Føro Pilato pongʉeri: “Anidzi ke ndirigoti anid’ilo ke djo nidhó yadha ró ro.” Ro, Wayaudi pongʉeri: “Ndrŭ hwidha tso ro nzá uni ko dho ri.” 32 Fø lo njingʉeni ndiro Yesu pongʉeri ndi ká ka ndi dhee ngbà di ná dhe dho ma nari njini d’e.

33 Føro Pilato ki tsungʉe vi guverner dzá njí ndi ngʉ adi nji nǎ ná dza na ndirigoti ke nzingʉe Yesu ro, ke dhungʉeri ke tso: “Ni i ká kʉ Wayaudi bbá Pi? 34 Yesu ngʉngʉe logoti: “Fø lo ká ni dhú ma tso addudho? Fø lo ká si ni nganga nǎ ro, inga føri kʉ ndrŭ d’ra ni dho ma djo ná lo?” 35 Pilato ngʉngʉe logoti: “Ma nga kʉ Muyaudi ri, ri ká nga fø ri? Nidhó bbu nǎ ndrŭ nganga ma, nidhó bbakuhani djó bbobbonga ma na i bbʉ ni ma dhona. Ró, ni ká nji ngbá kosa?” 36 Yesu ngʉngʉe logoti: “Madhó Pidhinga nga kʉ i dz’ dzá sehemu ro ri. Njati madhó Pidhinga ée i dz’ dzá sehemu ro ró, madhó njí dhi kpa ka ndima njie lɨ ndiro nzɨ ma bbʉni Wayaudi thó thina ró. Ro, madhó Pidhinga nzá si iga ro ri.” 37 Føri dho, Pilato dhungʉeri ke tso: “Føri ká pori ni kʉ pi?” Yesu ngʉngʉe logoti: “Ni nganga i ripo ma kʉ pi. Føri nganga dho i ma gøni gø ndirigoti føri dho i ma si i dz’ djo ma; ndiro ma dhǒ lo dzá bbʉbbʉnga fø bbʉbbʉlo djo d’e. Ddikpa le é nì fø bbʉbbʉlo laidjó ró, fø le adi ma chu rrrr.” 38 Pilato pongʉeri: “Bbʉbbʉlo ká kʉ addu?”

Fø lo ndi po nari goti ke ki rangʉe Wayaudi dhi ngana ndirigoti ke pongʉeri kpa dho: “Fø ke nǎ nzá ma ba kosa ro ri. 39 Føri kina nibbá desturi porieri nari kʉ, ma di ndrŭ kló ddikpa Pasaka ddo dyina. Nde, ni ká jiri ma kló Wayaudi bbá pi ni dho?” 40 Føro ndrŭ ki høngʉe: “Fø ke i nzɨ, ro Baraba!” Baraba ngʉe che kʉ ná lo ngʉ adi nji ná ke.